វៀតណាម គ្រោងដាក់ចេញទិដ្ឋាការពិសេសចំនួនពីរ ដើម្បីទាក់ទាញអ្នកវិនិយោគ និងអ្នកមានទ្រព្យធន

ដើម្បីប្រកួតប្រជែងជាមួយបណ្តាប្រទេសនៅតំបន់អាស៊ីអាគ្នេយ៍ រដ្ឋាភិបាលវៀតណាម គ្រោងដាក់ចេញគោលនយោបាយទិដ្ឋាការមាស និងទិដ្ឋាការចូលនិវត្តន៍ សំដៅទាក់ទាញទុនវិនិយោគ និងអ្នកមានទ្រព្យសម្បត្តិចូលមកកាន់ប្រទេសខ្លួន។ គម្រោងចេញទិដ្ឋាការមាសរយៈពេល១០ឆ្នាំសម្រាប់មហាសេដ្ឋីរបស់វៀតណាមនេះ ទទួលការគាំទ្រយ៉ាងខ្លាំងពីអ្នកប្រកបរបរក្នុងវិស័យទេសចរណ៍។

ពាក់ព័ន្ធនឹងផែនការចេញទិដ្ឋាការមាសនេះ ក្រុមប្រឹក្សាទេសចរណ៍វៀតណាម បានដាក់សំណើរទៅលោក ផាម មិញជិញ នាយករដ្ឋមន្រ្តីវៀតណាម រួចហើយ ដើម្បីប្រែក្លាយវៀតណាម ពីគោលដៅទេសចរណ៍រយៈពេលខ្លីទៅជាគោលដៅអចិន្ត្រៃយ៍សម្រាប់ភ្ញៀវទេសចរ អ្នកជំនួញ និងជនបរទេស ដែលស្វែងរកទាំងឱកាសលំហែកាយ និងវិនិយោគនៅឆាកជីវិតចុងក្រោយរបស់ពួកគេ។

ពលរដ្ឋវៀតណាម មួយចំនួន បានលើកឡើងថា វៀតណាម មិនទាន់មានធនធានគ្រប់គ្រាន់សម្រាប់ផ្តល់ដល់មហាសេដ្ឋីនៅឡើយទេ ប៉ុន្តែអ្វីដែលវៀតណាម កំពុងមានសព្វថ្ងៃនេះ គឺវាគ្រប់គ្រាន់អាចផ្តល់អ្វីគ្រប់យ៉ាង ដែលអ្នកចូលនិវត្តន៍បរទេស ពិសេសលោកខាងលិច ចង់បាន​។ ពលរដ្ឋវៀតណាម ជឿជាក់ថា សេដ្ឋីពួកលោកខាងលិចដូចជាសហរដ្ឋអាម៉េរិក នឹងមិនជ្រើសរើសអាស៊ីអាគ្នេយ៍នោះទេ ប៉ុន្តែសម្រាប់អ្នកចូលនិវត្តន៍ គឺអាចមានច្រើន ដូច្នេះរដ្ឋាភិបាលវៀតណាម គួរតែគិតគូរលើបញ្ហានេះ៕

ដោយៈ សរ សុជាតិ