លោក អុំ ឈុន ប្រធានការិយាល័យរដ្ឋបាលសហគមន៍អ្នកផលិតអំបិលខេត្តកំពត-កែប បានលើកឡើងថា ឆ្នាំនេះ ការផលិតអំបិលហាក់ដូចជារងគ្រោះធំ ជាងឆ្នាំកន្លងទៅ ពោលគឺនៅប៉ុន្មានខែចុងក្រោយនេះ មានភ្លៀងធ្លាក់ច្រើនខុសពីធម្មតាពោល ក្នុងខែខ្លះ មានភ្លៀងធ្លាក់ ៣ ទៅ៤ ដងក៏មាន ជាហេតុបានធ្វើឲ្យគ្មានអំបិលប្រមូលផលដូចរាល់ឆ្នាំនោះឡើយ។ តួយ៉ាង ធ្លាប់តែមកដល់មេសារៀងរាល់ឆ្នាំ តែងតែមានអំបិលប្រមូលផលរាប់ពាន់ ឬម៉ឺនតោន តែខែមេសាឆ្នាំនេះ នៅមិនទាន់មានអំបិលប្រមូលផលនៅឡើយទេ ខណៈដែលឆ្នាំមុនអាកាសធាតុក៏មិនសូវអំណោយផលដែរ ប៉ុន្ដែ នៅអាចប្រមូលផលបានជាង ២០,៥ ម៉ឺនតោនដែរ។
ទោះយ៉ាងណា លោក អ៊ុំ ឈុន បានគូសបញ្ជាក់ថា អំបិលនៅក្នុងស្ដុកបច្ចុប្បន្ននេះ មានប្រមាណ ៥ម៉ឺនតោនដែរ ដែលអាចផ្គត់ផ្គង់ទប់ទល់ទីផ្សារដល់ខែ ១០ ឬខែ១១ខាងមុខនេះ ខណៈដែលតម្រូវការអំបិលក្នុងស្រុកមានប្រមាណ១០ម៉ឺនតោន ក្នុង១ឆ្នាំៗ។
តំណាងសហគមន៍អ្នកផលិតអំបិលខេត្តកំពត-កែប រូបនេះ បានបន្ថែមទៀតថា លោកនៅមិនទាន់ប្រាកដនៅឡើយទេ ថា តើកម្ពុជាអាចនឹងត្រូវការអំបិលនាំចូលពីប្រទេសជិតខាងក្នុងកម្រិតចំនួនប៉ុន្មាននៅឡើយទេ ប៉ុន្ដែ លោកថា ប្រទេសវៀតណាមក៏ទំនងជាមិនមានទិន្នផលអំបិលច្រើនដែរ ដោយសារតែបញ្ហាអាកាសធាតុដូចគ្នានឹងកម្ពុជានេះ បើមាន គឺមានតែអំបិលពីប្រទេសថៃប៉ុណ្ណោះ។
អត្ថបទគួរអាន!
តម្លៃអំបិលលើទីផ្សារបានចាប់ផ្ដើមឡើងថ្លៃគួរឲ្យកត់សម្គាល់ ពោលគឺមកទល់ពេលនេះ អំបិល១បាវទម្ងន់៥០គីឡូក្រាមមានតម្លៃ ១៥ ០០០ រៀល ខណៈដែលកាលពីពេលកន្លងទៅមានត្រឹមតែ ១២ ០០០ រៀល ទៅ ១៣ ០០០ រៀលប៉ុណ្ណោះ។ ទាក់ទិននឹងតម្លៃអំបិលឡើងថ្លៃនេះដែរ លោក អ៊ុំ ឈុន បានបញ្ជាក់ដែរថា តម្លៃអំបិលនឹងមិនអាចឡើងខ្ពស់ពេកនោះទេ ព្រោះថា បើឡើងខ្ពស់ពេក នោះនឹងធ្វើឲ្យអំបិលពីប្រទេសជិតខាងសម្រុកនាំចូលមកលក់នៅក្នុងទីផ្សារកម្ពុជា ដែលធ្វើឲ្យយើងលំបាកប្រកួតប្រជែង។
តើអ្នកបានអានអត្ថបទនេះហើយឬនៅ?
សូមជម្រាបថា ផ្ទៃដីខេត្តកំពត និងកែប គឺជាទីតាំងផលិតអំបិលតែមួយគត់សម្រាប់ការផ្គត់ផ្គង់ទូទាំងប្រទេស ដែលមានផ្ទៃដីផលិតអំបិលជាង ៤០ ៥០០ ហិកតា ដោយក្នុងនោះ ផ្ទៃដីមួយហិកតា អាចមានសមត្ថភាពផលិតអំបិលបានជាមធ្យមចំនួន២០តោន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
