លោក ផៃជីត វីប៊ុនតាណាសាន (Phaichit Viboontanasarn) អគ្គលេខាធិការសភាពាណិជ្ជកម្មថៃនៅប្រទេសចិនបានរិះគន់រដ្ឋាភិបាលថៃថា ហាក់ខ្វះសមត្ថភាពក្នុងការរៀបចំយុទ្ធសាស្ត្រពាណិជ្ជកម្ម និងទេសចរណ៍ជាមួយប្រទេសចិន ដែលជាទីផ្សារដ៏ធំប្រចាំតំបន់អាស៊ី។ ការរិះគន់របស់អ្នកជំនាញថៃរូបនេះ ធ្វើឡើងក្រោយការនាំចេញទំនិញរបស់ថៃទៅចិននៅមានកម្រិត ហើយទេសចរណ៍ថៃកំពុងបាត់បង់ទំនុកចិត្តពីជនជាតិចិន។ អ្នកជំនាញរូបនេះបានចាត់ទុកមួយទសវត្សរ៍កន្លងទៅ ជាទសវត្សរ៍នៃការខាតបាត់បង់សម្រាប់ប្រទេសថៃ ។
ទន្ទឹមនឹងរិះគន់ អគ្គលេខាធិការសភាពាណិជ្ជកម្មថៃរូបនេះបានគូសបញ្ជាក់ថា ថៃបានបរាជ័យក្នុងការពង្រឹងវិស័យពាណិជ្ជកម្មរបស់ខ្លួន ដោយពេលនេះថៃអាចផលប្រយោជន៍ពីទីផ្សារចិនក្នុងចំណែកតិចតួចប៉ុណ្ណោះ បើទោះពីទំហំទីផ្សារចិនធំជាងទីផ្សារថៃរហូតដល់៣៥ដងក៏ដោយ។ លោកបានសង្កត់ធ្ងន់ថា ថៃបានខ្ជះខ្ជាយពេលវេលាជាងមួយទសវត្សរ៍ ដែលមិនបានរៀបចំយុទ្ធសាស្រ្ត ដើម្បីដណ្តើមចំណែកទីផ្សារចិន។
អ្នកជំនាញរូបនេះបានអះអាងថា ថៃបានបរាជ័យក្នុងការតាមឱ្យទាន់ការផ្លាស់ប្តូរយ៉ាងឆាប់រហ័សរបស់ប្រទេសចិនលើប្រព័ន្ធបច្ចេកវិទ្យា។ លោកបានចាត់ទុកភាពកម្សោយនេះបានធ្វើឲ្យពលរដ្ឋចិនមើលមកលើប្រទេសថៃថា ហាក់ប្រើប្រាស់យុទ្ធសាស្ត្រលក់ និងចែកចាយទំនិញហួសសម័យ។ លើសពីនេះ ថៃមិនបានវិនិយោគជាប់លាប់លើការអភិវឌ្ឍផលិតផលថ្មីៗ និងខ្វះអត្តសញ្ញាណម៉ាកយីហោដ៏រឹងមាំផងដែរ។
ក្រៅពីបញ្ហាពាណិជ្ជកម្ម ទីផ្សារទេសចរថៃសម្រាប់ជនជាតិចិន ក៏កំពុងជួបបញ្ហាប្រឈមផងដែរ ដោយពេលនេះភ្ញៀវទេសចរចិនបានបាត់បង់ទំនុកចិត្តលើរដ្ឋាភិបាលថៃក្នុងការធានាសន្តិសុខ និងសុវត្ថិភាពជូនពួកគេ បន្ទាប់ពីមានករណីបាញ់រះនៅកណ្តាលទីក្រុងបាងកក និងការចាប់ជំរិតតារាសម្តែងរបស់ចិនជាដើម។ បច្ចុប្បន្នកេរ្តិ៍ឈ្មោះរបស់ប្រទេសថៃសម្រាប់អ្នកទេសចរចិនមានតែរូបភាពនៃការក្លែងបន្លំ ការឃុំខ្លួនខុសច្បាប់ និងឧក្រិដ្ឋកម្មតាមអ៊ីនធឺណិតតែប៉ុណ្ណោះ៕
ដោយៈ សរ សុជាតិ
