អ្នកចិញ្ចឹមគោរំពឹងការផ្អាកការនាំចូលសត្វពាហនៈ និងសាច់សត្វពីថៃ ជួយជំរុញតម្លៃសត្វគោឱ្យកាន់តែមានភាពល្អប្រសើរ

លោក ហ៊ត លាង ម្ចាស់កសិដ្ឋានចិញ្ចឹមគោ និងទិញគោ នៅខេត្តត្បូងឃ្មុំ រំពឹងការហាមឃាត់ជាបណ្តោះអាសន្នលើការនាំចូលសត្វពាហនៈ ដូចជាគោ ក្របី និងផលិតផលសាច់សត្វពីថៃ នឹងជួយជំរុញឱ្យតម្លៃសាច់គោដែលចិញ្ចឹមនៅក្នុងស្រុកមានស្ថានភាពល្អប្រសើរឡើងវិញ ដ្បិតថា កន្លងមកដោយសារតែមានការនាំចូលសាច់គោពីក្រៅប្រទេសដូចជាពីប្រទេសថៃ ជាដើម បានទាញទម្លាក់តម្លៃសាច់គោនៅក្នុងស្រុកឱ្យធ្លាក់ចុះខ្លាំងគួរឱ្យកត់សម្គាល់។ បើតាមការអះអាងរបស់ម្ចាស់កសិដ្ឋានរូបនេះ តម្លៃគោរស់នាពេលបច្ចុប្បន្នមានតម្លៃប្រមាណ១ម៉ឺនរៀលក្នុងមួយគីឡូក្រាម។

បើតាមការអះអាងរបស់លោក ហ៊ត លាង នៅប៉ុន្មានឆ្នាំចុងក្រោយនេះ មានកសិករជាច្រើនបានបោះបង់មុខរបរចញ្ចឹមគោ ដោយសារតម្លៃធាក់ចុះខ្លាំង និងមិនទទួលបានប្រាក់ចំណេញ​។ កសិករចិញ្ចឹមគោរូបនេះ ជឿជាក់ថា ក្រោយការផ្អាកការនាំចូលសត្វពាហនៈ និងសាច់សត្វពីប្រទេសថៃ ទំនងជាអាចធ្វើឱ្យការផ្គត់ផ្គង់សាច់គោក្នុងស្រុកមិនគ្រប់តាមតម្រូវការទីផ្សារ ដែលអាចនឹងជំរុញឱ្យតម្លៃសាច់គោមានការកើនឡើង។

​​គួរបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ បានសម្រេចហាមឃាត់ការនាំចូលសត្វពាហនៈ និងផលិតផលសាច់សត្វពីប្រទេសថៃ ជាបណ្តោះអាសន្ន ដើម្បីបង្ការការឆ្លងជំងឺឈាមខ្មៅ ឬអង់ត្រាក់ ដែលកំពុងផ្ទុះនៅតំបន់មួយចំនួននៅក្នុងប្រទេសថៃ ហើយក្រសួងកសិកម្មនឹងសហការយ៉ាងជិតស្និទ្ធជាមួយស្ថាប័នពាក់ព័ន្ធនៅតាមបណ្តាច្រកព្រំដែន ដើម្បីពង្រឹងការត្រួតពិនិត្យ និងធានាការអនុវត្តវិធានការប្រកបដោយប្រសិទ្ធភាពខ្ពស់។ ទន្ទឹមនេះ អគ្គនាយកដា្ឋនសុខភាពសត្វ និងផលិតកម្មសត្វ ក៏បានរៀបចំបណ្តាញប្រព័ន្ធប្រតិកម្មរហ័សមួយនៅគ្រប់រាជធានី-ខេត្តទាំង២៥ ក្នុងគោលដៅតាមដានសុខភាពសត្វពាហនៈ និងធ្វើការអន្តរាគមន៍ក្នុងករណីសង្ស័យផងដែរ។ គួរបញ្ជាក់ថា ជំងឺនេះមិនទាន់កើតមាននៅប្រទេសកម្ពុជានោះទេ។

គួរជម្រាបថា កាលពីពេលថ្មីៗនេះ ប្រទេសថៃ មានករណីអ្នកស្លាប់ម្នាក់ ដោយសារឆ្លងជំងឺអង់ត្រាក់ ក្រោយពីទទួលទានសាច់គោ ខណៈមនុស្សជាច្រើននាក់ទៀតកំពុងស្ថិតនៅក្រោមការតាមដានសុខភាព។ ក្រោយមានករណីនេះ ប្រទេសឡាវ ក៏បានផ្អាកការនាំចូលសាច់សត្វជាច្រើនប្រភេទពីប្រទេសថៃ ផងដែរ៕