រដ្ឋមន្ត្រីឧស្សាហកម្មកាណាដាលោក Francois Philippe Champagne បានប្រាប់អ្នកយកព័ត៌មាននៅទីក្រុង Ottawaក្នុងប្រទេសកាណាដាថា ខ្លួនបានសម្រេចដកសេវាកម្មបណ្តាញ 5G របស់ក្រុមហ៊ុន Huawei និង ZTEរបស់ចិន ចេញពីប្រទេសរបស់ខ្លួន ខណៈអតិថិជនដែលកំពុងប្រើប្រាស់សេវាកម្ម និង ក្រុមហ៊ុនផ្តល់សេវាកម្មទាំងពីរនេះ តម្រូវឱ្យបញ្ឈប់ប្រតិបត្តការណ៍បណ្តាញ 5G ចាប់ពីចេញសេចក្តីប្រកាសព័ត៌មាននេះតទៅ។
លោក Francois-Philippe បានបន្ថែមថា ក្រុមហ៊ុន Huawei និង ZTE ត្រូវតែដកបណ្តាញ 5G ចេញពីប្រទេសកាណាដាចាប់ពី ខែ មិថុនា ឆ្នាំ ២០២៤ ជាកំហិត ដោយមិនទទួលបានសំណងអ្វីទាំងអស់។ ដោយឡែក សម្រាប់សេវាកម្មបណ្តាញ 4G របស់ក្រុមហ៊ុនទាំងពីនេះត្រូវតែដកចេញនៅចុងឆ្នាំ ២០២៧ ផងដែរ។
ទន្ទឹមនឹងនេះ រដ្ឋមន្ត្រីក្រសួងសុវត្ថិភាពសាធារណៈកាណាដា លោក Marco Mendicino បានអះអាងថា ប្រទេសកាណាដានឹងធ្វើសេចក្ដីព្រាងច្បាប់ថ្មី ដើម្បីការពារហិរញ្ញវត្ថុ ទូរគមនាគមន៍ ថាមពល និង ហេដ្ឋារចនាសម្ព័ន្ធដឹកជញ្ជូនសំខាន់ៗពីការគំរាមកំហែងតាមអ៊ីនធឺណិត។
អត្ថបទ
យ៉ាងណាមិញ ការសម្រេចចិត្តរបស់ប្រទេសកាណាដាក្នុងការដកសេវាកម្មរបស់ក្រុមហ៊ុន Huawei និង ZTE របស់ចិនចេញ ត្រូវបានគេមើលឃើញថា សេចក្តីប្រកាសនេះ ធ្វើឡើងនៅចំពេលដែលប្រទេសលោកខាងលិច រួមទាំងកាណាដាផងដែរនោះ កំពុងមានភាពតានតឹងផ្នែកការទូតកាន់តែខ្លាំងជាមួយប្រទេសចិន។
តួរយ៉ាង សមាជិកនៃបណ្តាញ Five Eyes ដែលរួមមានកាណាដា សហរដ្ឋអាមេរិក អង់គ្លេស អូស្ត្រាលី និងនូវែលសេឡង់ ក៏បានហាមឃាត់ការធ្វើប្រតិបត្តិការណ៍របស់ក្រុមហ៊ុន Huawei និង ZTE ដូចគ្នាផងដែរ។
អ្នកនាំពាក្យស្ថានទូតចិនប្រចាំប្រទេសកាណាដា បាននិយាយថា ការព្រួយបារម្ភផ្នែកសន្តិសុខ គឺជា លេសនៃឧបាយកលនយោបាយតែប៉ុណ្ណោះ ហើយបានចោទប្រកាន់កាណាដាថា ធ្វើការជាមួយសហរដ្ឋអាមេរិក ដើម្បីគាបសង្កត់ក្រុមហ៊ុនចិន។
លោក Alykhan Velshi អនុប្រធានផ្នែកកិច្ចការសាជីវកម្មរបស់ក្រុមហ៊ុន Huawei នៅក្នុងប្រទេសកាណាដា បាននិយាយនៅក្នុងបទសម្ភាសន៍ជាមួយអ្នកសារព័ត៌មាន ថា ក្រុមហ៊ុននៅតែរង់ចាំស្តាប់ពីហេតុផលថា តើការគំរាមកំហែងសន្តិសុខជាតិប្រភេទណា ដែលពួកគេគិតថាក្រុមហ៊ុន Huawei បង្កឡើង។ លោក Alykhan បានអះអាងថា ក្រុមហ៊ុន Huawei មានបុគ្គលិកចំនួន ១ ពាន់៥រយនាក់ ជាប្រជាជនកាណាដា ដែលភាគច្រើននៅក្នុងផ្នែកស្រាវជ្រាវ និង ការអភិវឌ្ឍ ហើយគ្មានហេតុផងណាមួយបញ្ចាក់ថា បង្កឲ្យមានផលប៉ះពាល់ដល់សន្តិសុខជាតិនោះទេ៕
