វៀតណាម រកឃើញកំណប់រ៉ែប្រេងដ៏ធំបំផុតមិនធ្លាប់មាននៅអាស៊ាននៅ២ទសវត្សរ៍មកនេះ

ក្រុមហ៊ុនផលិតប្រេងអាម៉េរិក ទើបរកឃើញកំណប់រ៉ែប្រេងនៅវៀតណាម ដែលអាចជាកំណប់រ៉ែប្រេងដ៏ធំបំផុតនៅអាស៊ានក្នុងពេល២ទសវត្សរ៍មកនេះ។ ក្រុមហ៊ុនផលិតប្រេងអាម៉េរិក Murphy Oil បានខួងអណ្តូងរ៉ែប្រេង ដើម្បីវាយតម្លៃ ហើយតាការប៉ាន់ប្រមាណ ដែលបានធ្វើបច្ចុប្បន្នភាពបង្ហាញថា ធនធានរ៉ែប្រេងដែលអាចខួងយកមកបានអាចលើសពី៤៣០លានបារ៉ែល ដែលខ្ពស់ជាងការព្យាករកាលពីលើកមុនៗ។

លទ្ធផលតេស្តសាកល្បងបានបង្ហាញថា អាងស្តុករ៉ែប្រេងដ៏ធំនេះអាចផលិតប្រេងដែលមានគុណភាពខ្ពស់បានប្រមាណ៦ពាន់បារ៉ែលក្នុងមួយថ្ងៃ។ ការធ្វើតេស្តបន្ថែមទៀតកំពុងដំណើរការ ហើយនឹងត្រូវការអណ្តូងរ៉ែប្រេងជាច្រើនទៀត ដើម្បីអាចបញ្ជាក់បានពីទំហំពិតប្រាកដចុងក្រោយនៃធនធានរ៉ែប្រេងនេះ។

ក្រុមហ៊ុនប្រឹក្សាយោបល់ផ្នែកថាមពល Wood Mackenzie បានដាក់ចំណាត់ថ្នាក់វាលរ៉ែប្រេង Hai Su Vang ថា ជាកំណប់រ៉ែធំបំផុតទី៣ នៅក្នុងតំបន់អាស៊ានចាប់តាំងពីឆ្នាំ២០០០ មក បន្ទាប់ពីការរកឃើញធំៗនៅក្នុងប្រទេសឥណ្ឌូនេស៊ី និងម៉ាឡេស៊ី។

ការរកឃើញនេះអាចជួយប្រទេសវៀតណាម ប៉ះប៉ូវការដាំក្បាលចុះជាយូរមកហើយនូវការផលិតប្រេង ដែលបានធ្លាក់ចុះយ៉ាងខ្លាំងក្នុងពេលពីរទសវត្សរ៍កន្លងមកនេះ។ ប្រទេសវៀតណាម បានក្លាយជាអ្នកនាំចូលប្រេងទាំងស្រុង ហើយបច្ចុប្បន្នពឹងផ្អែកយ៉ាងខ្លាំងទៅលើការផ្គត់ផ្គង់ពីបរទេស។

ទោះជាយ៉ាងណា ក្រុមអ្នកវិភាគព្រមានថា ដំណើរការបទប្បញ្ញត្តិដែលមានភាពយឺតយ៉ាវ និងតម្លាភាពទិន្នន័យនៅមានកម្រិតអាចធ្វើឱ្យការអភិវឌ្ឍរ៉ែប្រេងត្រូវពន្យារពេល ទោះបីជាកំណែទម្រង់ច្បាប់ថ្មីៗនេះមានគោលបំណងទាក់ទាញវិនិយោគិនបន្ថែមទៀតក៏ដោយ៕

ដោយ: តែម សុខុម