តើកងទ័ពថៃ មានចេតនាអ្វីឱ្យពិតប្រាកដបានជាព្យាយាមប្រឌិតរឿងពាក់ព័ន្ធបញ្ហាមីន មកចោទកម្ពុជា ជាបន្តបន្ទាប់?

បើតាមអ្នកជំនាញយល់ឃើញថា ថៃ ហាក់កំពុងមានចេតនាប្រឌិតរឿងក្លែងក្លាយ ដើម្បីបានជាលេសចោទកម្ពុជា ថា បានរំលោភបទឈប់បាញ់។ តែយ៉ាងណាអ្នកតាមដានស្ថានការណ៍សង្គមយល់ឃើញថា ការធ្វើសកម្មភាពរបស់ក្រុមទាហានថៃនេះ ព្រោះចង់ទាក់ទាញប្រជាប្រិយភាពពីពលរដ្ឋថៃ ព្រោះមេភូមិភាគ២ថៃ ជិតចូលនិវត្តន៍។

លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា យល់ឃើញថា ករណីថៃ ប្រឌិតរឿងបង្កប់មីនចោទមកលើកម្ពុជានេះ គឺជាចេតនាចង់ប្ដឹងកម្ពុជា ពីបទរំលោភអនុសញ្ញា អូតាវ៉ា និងចង់ចោទកម្ពុជាថា បានរំលោភបទឈប់បាញ់ ហើយរកលេសផ្ទុះអាវុធសាជាថ្មី ដើម្បីបំពេញមហិច្ឆតាឈ្លានពានមកលើកម្ពុជា ទាំងគឃ្លើន។ សម្រាប់អ្នកជំនាញរូបនេះក្នុងកាលៈទេសៈនេះ កម្ពុជា គួរតែឆ្លើយតបតាមរយៈការបង្ហាញសច្ចភាពទៅកាន់អន្តរជាតិ ដោយការដាក់ពាក្យបណ្ដឹងទៅសហគមន៍អន្តរជាតិ ដែលពាក់ព័ន្ធ ដើម្បីកុំឱ្យថៃ បានចិត្ត និងបន្តអនុវត្តបំពានមកលើកម្ពុជា បន្តទៀត។

ជាមួយគ្នានេះ លោក សេង វណ្ណលី អ្នកតាមដានភូមិសាស្ត្រនយោបាយកត់សម្គាល់ឃើញថា បន្ទាប់ពីមានបទឈប់បាញ់ ថៃ តែងតែធ្វើសកម្មភាពបំពានម្តងហើយម្តងទៀតដូចជាចោទប្រកាន់រឿងបង្កប់មីន រាយបន្លាលួស និងផ្សេងៗទៀត ក្នុងចេតនាធ្វើយ៉ាងណាឱ្យកម្ពុជា ឆ្លើយតប ដើម្បីខ្លួនមានលេសឆ្លើយតបមកកម្ពុជាវិញ ដោយសារថៃ អាចរំលោភបទឈប់បាញ់ជាមួយកម្ពុជា ដោយមានហេតុផលណាមួយ។ បើតាមអ្នកជំនាញរូបនេះ ដោយសារមេភូមិភាគ២ថៃ នឹងចូលនិវត្តន៍ក្នុងពេលដ៏ខ្លីខាងមុខនេះ ដូចនេះក្រុមយោធាថៃ កំពុងបញ្ចេញសកម្មភាពទាក់ទាញប្រជាប្រិយភាពពីពលរដ្ឋខ្លួនឱ្យគាំទ្រលោក ប៊ូន ស៊ីនផាដឃ្លាំង ឱ្យនៅបំពេញតួនាទីបន្តទៀតដោយមិនចាំបាច់ចូលនិវត្តន៍។

ជាមួយគ្នានេះ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា ស៊ីម៉ាក់ បានបង្ហោះសារនៅលើបណ្តាញសង្គមហ្វេសប៊ុកថា ភាគីថៃ ហាក់ខិតខំបង្ហាញថា ខ្លួនជាជនរងគ្រោះព្រោះខែ្មរប្រើគ្រាប់មីន PMN-2 ថ្មី ក្នុងទឹកដីថៃ ហើយឯកឧត្តម បានចោទជាសំណួរថា តើយកទៅដាក់ក្នុងទឹកដីសៀមដោយរបៀបម៉េច? បើទឹកដីស្ថិតនៅទល់មុខគ្នានោះជាដីដែលមានជម្លោះ៕

អត្ថបទ​៖ ជា ម៉ារ៉ា