គ្រោះធម្មជាតិ បានធ្វើឱ្យចិន ខាតបង់សេដ្ឋកិច្ចធ្ងន់ធ្ងរជិត៨ពាន់លានដុល្លារត្រឹមរយៈពេលតែ៦ខែ

ក្រសួងឆ្លើយតបគ្រោះអាសន្នរបស់​ចិន បានទម្លាយឱ្យដឹងកាលពីថ្ងៃទី១៥ ខែកក្កដា ថា គ្រោះធម្មជាតិ បានធ្វើឱ្យប្រទេសចិន ដែលមានសេដ្ឋកិច្ចធំបំផុតទី២ របស់ពិភពលោកខាតបង់សេដ្ឋកិច្ចធ្ងន់ធ្ងររហូតដល់ទៅជិត៨ពាន់លានដុល្លារអាម៉េរិក គ្រាន់តែនៅឆមាសទី១ ឆ្នាំ២០២៥ នេះ ហើយគ្រោះធម្មជាតិកំណាចៗបំផុតក្នុងចំណោមនោះ រួមមាន​ ការរញ្ជួយដីដ៏ខ្លាំក្លាមួយនៅតំបន់ទីបេ បំណាក់ដីដ៏កំណាចនៅតាមបណ្ដាខេត្តភាគនិរតី និងទឹកជំនន់នៅតាមតំបន់ភាគខាងត្បូងនៃប្រទេសចិន។

លោក ស៊ឹន ចានលី (Shen Zhanli) អ្នកនាំពាក្យក្រសួងឆ្លើយតបគ្រោះអាសន្នចិន បានថ្លែងក្នុងសន្និសីទសារព័ត៌មានមួយថា គ្រោះធម្មជាតិ ដ៏កំណាចទាំងនេះ បានជះផលប៉ះពាល់ដល់ប្រជាជនចិន ដល់ទៅ២៣លាននាក់ ក្នុងនោះមាន៣០៧នាក់ បានបាត់បង់ជីវិត ហើយប្រជាជន៦២ម៉ឺននាក់ បានប្រឈមនឹងការជម្លៀសចេញជាបន្ទាន់។

ទិន្នន័យផ្លូវការបានបង្ហាញថា លំនៅឋានចំនួន២៩.៦០០ខ្នងត្រូវបានបំផ្លាញ ដោយកើនឡើង២៨,៧% បើធៀបនឹងឆ្នាំ២០២៤ ខណៈដំណាំជាង២,១លានហិកតាបានរងការខូចខាត។

ការខាតបង់សេដ្ឋកិច្ចចិន នេះ មានទំហំតូចជាង៤១,៩% បើធៀបនឹងរយៈពេលដូចគ្នាកាលពីឆ្នាំមុន ដែលនៅពេលនោះទឹកជំនន់ គ្រោះរាំងស្ងួត និងការឡើងកម្តៅខ្លាំងបានធ្វើឱ្យចិន ខាតបង់សេដ្ឋកិច្ចក្នុងទំហំប្រមាណ១៣ពាន់លានដុល្លារ ដែលជាតួលេខខាតបង់ប្រចាំឆមាសដ៏ខ្ពស់បំផុតមិនធ្លាប់មានចាប់តាំងពីឆ្នាំ២០១៩ មក៕

ដោយ: តែម សុខុម