ប្រមុខការទូតថៃព្យាយាមប្រឌិតព័ត៌មានថា តំបន់ដែលយោធាថៃកំពុងកាន់កាប់ក្នុងទឹកដីកម្ពុជាស្ថិតនៅលើទឹកដីរបស់ខ្លួន

ការអំពាវនាវ និងចោទប្រកាន់ដោយគ្មានមូលដ្ឋានរបស់ប្រមុខការទូតថៃបែបនេះធ្វើឡើងនៅក្នុងកិច្ចសម្ភាសន៍ជាមួយទីភ្នាក់ងារព័ត៌មានបារាំង FRANCE 24 កាលពីពេលថ្មីៗនេះ។

​ ទោះបីជាកម្ពុជា និងថៃបានចុះកិច្ចព្រមព្រៀងបទឈប់បាញ់រួមគ្នាកាលពីថ្ងៃទី២៧ ខែធ្នូ ឆ្នាំ២០២៥ តែលោក ស៊ីហាសាក់ ភួងកេតកែវ រដ្ឋមន្ត្រីការបរទេសថៃបានទទួលស្គាល់ថា កិច្ចព្រមព្រៀងឈប់បាញ់នេះនៅតែស្ថិតក្នុងភាពផុយស្រួយ ខណៈកិច្ចព្រមព្រៀងមុន ដែលសម្របសម្រួលដោយសហរដ្ឋអាម៉េរិក កាលពីខែតុលា បានដួលរលំទៅវិញក្នុងរយៈពេលត្រឹមតែប៉ុន្មានសប្តាហ៍ប៉ុណ្ណោះ។

នៅពេលអ្នកសារព័ត៌មានរបស់ FRANCE 24 សួរដេញដោលអំពីការអះអាងរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលថាថៃកំពុងកាន់កាប់ទីតាំងយ៉ាងជ្រៅក្នុងទឹកដីកម្ពុជា លោក ស៊ីហាសាក់ បានព្យាយាមឆ្លើយពង្វាង និងការពារខ្លួនដោយគ្មានមូលដ្ឋានថា ទឹកដីដែលយោធាថៃកំពុងកាន់កាប់ក្រោយបទឈប់បាញ់នោះ គឺស្ថិតនៅលើទឹកដីថៃ ដែលកម្ពុជាបានគ្រប់គ្រងជាយូរមកហើយ ជាពិសេសពេលដែលជនភៀសខ្លួនកម្ពុជាបានចូលទៅប្រទេសថៃពេលកម្ពុជាមានជម្លោះផ្ទៃក្នុង។

ទន្ទឹមនឹងព្យាយាមបកស្រាយលាងខ្លួន ប្រមុខការទូតថៃរូបនេះ បានឆ្លៀតចោទប្រកាន់កម្ពុជាទាំងគ្មានមូលដ្ឋានថា ភាគីកម្ពុជាជាអ្នកធ្វើឱ្យជម្លោះព្រំដែនកម្ពុជា-ថៃ រីករាលដាលទៅជាកម្រិតអន្តរជាតិ ហើយថា ភាគីទាំងពីរត្រូវតែជៀសវាងនូវរាល់សកម្មភាពទាំងឡាយណា ដែលបង្កជាការញុះញង់។

អ្នកការទូតថៃរូបនេះបានបន្តថា លោកកំពុងរក្សាទំនាក់ទំនងជាមួយសមភាគីកម្ពុជាតាមរយៈប្រព័ន្ធ WhatsApp ដើម្បីទប់ស្កាត់កុំឱ្យស្ថានការណ៍រីកធំឡើង ដោយលោកសង្កត់ធ្ងន់ថា ជម្លោះកាន់តែខ្លាំង ការខាត់បង់ក៏កាន់តែច្រើនដែរ៕

អត្ថបទៈ សួន ឡង់ទី. រូបភាពៈ ឯកសារបរទេស