ជុំវិញនឹងបញ្ហាទីផ្សារត្រីនេះ រដ្ឋមន្ត្រីក្រសួងកសិកម្មទទួលស្គាល់ថា វាពិតជាកំពុងបង្កជាការលំបាកចំពោះអ្នកចិញ្ចឹមក្នុងស្រុកដោយសារតែបញ្ហាចម្បងនោះ គឺការខ្វះនូវគ្រប់គ្រងហេដ្ឋារចនាសម្ព័ន្ធ និងការគ្រប់គ្រងទីផ្សារ ខណៈការនាំចូលត្រីនៅបន្ដមាន គួបផ្សំនឹងការចិញ្ចឹមក្នុងស្រុកនាពេលបច្ចុប្បន្នមានការកើនឡើងច្រើន។ ទោះយ៉ាងណា ក្រសួងនៅតែបន្ដខិតខំក្នុងការស្វែះស្វែងរកដំណោះស្រាយសម្រាប់បញ្ហានេះ។
ឯកឧត្តម វេង សាខុនរដ្ឋមន្ត្រីក្រសួងកសិកម្មបានលើកឡើងថា នៅលើទំព័រហ្វេសប៊ុកផ្លូវការរបស់លោកថា ការធ្វើវារីវប្បកម្ម បានជួបប្រទះនឹងបញ្ហាប្រឈមតាំង ឆ្នាំ២០២០ នៅអំឡុងពេលនៃការរីករាលដាលជំងឺកូវីដ១៩ ហើយបញ្ហានេះបានអូសបន្លាយរហូតដល់ឆ្នាំ២០២១ ដែលបាននិងកំពុងធ្វើឲ្យអ្នកចិញ្ចឹមត្រីនឿយណាយ និងពន្យារពេលក្នុងការដាក់កូនត្រីពូជចិញ្ចឹមបន្ត។ ទោះយ៉ាងណា សម្រាប់ការធ្វើវារីវប្បកម្មខ្នាតតូច និងមធ្យមនៅដំណើរការធម្មតា ព្រមទាំងមានសន្ទុះកើនឡើង ដោយទទួលបានការគាំទ្រតាមរយៈរាជរដ្ឋាភិបាល។
ឯកឧត្តម វេង សាខុន បន្ថែមថា ការគ្រប់គ្រង ផ្នែកហេដ្ឋារចនាសម្ព័ន្ធ និងការគ្រប់គ្រងទីផ្សារត្រី មិនទាន់បានល្អប្រសើរ ទើបធ្វើឱ្យតម្លៃទីផ្សារត្រីក្នុងស្រុកធ្លាក់ចុះ គួបផ្សំនឹងការចិញ្ចឹមត្រីច្រើន ហើយការនាំចូលត្រីពីខាងក្រៅនៅតែបន្ត។
បើតាមរដ្ឋមន្ត្រីកសិកម្ម ដើម្បីដោះស្រាយបញ្ហានេះ កន្លងមកក្រសួងបានរៀបបង្កើតគោលនយោបាយជំរុញវារីវប្បកម្មនៅកម្ពុជា។ បើកកិច្ចប្រជុំ ជាមួយក្រុមអ្នកចិញ្ចឹមត្រីក្នុងស្រុក ដើម្បីរកដំណោះស្រាយទីផ្សារ និងពង្រឹងការត្រួតពិនិត្យ គុណភាពត្រី នាំចូលជាដើម។ លើពីនេះ ក្រសួងក៏បានជំរុញឲ្យមានការបង្ក្រាបការនាំចូលត្រីខុសច្បាប់ និងកាត់បន្ថយការនាំចូលត្រីផងដែរ។
