អ្នកជំនាញមិនលើកទឹកចិត្តឱ្យកសិករកាប់​ដំណាំចាស់ចោល ហើយងាកមកដាំកៅស៊ូនោះទេ ទោះទីផ្សារជ័រកៅស៊ូមានស្ថិរភាពល្អ

យ៉ាងណាមិញ ប្រធានសមាគមអភិវឌ្ឍន៍កៅស៊ូកម្ពុជា មិនលើកទឹកចិត្តឱ្យកសិករកាប់ដំណាំចាស់ៗ ដែលកំពុងប្រមូលផលចោល ដើម្បីមកដាំកៅស៊ូតាមចរន្តនោះទេ ដោយសារដំណាំកសិកម្មត្រូវទាមទារការគណនាផលចំណេញ និងពេលវេលាវែងឆ្ងាយ។

លោក ម៉ែន សុភក្តិ ប្រធានសមាគមអភិវឌ្ឍន៍កៅស៊ូកម្ពុជា បានគូសបញ្ជាក់ថា តម្រូវការប្រើប្រាស់វត្ថុធាតុដើមសម្រាប់ការផលិតសំបកកង់រថយន្តក្នុងស្រុក និងពីក្រៅប្រទេសបានធ្វើឱ្យជ័រកៅស៊ូរបស់កម្ពុជា មានទីផ្សារល្អប្រសើរជាងមុន។ ជាក់ស្ដែងនៅក្នុងត្រីមាសទី២ ឆ្នាំនេះ តម្លៃជ័រកៅស៊ូមានការកើនឡើងជាមធ្យមប្រមាណ១០០ដុល្លារក្នុង១តោន បើធៀបនឹងត្រីមាសទី១ឆ្នាំនេះ។ អ្នកជំនាញរូបនេះជឿជាក់ថា ប្រសិនបើតម្លៃកៅស៊ូនៅតែបន្តកើនឡើង ឬមានស្ថិរភាពនោះនឹងធ្វើឱ្យមានការចាប់អារម្មណ៍ច្រើនពីអ្នកស្រលាញ់វិស័យកសិកម្ម ហើយអាចធ្វើឱ្យមានការផ្លាស់ប្ដូរនូវមុខដំណាំមួយចំនួនដោយងាកមកដាំកៅស៊ូជំនួសវិញ ដែលនឹងធ្វើឱ្យផ្ទៃដីដៃកៅស៊ូនៅកម្ពុជា មានការកើនឡើងបន្ថែមទៀត។ ទោះជាយ៉ាងណាប្រធានសមាគមអភិវឌ្ឍន៍កៅស៊ូកម្ពុជា មិនលើកទឹកចិត្តឱ្យកសិករកាប់ដំណាំដែលកំពុងអាស្រ័យផលចោលហើយងាកមកដាំកៅស៊ូជំនួសនោះទេ តែត្រូវចេះពិចារណាក្នុងការទទួលបានទិន្នផល និងប្រាក់ចំណេញ។

ដោយឡែកឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសបញ្ជាក់ថា តម្រូវការប្រើប្រាស់វត្ថុធាតុដើមកៅស៊ូនៅកម្ពុជា មានការកើនឡើងគួរឱ្យកត់សម្គាល់ ដោយបច្ចុប្បន្នកម្ពុជាមានរោងចក្រផលិតកៅស៊ូប្លាស្ទីកចំនួន១៩៩កន្លែង និងមានរោងចក្រផលិតសំបកកង់រថយន្តចំនួន១១រោងចក្រ។ បើតាមការគូសបញ្ជាក់របស់មន្ត្រីជាន់ខ្ពស់រូបនេះ នៅឆមាសទី១ ឆ្នាំ២០២៦ កម្ពុជា នាំចេញជ័រកៅស៊ូទៅទីផ្សារអន្តរជាតិ សម្រេចបានប្រមាណ១ពាន់លានដុល្លារកើនឡើង៥៥% បើធៀបនឹងរយៈពេលដូចគ្នាកាលពីឆ្នាំមុន។

គិតមកទល់ពេលនេះ កម្ពុជា មានផ្ទៃដីដាំកៅស៊ូសរុបជាង៤៤ម៉ឺនហិកតា ក្នុងនោះផ្ទៃដីចៀរជ័របានមានប្រមាណ៧៧% និងផ្ទៃដីថែទាំមាន២៣%។ ជាមួយគ្នានេះផ្ទៃដីកៅស៊ូវិនិយោគមានចំនួន៤ម៉ឺន៦ពាន់ហិកតា ស្មើនឹង១០% ផ្ទៃដីកៅស៊ូសម្បទានដីសេដ្ឋកិច្ចមានចំនួនជាង១៧ម៉ឺនហិកតាស្មើនឹង៤០% និងផ្ទៃដីកៅស៊ូគ្រួសារមានចំនួនជាង២២ម៉ឺនហិកតាស្មើនឹង៥០%៕

អត្ថបទ៖ បូ ដូឡា