ជាមួយគ្នានេះ អ្នកជំនាញសេដ្ឋកិច្ចបានព្រមានថា សេដ្ឋកិច្ចជប៉ុន អាចនឹងជួបវិបត្តិប្រសិនបើប្រទេសនេះ មិនអាចចរចាឈានទៅសម្រេចបានកិច្ចព្រមព្រៀងពាណិជ្ជកម្ម ជាមួយសហរដ្ឋអាម៉េរិក នាពេល ខាងមុខ ទេនោះ។
សារព័ត៌មាន CNBC បានរាយការណ៍ថា ការមិនទាន់អាចឈានទៅសម្រេចបានកិច្ចព្រមព្រៀងពាណិជ្ជកម្មជាមួយសហរដ្ឋអាម៉េរិក កំពុងគំរាមកំហែងដល់ការធ្វើពាណិជ្ជកម្មរបស់ជប៉ុន ដែលជាមហាអំណាចសេដ្ឋកិច្ចមួយនៅអាស៊ី និងជាសម្ពន្ធមិត្តចាក់ទឹកមិនលិចរបស់អាម៉េរិក។ ជាក់ស្តែងការនាំចេញទំនិញរបស់ជប៉ុន ទៅកាន់ទីផ្សារអន្តរជាតិ កាលពីខែឧសភា បានធ្លាក់ចុះ១,៧% មុនធ្លាក់ចុះ០,៥% បន្ថែមទៀត នៅខែមិថុនា។
ការធ្លាក់ចុះការនាំចេញរបស់ជប៉ុននេះ ត្រូវបានទាញទម្លាក់ដោយសារការធ្លាក់ចុះការនាំចេញទៅកាន់ទីផ្សារសហរដ្ឋអាម៉េរិក ដោយកាលពីខែឧសភា ការនាំចេញរបស់ជប៉ុន ទៅអាម៉េរិក ធ្លាក់ចុះ១១% ហើយបានបន្តធ្លាក់ចុះ១១,៤% នៅក្នុងខែមិថុនា ដែលជាការធ្លាក់ចុះខ្លាំងបំផុតមិនធ្លាប់មានតាំងពីផ្ទុះការរីករាលនៃជំងឺកូវីដ-១៩ នៅឆ្នាំ២០២០។ ការនាំចេញផលិតផលឧស្សាហកម្មរបស់ជប៉ុន ដែលរងការធ្លាក់ចុះខ្លាំងជាងគេ គឺរថយន្ត ដោយនៅក្នុងខែមិថុនា ធ្លាក់ចុះជិត២៧% និងនៅខែឧសភា ធ្លាក់ចុះជិត២៥%។
ទន្ទឹមនឹងការនាំចេញទៅកាន់ទីផ្សារអាម៉េរិក មានការធ្លាក់ចុះ ការចេញទំនិញរបស់ជប៉ុន ទៅកាន់ទីផ្សារចិន ដែលជាដៃគូពាណិជ្ជកម្មធំបំផុតរបស់ខ្លួន ក៏មានការធ្លាក់ចុះ៤,៧% ដូចគ្នាដែរកាលពីឧសភា។
ដោយ សរ សុជាតិ
