តើកម្ពុជា គួរឆ្លើយតបបែបណាក្រោយថៃ នៅតែបំពានបទឈប់បាញ់ និងមិនស្ដាប់អាម៉េរិក?

លោកបណ្ឌិត យង់ ពៅ អ្នកជំនាញភូមិសាស្រ្តនយោបាយ យល់ឃើញថា នៅក្នុងស្ថានភាពនេះ កម្ពុជា មិនមានជម្រើសអ្វីក្រៅពីការការពារខ្លួន និងបង្កើនស្មារតីរួមសាមគ្គីជាតិ ឱ្យបានកាន់តែខ្លាំងនោះទេ។ បន្ថែមលើនេះ កម្ពុជា ត្រូវពង្រឹងការងារការទូតឱ្យកាន់តែសកម្ម ដើម្បីពន្យល់បណ្ដាប្រទេសជាដៃគូអំពីសកម្មភាពឈ្លានពានរបស់ថៃ មកលើកម្ពុជា និងការផ្សព្វផ្សាយព័ត៌មានឱ្យបានទូលំទូលាយ ព្រមទាំងស្នើទៅក្រុមប្រឹក្សាសន្តិសុខអង្គការសហប្រជាជាតិ ឱ្យកោះប្រជុំជាបន្ទាន់ ដើម្បីផ្ទៀងផ្ទាត់សភាពការណ៍ដែលភាគីថៃ រំលោភលើកិច្ចព្រមព្រៀងដែលមានសហរដ្ឋអាម៉េរិកជាសាក្សី។ បើតាមលោកបណ្ឌិត យង់ ពៅ ប្រសិនបើមិនមានអន្តរាគមន៍បន្ទាន់ពីអន្តរជាតិទេ នោះជម្លោះដែលបង្កឡើងដោយភាគីថៃនឹងរាលដាលដល់តំបន់ និងឈានទៅរង្គោះរង្គើដល់សណ្ដាប់ធ្នាប់ពិភពលោក។

​ដោយឡែក លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវកត់សម្គាល់ឃើញថា ភាគីថៃ កំពុងតែគឃ្លើនដោយមិនស្ដាប់មេដឹកនាំអាស៊ាន និងសហរដ្ឋអាម៉េរិក នោះឡើយ ហើយក៏កំពុងចាកឆ្ងាយពីគន្លងច្បាប់អន្តរជាតិ ខណៈមកដល់ពេលនេះ ប្រទេសដែលកំពុងបង្កអរិភាពមកលើប្រទេសជិតខាងមួយនេះមិនមានក្បាលម៉ាស៊ីនដឹកនាំច្បាស់លាស់នោះទេ។ ការណ៍នេះត្រូវបានអ្នកជំនាញរូបនេះលើកឡើងថា អន្តរជាតិ គួរដាក់សម្ពាធទៅលើប្រទេសថៃ ដើម្បីរក្សាសណ្ដាប់ធ្នាប់ពិភពលោក។ បើតាមលោក សេក សុជាតិ នៅក្នុងស្ថានភាពនេះ កម្ពុជា គួរប្ដឹងស្ដេចថៃ ដែលជាប្រមុខរដ្ឋទៅតុលាការអន្តរជាតិ ដើម្បីឱ្យទទួលខុសត្រូវចំពោះសកម្មភាពឈ្លានពានមកលើកម្ពុជា។

​សូមបញ្ជាក់ថា ​​យោធាល្មោភសង្គ្រាមថៃ បានប្រព្រឹត្តអំពើខុសច្បាប់ជាច្រើន ដោយបានប្រើប្រាស់កាំភ្លើងធុនធំគ្រប់ប្រភេទ ផ្សែងពុល និងយន្តហោះចម្បាំង F-16 បាញ់ស្រោចមកលើទីតាំងរស់នៅរបស់ពលរដ្ឋស៊ីវិល និងហេដ្ឋារចនាសម្ព័ន្ធជាច្រើនរបស់កម្ពុជា។ ទង្វើនេះ វាផ្ទុយពីអ្វីដែលលោក ដូណាល់ ត្រាំ ប្រធានាធិបតី អាម៉េរិក បានអះអាងនៅលើបណ្តាញសង្គមក្រោយកិច្ចពិភាក្សាជាមួយមេដឹកនាំទាំងពីរ ដែលថា ភាគីទាំងពីរបានឯកភាពគ្នាបញ្ឈប់ការបាញ់ប្រហារ និងវិលទៅរកកិច្ចព្រមព្រៀងបទឈប់បាញ់ឡើងវិញ។ បើមិនមានអ្វីប្រែប្រួលទេ រដ្ឋមន្ត្រីការបរទេសអាស៊ាន នឹងបើកកិច្ចប្រជុំថ្ងៃទី ១៦ ខែធ្នូ ឆ្នាំ២០២៥ ដើម្បីបង្ហាញនូវរបាយការណ៍ផ្កាយរណប ពន្យល់អំពីស្ថានភាពជាក់ស្តែងនៅបន្ទាត់ព្រំដែនកម្ពុជា ថៃ៕

អត្ថបទ៖ បូ ដូឡា​