បើតាមរបាយការណ៍ចុងក្រោយបំផុតពី ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានបង្ហាញថា ក្នុងរយៈពេល ១០ខែ ដើមឆ្នាំ ២០១៩នេះ គម្រោងវិនិយោគដែលត្រូវបានអនុម័ត មានចំនួន ២៦៨គម្រោងដែលមានទុនវិនិយោគសរុបជាង ៦ពាន់ ៨រយលានដុល្លារអាមេរិក ដែលមានការកើនឡើងចំនួន ៦៤គម្រោង និងទុនវិនិយោគ កើនឡើងប្រមាណ ១,៧ពាន់លានដុល្លារអាមេរិក បើធៀបនឹងរយៈពេលដូចគ្នាកាលពីឆ្នាំ ២០១៨។
បច្ចុប្បន្នភាពនៃការវិនិយោគនៅក្នុងប្រទេសកម្ពុជាក្នុងរយៈពេល ១០ខែ ដើមឆ្នាំ ២០១៩នេះ វិនិយោគិនកម្ពុជា ខ្លួនឯងផ្ទាល់គឺជាអ្នកកាន់កាប់ចំណែកវិនិយោគធំជាងគេ ប្រមាណ ៥៦% ឬប្រមាណជាង ៣,៩ ពាន់លានដុល្លារអាមេរិក ខណៈដែល ប្រទេសចិន ជាវិនិយោគិនបរទេស ឈរលើកំពូលតារាង និងជាប្រភពទុនមកពីក្រៅប្រទេសច្រើនជាងគេបង្អស់ ដែលមានទុនវិនិយោគជាង ២,២ ពាន់លានដុល្លារអាមេរិក ឬស្មើនឹងប្រមាណ ៣៣ភាគរយនៃ ទំហំទឹកប្រាក់វិនិយោគសរុបនៅកម្ពុជា។
ក្នុងអំឡុងពេលនេះ ការវិនិយោគក្នុងតំបន់សេដ្ឋកិច្ចពិសេសមាន ៨៨គម្រោង ដែលមានទំហំទុនវិនិយោគជាង ៦៦៧លានដុល្លារអាមេរិក មានការកើនឡើងខ្ពស់បើធៀបនឹងរយៈពេលដូចគ្នា កាលពីឆ្នាំ ២០១៨ ដែលមានការវិនិយោគ ៦៣គម្រោង ក្នុងទំហំទឹកប្រាក់ ៣៥៧លានដុល្លារអាមេរិក។
អត្ថបទទាក់ទង!
ដោយឡែក ការវិនិយោគនៅក្រៅតំបន់សេដ្ឋកិច្ចពិសេស មានរហូតដល់ ១៨០គម្រោង ដែលមានទំហំទុនវិនិយោគជាង ៦,២ពាន់លានដុល្លារអាមេរិក មានការកើនឡើងខ្ពស់បើធៀបនឹងរយៈពេលដូចគ្នា កាលពីឆ្នាំ ២០១៨ ដែលមានការវិនិយោគ ១៤១គម្រោង ក្នុងទំហំទឹកប្រាក់ ៤,៨ពាន់លានដុល្លារអាមេរិក។
បើយើងមើលទៅលើ ការវិនិយោគតាមវិស័យវិញ ឃើញថា គិតចាប់ពីខែមករា ដល់ខែតុលា ឆ្នាំ២០១៩ ការវិនិយោគនៅក្នុងវិស័យឧស្សាហកម្ម និងកម្មន្តសាល មានទុនវិនិយោគប្រមាណ ១,៤ពាន់លានដុល្លារអាមេរិក កើនឡើងខ្ពស់ ធៀបនឹងរយៈពេលដូចគ្នាកាលពីឆ្នាំ២០១៨។
សម្រាប់វិស័យទេសចរណ៍ គឺមានតែ ១៨គម្រោងប៉ុណ្ណោះ តែមានទុនវិនិយោគសរុបជាង ៤,៨ពាន់លានដុល្លារអាមេរិក ដែលធ្វើឲ្យតួលេខនេះ វ៉ាដាច់វិស័យផ្សេងៗតែម្តង ហើយការកើនឡើងដ៏លើសលុបនៃ ទុនក្នុងវិស័យទេសចរណ៍នេះគឺដោយសារតែមាន គម្រោងវិនិយោគធំៗជាច្រើន នៅតាមតំបន់ឆ្នេរសមុទ្រ ហើយវានឹងត្រូវការពេលវេលាច្រើន សម្រាប់ការអភិវឌ្ឍផងដែរ។
