ពលករខ្មែរជាង២ពាន់នាក់បានសម្រុកចាកចេញពីប្រទេសថៃ ក្រោយសង្គ្រាមរវាងថៃ និងកម្ពុជាកាន់តែឡើងកម្តៅ
មន្ត្រីអាជ្ញាធរថៃបានអះអាងថា មានពលករខ្មែរជាង២ពាន់នាក់បានសម្រុកចាកចេញពីប្រទេសថៃមកកាន់ប្រទេសកំណើតវិញ តាមច្រកព្រំដែនអន្តរជាតិដូង-បានឡែម ស្ថ…
បន្ទាប់ពីបានស្តាប់របាយការណ៍របស់ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ និងជាប្រធានគណៈបញ្ជាការឯកភាពរដ្ឋបាលខេត្តកំពង់ធំរួចមក, ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានមានប្រសាសន៍លើកឡើងថា ការចុះក្ដាប់សភាពការណ៍នៅមូលដ្ឋាននាពេលនេះ គឺអនុវត្តតាមបទបញ្ជាដ៏ខ្ពង់ខ្ពស់ បំផុតរបស់សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ កម្ពុជា ក្នុង គោលដៅបំពាក់ និងពង្រឹងស្មារតីដល់អាជ្ញាធរមូលដ្ឋាន មន្ត្រីរាជការ និងកងកម្លាំងប្រដាប់អាវុធ ក៏ដូចជាប្រជាពលរដ្ឋទូទៅក្នុងមូលដ្ឋានខេត្តកំពង់ធំ ឱ្យរួបរួមគ្នាជាធ្លុងមួយ សាមគ្គីភាព និងឯកភាពជាតិរឹងមាំ សំដៅរួមគ្នាគិតគូរ គាំទ្រ និងផ្សារភ្ជាប់ រវាងសមរភូមិក្រោយនិងសមរភូមិ មុខ ជាពិសេសក្នុងកំឡុងពេលនៃការប៉ះទង្គិចនៅតំបន់ព្រំដែនកម្ពុជា-ថៃ នាពេលនេះ។ ឯកឧត្តមឧបនាយករដ្ឋមន្ត្រីប្រចាំការបានបន្តថា ដំណើរចុះក្តាប់សភាពការណ៍នាពេលនេះ ក៏ ដើម្បីបន្តផ្ដោតការយកចិត្តទុកដាក់ទៅលើការដោះស្រាយ បញ្ហាសេដ្ឋកិច្ចមូលដ្ឋាន និងការងារសតិអារម្មណ៍នយោបាយ ព្រមទាំងការគ្រប់គ្រងព័ត៌មានផងដែរ។
ឯកឧត្ដមឧបនាយករដ្ឋមន្ត្រីប្រចាំការ បានផ្តល់ការណែនាំដល់គណៈបញ្ជាការឯកភាពរដ្ឋបាលខេត្តកំពង់ធំ ឱ្យបន្តក្ដាប់និងតាមដានសភាពការណ៍ក្នុងមូលដ្ឋានជាប់ជាប្រចាំ និងត្រូវត្រៀមលក្ខណៈជួយដល់បងប្អូនដែល រងផលប៉ះពាល់ដោយសារស្ថានការណ៍ប៉ះទង្គិចនៅតំបន់ព្រំដែន ពិសេសការវិលត្រឡប់របស់បងប្អូនពលករដែល បានទៅធ្វើការងារនៅប្រទេសថៃ ក៏ដូចជាបងប្អូនកម្មករ និងអាជីវករ ដែលបានទៅធ្វើការនិងរកស៊ីនៅតំបន់ព្រំដែន ដោយត្រូវគិតគូរទាំងស្ថានភាពនៃការរស់នៅ និងទាំងសុខភាពរបស់បងប្អូន ឱ្យបានល្អតាមដែលអាចធ្វើទៅបាន។
ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត ក៏បានផ្ដល់ គោលការណ៍ណែនាំមួយចំនួន ពាក់ព័ន្ធនឹង ការរៀបចំក្រុមប្រចាំការរួមនៅថ្នាក់ខេត្ត និងក្រុមប្រចាំការថ្នាក់ក្រុង-ស្រុកទាំង៩ ក្នុងគោលដៅដើម្បីធ្វើការដោះស្រាយ បញ្ហា ប្រឈម នានា ក៏ដូចជាការគិតគូរផ្តល់ការឧបត្ថម្ភគាំទ្រ និងការឆ្លើយតបនានា ស្របទៅនឹងការវិវត្តនៃស្ថានការណ៍ ក៏ដូចជាផលប៉ះពាល់ផ្សេងៗពីការប៉ះទង្គិចនៅតំបន់ព្រំដែនកម្ពុជា-ថៃ។ ឯកឧត្ដមឧបនាយករដ្ឋមន្ត្រីប្រចាំការ បានបន្តថា យើងទាំងអស់គ្នាត្រូវប្រកាន់យកនូវស្មារតីរួបរួមគ្នាជាធ្លុងមួយ និងហ៊ានលះបង់ ដើម្បីបម្រើ និងផ្តល់ការគាំទ្រដល់សមរភូមិមុខផង និងផ្ដល់កម្លាំង ចិត្តដល់រាជរដ្ឋាភិបាល និងវីរកងទ័ពជួរមុខផង ក្នុងបុព្វហេតុការពារជាតិ និងបូរណភាពទឹកដី។
នៅក្នុងឱកាសនោះដែរ ឯកឧត្ដមឧបនាយករដ្ឋមន្ត្រីប្រចាំការ បានផ្ដល់នូវអនុសាសន៍ណែនាំបន្ថែមដល់អាជ្ញាធរគ្រប់លំដាប់ថ្នាក់ឱ្យ បន្តយកចិត្តទុកដាក់លើបញ្ហាសន្តិសុខ សណ្ដាប់ធ្នាប់, ពង្រឹងការអនុវត្តគោលនយោបាយភូមិឃុំសង្កាត់មាន សុវត្ថិភាព, ពង្រឹងគុណភាព និងប្រសិទ្ធភាពនៃការផ្ដល់ សេវា គ្រប់ ប្រ ភេទ, ពង្រឹងការដោះស្រាយ វិវាទក្រៅប្រព័ន្ធ ប្រកបដោយ ប្រសិទ្ធភាព និងពន្លឿនការដោះស្រាយបណ្ដឹងនៅតុលាការ និងការកាត់ក្តីប្រកប ដោយ យុត្តិធម៌ ដោយ ឈរលើគោលការណ៍ច្បាប់និងនីតិវិធីជាធរមាន ព្រមទាំងបន្តលើកកម្ពស់សេដ្ឋកិច្ចនៅមូលដ្ឋាន ដោះស្រាយ ជីវភាពប្រជាជន និងត្រូវ បង្ក លក្ខណៈងាយស្រួលដល់វិស័យឯកជន និងធុរកិច្ចឱ្យបានល្អប្រសើរ សំដៅ ធានាដល់ការអភិវឌ្ឍសេដ្ឋកិច្ចមូលដ្ឋាន និងការរីកចម្រើនរបស់ខេត្តកំពង់ធំ។