ជាមួយគ្នានេះ លោក ថាយ សុមុនី ប្រធាននាយកដ្ឋានអភិវឌ្ឍវារីវប្បកម្ម នៃក្រសួងកសិកម្ម ក៏បានលើកឡើងមិនខុសគ្នាប៉ុន្មានពីរដ្ឋមន្ត្រីក្រសួងកសិកម្ម នោះទេ។ លោកថា បញ្ហាក្នុងវិស័យវារីវប្បកម្ម នៅតែកើតមាន ទោះបីកន្លងមកក្រសួង និងស្ថាប័នពាក់ព័ន្ធ បានខិតខំរកដំណោះស្រាយជូនកសិករយ៉ាងណាក្ដី។ ប្រធាននាយកដ្ឋានរូបនេះ បានលើកឡើងថា ដើម្បីដោះស្រាយបញ្ហានេះ ជូនក្រុមវារីវប្បករ ក្រសួងបានជំរុញផលិតភាពក្នុងស្រុក រឹតបន្តឹងការនាំចូលត្រីពីខាងក្រៅ និងពង្រឹងគុណភាពផល ជលផល ជាដើម។
អត្ថបទគួរអាន
ទោះជាបែបនេះក្ដី ក្រុមអ្នកចិញ្ចឹមត្រីក្នុងស្រុក នៅមានក្ដីកង្វល់ ជាមួយបញ្ហានេះ។ លោកស្រី កែវ យ៉ាដា ប្រធានស្ដីទីសមាគមវារីវប្បករ កម្ពុជា នៅតែបង្ហាញការព្រួយបារម្ភ និងត្អូញត្អែរ ពីបញ្ហាទីផ្សារត្រី នាពេលបច្ចុប្បន្ន។ បើទោះបី កន្លងមកមានការជួបប្រជុំ ជាច្រើនដង រវាងក្រសួង-ស្ថាប័ន ពាក់ព័ន្ធ ដើម្បីរកដំណោះស្រាយ ចំពោះបញ្ហាទីផ្សារត្រីក្នុងស្រុក តែប្រសិទ្ធភាពហាក់នៅមានកម្រិត។ បើតាមលោកស្រី យ៉ាដា ក្រុមអ្នកចិញ្ចឹមត្រីក្នុងស្រុក នៅតែជួបបញ្ហាទីផ្សារ ពិសេសក្រុមអ្នកចញ្ចឹមត្រីធំៗ ជាច្រើន បាននាំគ្នាផ្អាកចិញ្ចឹមត្រី ព្រោះមិនអាចទ្រាំទ្រ នឹងការខាតដើមទុន។
លោកស្រីប្រធានស្ដីទីសមាគមរូបនេះ បានបញ្ជាក់បន្ថែមថា សព្វថ្ងៃ ទីផ្សារត្រីប្រសើរបន្តិចហើយ បើប្រៀបនឹងកាលចាប់ផ្ដើមផ្ទុះកូវីដ-១៩ ក្នុងព្រឹត្ត្រិការណ៍ ២០កុម្ភៈ ព្រោះចូលដល់រដូវក្សត់ត្រី តែតម្លៃវិញហាក់នៅទាបដដែល។ ដ្បិតថា មិនអាចបង្ហាញពីតម្លៃត្រី នាពេលបច្ចុប្បន្ន តែលោកស្រី យ៉ាដា បានបញ្ជាក់ថា អ្នកចិញ្ចឹមត្រីមួយចំនួន កំពុងរារែកចិត្តក្នុងការចិញ្ចឹមត្រីបន្ត ព្រោះតែស្ថានភាពទីផ្សារត្រី នៅតែមិនទាន់មានស្ថិរភាព។
ថ្វីបើ វិស័យវារីវប្បកម្ម បានជួបបញ្ហាមួយចំនួន អំឡុងវិបត្តិកូវីដ-១៩ តែរដ្ឋមន្ត្រីក្រសួងកសិកម្ម ឯកឧត្តម វេង សាខុន បានកត់សម្គាល់ឃើញថា នារយៈពេលមួយទស្សវត្សចុងក្រោយ វិស័យនេះ ហាក់មានការរីកចម្រើនខ្លាំង។ យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ចាប់ពីថ្ងៃទី១ ខែមករា ឆ្នាំ២០២១ រហូតមកដល់បច្ចុប្បន្ន ផលវារីវប្បកម្មដែលកម្ពុជា ទទួលមានប្រមាណ ១៥ម៉ឺនតោន៕
អត្ថបទ៖ ខន ណារី
None
