តើនៅពីក្រោយភាពហ៊‌ឺហា និងឡូយឆាយរបស់ថៃ មានចំណុចអវិជ្ជមានអ្វី ដែលយើងមិនបានដឹង?

វិបត្តិទាំងនេះបានធ្វើឱ្យប៉ះពាល់ដល់វិស័យនានា ដែលជាចន្ទល់សេដ្ឋកិច្ចរបស់ថៃ និងធ្វើឱ្យចំនួនពលរដ្ឋរស់នៅក្នុងបន្ទាត់ក្រីក្រមានការកើនឡើងគួរឱ្យកត់សម្គាល់។ ជាក់ស្តែងចាប់ពីឆ្នាំ២០២៣ ដល់ឆ្នាំ២០២៤ ចំនួនពលរដ្ឋក្រីក្រនៅក្នុងប្រទេសថៃ មានការកើនឡើងចំនួន១,៥%។​

ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិរបស់ថៃ បានចេញផ្សាយរបាយការណ៍ឆ្នាំ២០២៤ ស្តីពី ភាពក្រីក្រ និងវិសមភាពនៅក្នុងប្រទេសថៃ ដោយរបាយការណ៍នេះបានបង្ហាញថា ចំនួនប្រជាជន ដែលរស់នៅក្រោមបន្ទាត់ភាពក្រីក្រនៅក្នុងប្រទេសនេះមានការកើនឡើងនៅឆ្នាំនោះ។ បើយោងតាមរបាយការណ៍នេះ ប្រជាជនថៃ ជាង៣,៤លាននាក់ ត្រូវបានចាត់ថ្នាក់ជាជនក្រីក្រនៅក្នុងឆ្នាំ២០២៤ ហើយនៅចន្លោះឆ្នាំ២០២៣ ដល់ឆ្នាំ២០២៤ ចំនួនប្រជាជនថៃ ដែលធ្លាក់ក្រោមបន្ទាត់ភាពក្រីក្រកើនឡើងប្រមាណ១,៥% ក្នុងនោះកាលពីឆ្នាំ២០២៣ អត្រាភាពក្រីក្រនៅថៃ មានប្រមាណ៣,៤១% ហើយនៅឆ្នាំ២០២៤ ឡើងដល់៤,៨៩%។

ភាគច្រើននៃចំនួននពលរដ្ឋថៃ ដែលទើបធ្លាក់មកនៅក្រោមបន្ទាត់ភាពក្រីក្រ គឺជាកម្មករនៅក្នុងវិស័យកសិកម្ម ពោលគឺមានប្រមាណ៤៥,៤៩% នៃចំនួនប្រជាជនក្រីក្រទាំងអស់ ដែលជាការឆ្លុះបញ្ចាំងពីភាពងាយរងគ្រោះរបស់វិស័យកសិកម្មចំពោះការធ្លាក់ចុះនៃសេដ្ឋកិច្ចរបស់ថៃ។ និន្នាការនៃភាពក្រីក្រ និងវិសមភាពនានា ដែលកំពុងកើតមានឡើងនាពេលថ្មីៗនេះ ក៏ជាបញ្ហាដែលនឹងអាចចាក់ឬសចូលយ៉ាងជ្រៅនៅក្នុងសង្គមថៃ ដែលអាចបន្តវិវត្ត និងបង្កបញ្ហាប្រឈមផ្ទាល់ដល់ការអភិវឌ្ឍន៍សេដ្ឋកិច្ច និងសង្គមរបស់ប្រទេសនេះបន្ថែមទៀត។

របាយការណ៍ខាងលើបានបង្ហាញផងដែរថា កាលពីឆ្នាំ២០២៤ រដ្ឋាភិបាលថៃ បានចំណាយថវិកាប្រមាណ២៥ពាន់លានដុល្លារ ឫប្រមាណជា២៣,៣៥% នៃថវិកាជាតិ ដើម្បីបង្កើតកម្មវិធីសង្គម និងមូលនិធិមួយចំនួន ដើម្បីដោះស្រាយបញ្ហា ប៉ុន្តែភាពក្រីក្រនៅតែបន្តចាក់ឬសយ៉ាងជ្រៅទៅក្នុងសង្គម ស្របពេលដែលវិសមភាពនៅតែពិបាកក្នុងការដោះស្រាយ៕

ដោយៈ សរ សុជាតិ