ថ្នាក់ដឹកនាំអគ្គនាយកដ្ឋានពន្ធដារអះអាងថា ការពន្យារពេលអនុវត្តយកពន្ធអាករលើតម្លៃបន្ថែមនេះ គឺដើម្បីទុកពេលក្រុមហ៊ុន សហគ្រាស និងអ្នករកស៊ីតាមអេឡិចត្រូនិក ដែលជាប់កាតព្វកិច្ចបង់ពន្ធ សិក្សាស្វែងយល់ពីយន្តការនេះឲ្យបានច្បាស់លាស់។ ជាមួយគ្នានេះ អគ្គនាយកដ្ឋានពន្ធដារ ក៏ព្រមានចាត់វិធានការតាមផ្លូវច្បាប់ និងផាកពិន័យចំពោះក្រុមហ៊ុន សហគ្រាស និងបុគ្គលណា ដែលបន្តរកស៊ីដោយគ្មានលិខិតអនុញ្ញាតផងដែរ។
ឯកឧត្តម កែន សម្បត្តិ អគ្គនាយករងនៃអគ្គនាយកដ្ឋានពន្ធដារបានមានប្រសាសន៍ថា អគ្គនាយកដ្ឋានពន្ធដារនឹងចាប់អនុវត្តយកពន្ធអាករលើតម្លៃបន្ថែម សម្រាប់ក្រុមហ៊ុន សហគ្រាស និងនិវាសនបុគ្គលធ្វើពាណិជ្ជកម្មតាមប្រព័ន្ធអេឡិចត្រូនិកចាប់ពីថ្ងៃទី១ ខែមេសា ឆ្នាំ២០២២។ តាមគម្រោងយន្ធការយកពន្ធអាករលើតម្លៃបន្ថែមនេះ អគ្គនាយករដ្ឋពន្ធដារត្រូវចាប់អនុវត្តពីថ្ងៃទី១ ខែមករា ឆ្នាំ២០២២ តទៅ តែត្រូវបានពន្យារពេលអនុវត្តរហូតដល់ខែមេសា ក្រោយមានការអន្តរាគមន៍ពីក្រសួងសេដ្ឋកិច្ច និងហិរញ្ញវត្ថុ។ ឯកឧត្តមបានគូសបញ្ជាក់ថា ការពន្យារពេលនេះគឺដើម្បីទុកឲ្យក្រុមហ៊ុន សហគ្រាស និងបុគ្គលដែលរកស៊ីលើវិស័យនេះ បានសិក្សាពីយន្តការនេះឲ្យបានស៊ីជម្រៅ និងច្បាស់លាស់បន្ថែមទៀត។
គោលបំណងនៃការដាក់ឲ្យអនុវត្តកម្មវិធីយកពន្ធអាករលើតម្លៃបន្ថែមខាងលើ គឺដើម្បីរួមចំណែកកៀរគរចំណូលពន្ធជូនរដ្ឋបន្ថែម ក្រោយអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុសង្កេតឃើញថា ក្រុមហ៊ុន សហគ្រាស និងបុគ្គលរកស៊ីតាមប្រព័ន្ធអេឡិចត្រូនិកមានការកើនឡើងនាពេលបច្ចុប្បន្ន។ នេះបើតាមការលើកឡើងរបស់ឯកឧត្តម កែន សម្បត្តិ ដែលបានបន្ថែមថា ការកើនឡើងចំនួនអ្នករកស៊ីតាមអនឡាញនេះ គឺបន្ទាប់ពីមានការរីកចម្រើនខ្លាំងនៃប្រព័ន្ធបច្ចេកវិទ្យានៅសតវត្សរ៍ទី២១ នេះ។
អត្ថបទគួរអាន
ក្នុងអំឡុងនៃការពន្យារពេលនេះ ឯកឧត្តម កែន សម្បត្តិ ស្នើឲ្យក្រុមហ៊ុន សហគ្រាស ឬបុគ្គល ដែលរកស៊ីតាមប្រព័ន្ធអេឡិចត្រូនិក ដែលមានផលរបរចាប់ពី២៥០លានរៀល រួសរាន់មកចុះបញ្ជីអាករលើតម្លៃបន្ថែមឲ្យបានមុនថ្ងៃទី១ ខែមេសា ឆ្នាំ២០២២ បើមិនចង់រងការពិន័យ ឬចាត់វិធានការតាមផ្លូវច្បាប់។
ពាក់ព័ន្ធការធ្វើពាណិជ្ជកម្មតាមប្រព័ន្ធអេឡិចត្រូនិកនេះ ក្រសួងពាណិជ្ជកម្មកម្ពុជាកាលពីពេលថ្មីៗបានសម្រេចពន្យារពេលចុះបញ្ជី និងផាកពិន័យសម្រាប់សហគ្រាសឯកបុគ្គល នីតិបុគ្គល និងសាខាក្រុមហ៊ុនបរទេសរហូតដល់ថ្ងៃទី១ ខែមីនា ឆ្នាំ២០២២ផងដែរ។ ក្រសួងពាណិជ្ជកម្មអះអាងថា ការពន្យារពេលនេះក្រោយក្រសួងសង្កេតឃើញក្រុមហ៊ុន សហគ្រាស និងបុគ្គលរកស៊ីតាមប្រព័ន្ធអេឡិចត្រូនិកមួយចំនួន កំពុងរៀបចំឯកសារ ដើម្បីស្នើសុំលិខិតអនុញ្ញាត ឬអាជ្ញាបណ្ណពាណិជ្ជកម្មតាមប្រព័ន្ធអេឡិចត្រូនិក៕
None
