លោក ហ្សេឡិនស្គី ជំរុញឱ្យលោក ពូទីន ទៅប្រទេសតួកគី ប្រសិនបើលោកពិតជាចង់ចរចាផ្ទាល់ពិតប្រាកដមែន

ប្រធានាធិបតីអ៊ុយក្រែន លោក ហ្សេឡិនស្គី បានជំរុញឱ្យប្រធានាធិបតីរុស្ស៊ី លោក ពូទីន ទៅកាន់ប្រទេសតួកគី នៅថ្ងៃព្រហស្បតិ៍ ទី១៥ ខែឧសភា ខាងមុខនេះ ប្រសិនបើលោកចង់ជួបចរចាដោយផ្ទាល់លើបញ្ហាសង្គ្រាមរុំារ៉ៃនៅអ៊ុយក្រែន ពិតប្រាកដមែន។ ការអំពាវនាវរបស់លោក ហ្សេឡិនស្គី សុំជួបចរចាជាមួយលោក ពូទីន នេះ បានធ្វើឡើងនៅពីរថ្ងៃ ក្រោយកើតមានភាពតានតឹង ដែលក្នុងនោះ ក្រុមមេដឹកនាំអឺរ៉ុប បានចូលរួមជាមួយលោក ហ្សេឡិនស្គី ក្នុងការទាមទារឱ្យមានបទឈប់បាញ់រយៈពេល៣០ថ្ងៃ ចាប់ពីថ្ងៃទី១២ ខែឧសភា តទៅ ប៉ុន្តែស្រាប់តែលោក ពូទីន បានឆ្លើយតបវិញដោយការស្នើសុំជួបចរចាដោយផ្ទាល់រវាងភាគីអ៊ុយក្រែន និង ភាគីរុស្ស៊ី គួរឱ្យភ្ញាក់ផ្អើលមិនធ្លាប់មានចាប់តាំងពីរុស្ស៊ី ចូលឈ្លានពានអ៊ុយក្រែននៅថ្ងៃទី២៤ ខែកុម្ភៈ ឆ្នាំ២០២២ មក។

ទោះជាយ៉ាងនេះក្តី ក៏គ្មានការបញ្ជាក់ច្បាស់លាស់ថា តើលោក ពូទីន នឹងចូលរួមចរចាដោយផ្ទាល់ ឬក៏អត់នោះឡើយ។ សូមបញ្ជាក់ថា លោក ពូទីន និងលោក ហ្សេឡិនស្គី មិនដែលបានជួបគ្នាទាល់តែសោះចាប់តាំងពីខែធ្នូ ឆ្នាំ២០១៩ មកម៉្លេះ ហើយមេដឹកនាំទាំងពីរធ្លាប់បានបង្ហាញការមិនចូលចិត្តគ្នាដោយបើកចំហទៀតផងដែរ។

លោក ហ្សេឡិនស្គី បានសរសេរបង្ហោះលើបណ្ដាញទំនាក់ទំនងសង្គម X ថា លោកនឹងរង់ចាំជួបលោក ពូទីន ដោយផ្ទាល់នៅថ្ងៃព្រហស្បតិ៍ សប្ដាហ៍នេះ នៅប្រទេសតួកគី ហើយលោកសង្ឃឹមថា លើកនេះខាងភាគីរុស្ស៊ី នឹងមិនមានលេសអ្វីទៀតទៅចុះ៕

ដោយ: តែម សុខុម