លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំនៅកម្ពុជា បានចាត់ទុកដំណើរទស្សនកិច្ចផ្លូវរដ្ឋរបស់លោក ស៊ី ជីនពីង ប្រធានាធិបតីចិន មកកាន់ប្រទេសកម្ពុជា នាពេលថ្មីៗនេះ បានផ្តល់ផលវិជ្ជមានជាច្រើនសម្រាប់វិស័យទេសចរណ៍កម្ពុជា ជាពិសេសតាមរយៈការឯកភាពកំណត់យកឆ្នាំ២០២៥ ជាឆ្នាំទេសចរណ៍កម្ពុជា-ចិន តែម្តង។ ទោះបីជាកន្លងមកការកំណត់យកឆ្នាំ២០២៤ ជាឆ្នាំផ្លាស់ប្តូរប្រជាជន និងប្រជាជនរវាងកម្ពុជា-ចិន មិនសូវទទួលបានលទ្ធផលល្អក៏ពិតមែន តែអ្នកជំនាញរូបនេះជឿជាក់ថា តាមរយៈយន្តការថ្មីនេះ ជាពិសេសតាមរយៈវត្តមានរបស់លោក ស៊ី វានឹងជួយស្រូបទាញភ្ញៀវទេសចរចិន ឱ្យចូលមកកម្សាន្តនៅកម្ពុជា កាន់តែច្រើនថែមទៀត។
សម្រាប់លោក ធួន ស៊ីណាន ដើម្បីអាចទាក់ទាញភ្ញៀវទេសចរចិន ឱ្យចូលមកនៅកម្ពុជា បានកាន់តែច្រើន តាមរយៈផែនការកំណត់យកឆ្នាំ២០២៥ ជាឆ្នាំទេសចរណ៍ កម្ពុជា-ចិន នេះ កម្ពុជាត្រូវលុបបំបាត់ឱ្យបាននូវព័ត៌មានអវិជ្ជមានពីកម្ពុជា និងត្រូវពង្រឹងសេវាកម្មទេសចរណ៍ឱ្យបានកាន់តែល្អបន្ថែមទៀត ជាពិសេសត្រូវតភ្ជាប់ជើងហោះហើររវាងកម្ពុជា-ចិន ឱ្យបានកាន់តែទំលំទូលាយថែមទៀត ដ្បិតថា ចិនជាប្រទេសដែលមានដែនដីធំ។
គួរជម្រាបថា នៅក្នុងអំឡុងដំណើរទស្សនកិច្ចផ្លូវរដ្ឋរបស់លោក ស៊ី ជីនពីង ប្រធានាធិបតីចិន នៅកម្ពុជា ពីថ្ងៃទី១៧-១៨ ខែមេសា កន្លងទៅនេះ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានបានចុះអនុស្សរណៈនៃការយោគយល់គ្នាជាមួយអគ្គស្ថានីយវិទ្យុមជ្ឈិមនៃសាធារណរដ្ឋប្រជាមានិតចិន លើការកំណត់យកឆ្នាំ២០២៥ ជាឆ្នាំទេសចរណ៍កម្ពុជា-ចិន ក្នុងគោលបំណងរួមគ្នាលើកកម្ពស់ការផ្សព្វផ្សាយគោលដៅទេសចរណ៍រវាងប្រទេសទាំងពីរឱ្យបានកាន់តែទូលំទូលាយ សំដៅទាក់ទាញភ្ញៀវទេសចរប្រទេសទាំងពីរឱ្យកាន់តែច្រើនឡើងថែមទៀត។
បើតាមការបញ្ជាក់របស់អ្នកនាំពាក្យក្រសួងទេសចរណ៍ នៅក្នុងឆ្នាំ២០២៤ កន្លងទៅ កម្ពុជាទទួលបានភ្ញៀវទេសចរចិន ជាង៨៤ម៉ឺននាក់ កើនឡើង៥៥% បើធៀបនឹងឆ្នាំ២០២៣។ ទន្ទឹមនេះ ដោយកិច្ចសហប្រតិបត្តិការជិតស្និទ្ធរវាងប្រទេសទាំងពីរកម្ពុជា-ចិន ពិសេសជាមួយប្រមុខការទូតចិនប្រចាំកម្ពុជា ក្រសួងទេសចរណ៍កម្ពុជា រំពឹងថា ភ្ញៀវទេសចរចិន ចូលមកកម្សាន្តនៅកម្ពុជានឹងមានការកើនឡើងបន្ថែមទៀតដល់ប្រមាណ១,១លាន នៅឆ្នាំ២០២៥ នេះ៕
