លោក ត្រាំ ព្រមានទារថ្លៃជំងឺចិត្តចំនួន២៣០លានដុល្លារពីក្រសួងយុត្តិធម៌អាម៉េរិក ដែលបានស៊ើបអង្កេតលើរូបលោក

កាសែត New York Times បានរាយការណ៍ថា កាលពីឆ្នាំ២០២៣ និងឆ្នាំ២០២៤ លោក ដូណាល់ ត្រាំ ប្រធានាធិបតីអាម៉េរិកបានដាក់ពាក្យប្តឹងប្រឆាំងនឹងក្រសួងយុត្តិធម៌អាម៉េរិក មុនពេលលោកបានជាប់ឆ្នោតក្លាយជាប្រធានាធិបតីនៅអាណត្តិនេះ។ ពាក្យបណ្ដឹងទី១លោក ត្រាំ ប្តឹងទាមទារសំណងជំងឺចិត្តពីបទរំលោភសិទ្ធិ ក្រោយក្រសួងនេះបានចោទប្រកាន់ និងស៊ើបអង្កេតលើរូបលោកពាក់ព័ន្ធការជ្រៀតជ្រែករបស់រុស្ស៊ីក្នុងការបោះឆ្នោតនៅឆ្នាំ២០១៦។

ចំណែកពាក្យបណ្តឹងទី២ ផ្តោតលើសំណុំរឿងឯកសារសម្ងាត់របស់លោក ត្រាំ ដែលត្រូវបានតុលាការទម្លាក់ចោលអត់ចាត់ការ បន្ទាប់ពីលោកបានជាប់ឆ្នោតជាថ្មី រួមទាំងការចោទប្រកាន់ទីភ្នាក់ងារ FBI ពីបទរំលោភលើឯកជនភាពរបស់ លោក នៅពេលពួកគេបានឆែកឆេរលំនៅឋានរបស់លោកនៅរដ្ឋហ្វ្ល័ររីដា ក្នុងឆ្នាំ២០២២។

ថ្លែងក្នុងបទសម្ភាសជាមួយទូរទស្សន៍ CNN កាលពីថ្ងៃអង្គារ លោក ត្រាំ បាននិយាយថា ពេលនេះអាចនឹងតាមទាមទារប្រាក់សំណងជំងឺចិត្តពីក្រសួងយុត្តិធម៌ ចំពោះការស៊ើបអង្កេតលើរូបលោក ដែលមិនទទួលបានជោគជ័យក្នុងពេលកន្លងមកនេះ ប៉ុន្តែលោកមិនបានបញ្ជាក់ក្នុងបទសម្ភាសនេះថាតើចំនួនប្រាក់ប៉ុន្មានដែលលោកនឹងទាមទារនោះទេ។ ប៉ុន្តែបើតាមការចុះផ្សាយកាសែត New York Times លោក ត្រាំ កំពុងស្វែងរកការទាមទារប្រាក់សំណងជំងឺចិត្តចំនួន២៣០លានដុល្លារ ហើយថា ការទូទាត់សំណងជំងឺចិត្តនេះអាចត្រូវបានយល់ព្រមដោយមន្ត្រីក្រសួងយុត្តិធម៌ ដែលការពារលោក ត្រាំ ឬអ្នកដែលនៅជុំវិញលោកក្នុងពេលស៊ើបអង្កេតនោះ៕

ដោយ៖ សុខ មង្គល