ក្រុមអ្នកជំនាញបានលើកឡើងថា ការណ៍ដែលប្លុកនេះមិនអាចកាត់ផ្តាច់ពីប្រាក់ដុល្លារបាន ក៏ដោយសារតែប្រទេសសមាជិកមិនឯកភាពគ្នាលើការបង្កើតរូបិយប័ណ្ណរួមដូចប្រាក់អឺរ៉ូ សមាជិកខ្លះមិនគាំទ្រការប្រជែងនឹងប្រាក់ដុល្លារអាម៉េរិក និងដោយសារប្រាក់ដុល្លារអាម៉េរិក នៅតែជារូបិយប័ណ្ណបម្រុងធំបំផុត និងមានស្ថិរភាពបំផុតក្នុងពិភពលោកជាដើម។ នេះបើយោងតាមការចុះផ្សាយរបស់សារព័ត៌មាន South China Morning Post នៅថ្ងៃទី២៥ ខែកុម្ភៈ ឆ្នាំ២០២៦។
ប្រទេសប្រេស៊ីល ដែលជាសមាជិកស្ថាបនិកមួយ នៃប្លុកប្រទេស BRICS ដែលមានសមាជិកស្ថាបនិកចំនួន៥ រួមមាន ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង បានបដិសេធគំនិតនៃការបង្កើតរូបិយប័ណ្ណរួមសម្រាប់ប្លុក BRICS ស្រដៀងគ្នាទៅនឹងប្រាក់អឺរ៉ូ សម្រាប់ចាយនៅតំបន់អឺរ៉ុប នោះឡើយ ហើយនេះឆ្លុះបញ្ឆាំងឱ្យឃើញថា ប្លុកប្រទេស BRICS មិនទាន់ត្រៀមខ្លួនរួចរាល់ ដើម្បីប្រកួតប្រជែងជាមួយប្រាក់ដុល្លារអាម៉េរិកដោយផ្ទាល់នៅឡើយទេ។
ប្រធានាធិបតីប្រេស៊ីល លោក ល្វៀស អ៊ីណាស៊ីអូ លូឡា ដា ស៊ីលវ៉ា (Luiz Inacio Lula da Silva) បានលើកឡើងថា មិនទាន់មានសំណើ ឬការពិភាក្សាអំពីការបង្កើតរូបិយប័ណ្ណរួមសម្រាប់ចាយក្នុងប្លុកប្រទេស BRICS នៅឡើយទេ។ ផ្ទុយទៅវិញ ប្រទេសនានា ដូចជាប្រេស៊ីល និងឥណ្ឌាជាដើម អាចធ្វើពាណិជ្ជកម្មដោយប្រើរូបិយប័ណ្ណផ្ទាល់ខ្លួនរបស់ពួកគេ ដោយមិនពឹងផ្អែកលើប្រាក់ដុល្លារអាម៉េរិក។
នៅប៉ុន្មានឆ្នាំចុងក្រោយនេះ ប្រទេសជាសមាជិកមួយចំនួន នៃប្លុក BRICS ជាពិសេសប្រទេសរុស្ស៊ី និងចិន បានគាំទ្រការកាត់បន្ថយការពឹងផ្អែកលើប្រាក់ដុល្លារអាម៉េរិក។ ទោះជាយ៉ាងណា សមាជិកផ្សេងទៀតដូចជា ឥណ្ឌា ប្រេស៊ីល និងអាហ្វ្រិកខាងត្បូង មិនគាំទ្រពេញទំហឹងចំពោះគំនិតបង្កើតរូបិយប័ណ្ណរួមថ្មីនោះទេ។
ក្រុមអ្នកវិភាគបានលើកឡើងថា ផែនការដែលមានភាពប្រាកដនិយមជាងនេះ ដែលប្លុកប្រទេស BRICS អាចធ្វើបានរួមមានបង្កើនពាណិជ្ជកម្មដោយប្រើរូបិយប័ណ្ណក្នុងស្រុក, ពង្រីកកិច្ចព្រមព្រៀងប្តូររូបិយប័ណ្ណរវាងធនាគារកណ្តាល ដែលជាសមាជិកនៃប្លុកប្រទេស BRICS, តភ្ជាប់ប្រព័ន្ធទូទាត់ជាតិ និងអភិវឌ្ឍប្រព័ន្ធទូទាត់ឌីជីថលរួមជាដើម។
ទិន្នន័យបង្ហាញថា ពាណិជ្ជកម្មក្នុងប្លុកប្រទេស BRICS បានកើនឡើងយ៉ាងខ្លាំង ដោយឈានដល់ ១,១៧ទ្រីលានដុល្លារអាម៉េរិក នៅក្នុងឆ្នាំ២០២៤។ ប៉ុន្តែក្រុមអ្នកជំនាញជឿថា ប្រាក់ដុល្លារអាម៉េរិក នឹងនៅតែជារូបិយប័ណ្ណបម្រុងដ៏មានឥទ្ធិពលបំផុតនៅក្នុងពិភពលោកសម្រាប់ពេលនេះ ដោយសារបណ្ដាប្រទេសជាសមាជិក នៃប្លុកប្រទេស BRICS នៅតែមានទុនបម្រុងប្រាក់ដុល្លារអាម៉េរិកយ៉ាងច្រើនសម្បើម និងដោយសារបណ្ដាប្រទេសជាសមាជិកមានស្ថានភាពនយោបាយ និងសេដ្ឋកិច្ចខុសៗគ្នាដែលធ្វើឱ្យមហិច្ឆតាបង្កើតរូបិយប័ណ្ណរួមសម្រាប់ប្លុកប្រទេស BRICS ពិបាកនឹងសម្រេចបាន៕
ដោយ: តែម សុខុម
