យ៉ាងហោចណាស់មានមនុស្សជិត១០០នាក់ បានរងរបួសក្នុងហេតុការណ៍ផ្ទុះមួយនៅសាសារៀនក្នុងព្រះវិហារអ៊ិស្លាមមួយកន្លែងក្នុងទីក្រុងហ្សាការតា ប្រទេសឥណ្ឌូនេស៊ី នៅពេលពួកគេកំពុងប្រមូលផ្តុំគ្នា ដើម្បីធ្វើអធិដ្ឋាន។ ក្រោយមានការផ្ទុះនេះកើតឡើង អាជ្ញាធរឥណ្ឌូនេស៊ី បានបើកការស៊ើបអង្កេតដោយរកឃើញថា វាជាប់ពាក់ព័ន្ធនឹងសិស្សម្នាក់ ដែលបានលេងហ្គេមវីដេអូ។
ប្រធានាធិបតីឥណ្ឌូនេស៊ី លោក ប្រាបូវ៉ូ ស៊ូប៊ីយ៉ានតូ (Prabowo Subianto) បានបញ្ជាឱ្យគណៈរដ្ឋមន្ត្រីរបស់ លោក ពិនិត្យមើលលទ្ធភាពនៃការរឹតបន្តឹងលើការលេងហ្គេមវីដេអូមួយចំនួនដូចជាហ្គេម PUBG ជាដើម បន្ទាប់ពីទទួលបានព័ត៌មានថ្មីៗអំពីការស៊ើបអង្កេតរបស់ប៉ូលិសលើសកម្មភាពបែបនេះ។ នេះបើតាមការបញ្ជាក់របស់រដ្ឋមន្ត្រីក្រសួងយុត្តិធម៌ឥណ្ឌូនេស៊ី លោក Prasetyo Hadi បានប្រាប់អ្នកយកព័ត៌មាននៅទីក្រុងហ្សាការតា កាលពីថ្ងៃទី៩ ខែវិច្ឆិកា។
លោក Prasetyo បាននិយាយថា ពេលនេះឥណ្ឌូនេស៊ី កំពុងគិតអំពីការរឹតបន្តឹងលើហ្គេមវីដេអូព្រោះនៅក្នុងហ្គេមទាំងនេះ វាបានបង្ហាញអំពីអាវុធជាច្រើនប្រភេទផ្សេងៗគ្នា ដែលវាងាយស្រួលក្នុងការរៀនសូត្រ និងយកគម្រូតាម ហើយហ្គេមនេះ ក៏បានជំរុញឱ្យធ្វើអំពើហិង្សាផងដែរ ប៉ុន្តែលោកមិនបានពន្យល់លម្អិតថា តើនឹងត្រូវរឹតបន្តឹងក្នុងកម្រិតណានោះទេ។
ហ្គេមវីដេអូប្រយុទ្ធ PUBG ត្រូវបានបង្កើតឡើងដោយក្រុមហ៊ុន Krafton របស់កូរ៉េខាងត្បូង ហើយវាជាហ្គេមមួយ ដែលធ្វើសកម្មភាពបាញ់ប្រហារដោយមានអ្នកលេងតាមអ៊ីនធឺណិតជាច្រើនរហូតធ្វើឱ្យហ្គេមនេះមានប្រជាប្រិយភាពខ្លាំងរួមជាមួយហ្គេមមួយចំនួនទៀតដូចជាហ្គេម Fortnite និងហ្គេម Free Fire ផងដែរ៕
ដោយ៖ សុខ មង្គល