យ៉ាងណាមិញ ការវិនិយោគនៅក្នុងវិស័យកសិកម្ម និងកសិ-ឧស្សាហកម្ម ព្រមទាំងវិស័យហេដ្ឋារចនាសម្ព័ន្ធនិងផ្សេងៗ មានការថមថយចុះច្រើន ធៀបនឹងពេលដូចគ្នា កាលពីឆ្នាំ២០១៨។
សូមជម្រាបដែរថា សម្រាប់ខែតុលា ឆ្នាំ ២០១៩ ក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងថ្មី និងគម្រោងពង្រីកផលិតកម្ម ចំនួន ២៤គម្រោង ដែលមានទុនវិនិយោគសរុបជាង ៣០៤លានដុល្លារអាមេរិក និងអាចបង្កើតការងារជិត ២ម៉ឺនកន្លែង ហើយវិនិយោគិនចិន កាន់កាប់ចំណែកវិនិយោគរហូតដល់ទៅ ៨៦% ឬប្រមាណ ២៦០លានដុល្លារអាមេរិក។
ទាំងអស់នេះ សបញ្ជាក់ឲ្យឃើញច្បាស់ពី ទំនុកចិត្តវិនិយោគិនក្នុងស្រុក ក៏ដូចជា វិនិយោគិនបរទេស មកលើ ស្ថិរភាពនយោបាយ និងម៉ាក្រូសេដ្ឋកិច្ចរបស់កម្ពុជា និងមានសុទិដ្ឋិនិយមខ្ពស់ចំពោះសេដ្ឋកិច្ចកម្ពុជា ទើបពួកគេហ៊ានសម្រេចមកដាក់ទុនវិនិយោគនៅកម្ពុជា យ៉ាងដូច្នេះ។
ពិតណាស់ កម្ពុជាត្រូវការការបោះទុនវិនិយោគបន្ថែម ដើម្បីជំរុញកំណើនសេដ្ឋកិច្ចជាតិ ឲ្យបន្តកើនឡើងទៅមុខជានិច្ច ហើយអ្វីដែលសំខាន់ មិនអាចខ្វះបាននោះ គឺច្បាប់ ច្បាប់ដែលគ្រប់គ្រងលើការវិនិយោគនោះ ឲ្យមានប្រសិទ្ធិភាព និងមានតម្លាភាព។
ឯកឧត្តម សុខ ចិន្តាសោភា អគ្គលេខាធិកាក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា សមិទ្ធផលដែលសម្រេចបាននាពេលនេះ សបញ្ជាក់ឲ្យឃើញថា ក្រុមប្រឹក្សាអភិវឌ្ឍន៍គឺជាស្ថាប័នគន្លឹះ ដែលធ្វើការសម្របសម្រួលជាមួយវិនិយោគ និងបានបន្តបំពេញការងារយ៉ាងសកម្ម ក្នុងការទាក់ទាញវិនិយោគថ្មីៗ រួមចំណែកដោះស្រាយបញ្ហាប្រឈមនានារបស់អ្នកវិនិយោគ ផ្តល់សេវាថែទាំអ្នកវិនិយោគ ក្នុងគោលបំណងជួយឲ្យអ្នកវិនិយោគទទួលបានភាពជោគជ័យក្នុងការវិនិយោគ និងបន្តពង្រីកការវិនិយោគរបស់ខ្លួននៅកម្ពុជា។
អត្ថបទគួរឲ្យចាប់អារម្មណ៍
ជាការរួមចំណែកដល់ការអភិវឌ្ឍសេដ្ឋកិច្ចជាតិ ក្រុមប្រឹក្សាអភិវឌ្ឍន៍កម្ពុជា ក៏បានបញ្ចប់ការរៀបចំសេចក្តីព្រៀងច្បាប់វិនិយោគថ្មី និងច្បាប់ស្តីពីតំបន់សេដ្ឋកិច្ចពិសេស ដែលក្នុងនោះក៏បានគិតគូរអំពី ការធ្វើឲ្យកាន់តែប្រសើរឡើងនូវ នីតិវិធីស្នើសុំវិនិយោគ ការជំរុញ និងការផ្តល់ការលើកទឹកចិត្តដល់ វិស័យដែលកម្ពុជាកំពុងមានសក្តានុពល ដើម្បីជំរុញការអភិវឌ្ឍឧស្សាកម្មកម្ពុជា និងឆ្លើយតបឲ្យទាន់ការប្រែប្រួលរចនាសម្ព័ន្ធសេដ្ឋកិច្ចក្នុងតំបន់ និងពិភពលោក៕
None
