លោក តូ ឡឹម ត្រូវបានបោះឆ្នោតគាំទ្រឱ្យបន្តកាន់តំណែងជាអគ្គលេខាធិការបក្សកុម្មុយនីស្តវៀតណាម

បើយោងតាមការចុះផ្សាយរបស់សារព័ត៌មានធំៗ សន្និសីទសារព័ត៌មានខាងលើ ត្រូវបានដឹកនាំដោយអគ្គលេខាធិការបក្ស ដែលទើបទទួលបានការតែងតាំងថ្មី ពោលគឺលោក តូ ឡឹម ផ្ទាល់តែម្តង។ ទោះបីមកទល់ពេលនេះមិនទាន់មានការប្រកាសជាផ្លូវការពីការតែងតាំងនេះក៏ដោយ ប៉ុន្តែវត្តមានរបស់លោក តូ ឡឹម នៅក្នុងសន្និសីទសារព័ត៌មានបានសបញ្ជាក់យ៉ាងច្បាស់ពីលទ្ធផលនៃកិច្ចប្រជុំរបស់គណៈកម្មាធិការកណ្តាលទាំង១៨០រូបនៅក្នុងរយៈពេល១សប្តាហ៍កន្លងមកនេះ។

គួរបញ្ជាក់ថា តំណែងអគ្គលេខាធិការបក្ស គឺជាតំណែងដែលមានឥទ្ធិពលបំផុតនៅក្នុងរចនាសម្ព័ន្ធនយោបាយរបស់វៀតណាម។ លោក តូ ឡឹម បានក្តោបក្តាប់តំណែងនេះតាំងពីពាក់កណ្តាលឆ្នាំ២០២៤ មកម្ល៉េះ បន្ទាប់ពីលោកបានឡើងកាន់តំណែងបន្តពីអតីតអគ្គលេខាធិការបក្សលោក ង្វៀង ភូ ទ្រុង (Nguyen Phu Trong) ដែលបានទទួលមរណភាព។

ការបន្តអាណត្តិថ្មីរយៈពេល៥ឆ្នាំនេះ ត្រូវបានអ្នកវិភាគមើលឃើញថា ជាការបង្ហាញពីស្ថិរភាពនយោបាយ និងការបន្តពង្រឹងយុទ្ធសាស្ត្រដឹកនាំរបស់លោក តូ ឡឹម ក្នុងការអភិវឌ្ឍសេដ្ឋកិច្ច និងការប្រយុទ្ធប្រឆាំងនឹងអំពើពុករលួយនៅក្នុងប្រទេសវៀតណាម ឱ្យកាន់តែខ្លាំងក្លាបន្ថែមទៀត៕

អត្ថបទៈ សួន ឡង់ទី. រូបភាពៈ ឯកសារបរទេស