កម្មវិធីស្បៀងអាហារពិភពលោក នៃអង្គការសហប្រជាជាតិ បានព្រមានថា មនុស្សរហូតដល់ទៅ ៤៥លាននាក់បន្ថែមទៀតអាចប្រឈមមុខនឹងភាពស្រេកឃ្លានធ្ងន់ធ្ងរ ដែលធ្វើឱ្យចំនួនជនស្រេកឃ្លានសរុបកើនឡើងរហូតដល់ប្រមាណ៣៦៣លាននាក់នៅទូទាំងពិភពលោក។ វិបត្តិនេះ កំពុងជំរុញដោយសារការរាំងស្ទះផ្លូវដឹកជញ្ជូនសំខាន់ៗដូចជា ច្រកសមុទ្រ Hormuz និងសមុទ្រក្រហមជាដើម។ ការរាំងស្ទះទាំងនេះកំពុងជំរុញឱ្យថាមពល ប្រេងឥន្ធនៈ និងជីកសិកម្មហក់ឡើងថ្លៃខ្លាំង ហើយជាលទ្ធផលវានឹងធ្វើស្បៀងអាហារហក់ឡើងថ្លៃនៅទូទាំងពិភពលោក។
តាមការរំពឹងទុកថា តំបន់ក្រីក្របំផុត ជាពិសេសនៅក្នុងតំបន់មួយចំនួននៃទ្វីបអាហ្វ្រិក និងអាស៊ី ដែលពឹងផ្អែកខ្លាំងលើការនាំចូល នឹងរងផលប៉ះពាល់ខ្លាំងជាងគេ។ ជាក់ស្ដែង ស្បៀងអាហារជាមូលដ្ឋាននៅក្នុងប្រទេសនានា ដូចជាស៊ូដង់ និងសូម៉ាលី ជាដើម កំពុងហក់ឡើងថ្លៃយ៉ាងខ្លាំង។
អង្គការសហប្រជាជាតិ បានព្រមានថា ប្រសិនបើសង្គ្រាមនៅអ៊ីរ៉ង់ នៅតែបន្តអូសបន្លាយពេលវែង វាអាចជះផលប៉ះពាល់ខ្លាំងទូទាំងពិភពលោក ដោយប៉ះពាល់ដល់គ្រួសារងាយរងគ្រោះបំផុត និងធ្វើឱ្យអសន្តិសុខស្បៀងកាន់តែធ្ងន់ធ្ងរទៅៗធ្លាយហួសពីតំបន់មជ្ឈិមបូព៌ា។
យោងតាមទិន្នន័យពីការិយាល័យឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន ដែលជាផ្នែកមួយ នៃអង្គការសហប្រជាជាតិ គិតត្រឹមថ្ងៃទី១២ ខែមីនា មានប្រជាជនអ៊ីរ៉ង់រហូតដល់ទៅ៣,២ លាននាក់បានរត់ភៀសសឹកនៅក្នុងប្រទេសអ៊ីរ៉ង់ ខណៈដែលសង្គ្រាមផ្ទុះកាន់ខ្លាំងក្លាពីមួយថ្ងៃទៅមួយថ្ងៃ។ ទោះជាយ៉ាងណា គ្មានទិន្ន័យផ្លូវការអំពីជនភៀសសឹកនៅអ៊ីស្រាអែលនោះទេ៕
ដោយ: តែម សុខុម
