ការរំពឹងលោក ស៊ី ជីនពីង នឹងមកចូលរួមកិច្ចប្រជុំអាស៊ានទំនងជាមិនអាចកើតឡើងនោះទេ
មុនកិច្ចប្រជុំកំពូលអាស៊ាននៅប្រទេសម៉ាឡេស៊ីមកដល់មានប្រទេសប្រទេសជាច្រើនរំពឹងថា លោក ស៊ី ជីនពីង ប្រធានាធិបតីចិនអាចនឹងចូលរួមកិច្ចប្រជុំដ៏ធំ…
ទោះបីជាមានការផ្អាកជាបណ្តោះអាសន្ននូវការនាំចូលអង្ករពីប្រទេសហ្វីលីពីន ដែលជាអ្នកនាំចូលអង្ករធំបំផុតរបស់ពិភពលោកយ៉ាងណាក្ដី ក៏ការនាំចេញអង្កររបស់វៀតណាម ត្រូវបានព្យាករថា នឹងកើនលើសពី៨,២លានតោនសម្រាប់ពេញមួយឆ្នាំ២០២៥ ហើយនេះក៏ដោយសារកំណើននាំចេញទៅកាន់ទីផ្សារនានាដូចជាប្រទេសបង់ក្លាដែស ប្រទេសចិន និងប្រទេសអាហ្វ្រិកខាងត្បូងជាដើម។ នេះបើយោងតាមការចុះផ្សាយរបស់សារព័ត៌មាន VN Express។
ប្រទេសហ្វីលីពីន ដែលជាអ្នកនាំចូលអង្ករធំបំផុតរបស់ពិភពលោកបានទិញអង្ករចំនួន៤,៨ លានតោនពីបរទេសក្នុងឆ្នាំ២០២៤ ដោយក្នុងនោះវៀតណាមបានផ្គត់ផ្គង់អង្ករដល់ហ្វីលីពីន រហូតដល់ទៅ៣,៦លានតោន។ ហើយក្នុងរយៈពេល៧ខែដើមឆ្នាំ២០២៥ ប្រទេសវៀតណាម នាំចេញអង្ករទៅបរទេសបានជាង២,៨ពាន់លានដុល្លារអាម៉េរិក ដោយប្រទេសហ្វីលីពីននៅតែជាអ្នកទិញដ៏ធំបំផុតរបស់ខ្លួន។
ទន្ទឹមនេះការនាំចេញអង្កររបស់ឥណ្ឌាទៅកាន់ទីផ្សារអន្តរជាតិត្រូវបានព្យាករថានឹងកើនឡើង ២៥% ឈានដល់២២,៥លានតោននៅឆ្នាំ២០២៥ នេះ ដែលនៅតែមានចំណែកគ្របដណ្ដប់លើសលប់ក្នុងទីផ្សារអង្កររបស់ពិភពលោក។
ដោយឡែកការនាំចេញអង្កររបស់ប្រទេសថៃនៅឆមាសទី១ ឆ្នាំ២០២៥ បានត្រឹមតែជាង៣,៧លានតោនប៉ុណ្ណោះធ្លាក់ចុះ២៧% ហើយគោលដៅនាំចេញអង្ករសម្រាប់ពេញមួយឆ្នាំ២០២៥ របស់ថៃ ត្រូវបានទម្លាក់មកនៅត្រឹម៧,៥លានតោន។ សូមបញ្ជាក់ថា នៅក្នុងឆ្នាំ២០២៥ ប្រទេសថៃ នាំចេញអង្ករបានរហូតដល់ទៅជិត១០លានតោនជាមួយទំហំទឹកប្រាក់៦,៨ពាន់លានដុល្លារអាម៉េរិក៕
ដោយ: តែម សុខុម
