អាជ្ញាធរហ្វីលីពីនបានជំរុញឱ្យប្រជាជនដែលរស់នៅតាមតំបន់ឆ្នេរសមុទ្រ ដែលរងផលប៉ះពាល់ ត្រូវផ្លាស់ទីខ្ពស់ៗដើម្បីសុវត្ថិភាពជាបន្ទាន់ បន្ទាប់ពីការរញ្ជួយដីនៅឯនាយសមុទ្រ បានវាយប្រហារភាគខាងត្បូងនៃទីក្រុង General Santos ដែលជាទីក្រុងមួយដែលមានប្រជាជនប្រហែល ៧២ម៉ឺន នាក់។
យោងតាមការស្ទង់ភូមិសាស្ត្រសហរដ្ឋអាមេរិក រញ្ជួយដីជាបន្តបន្ទាប់ដ៏ខ្លាំងក្លាបានវាយប្រហារតំបន់នេះប្រហែលពីរម៉ោងបន្ទាប់ពីរញ្ជួយដីលើកដំបូង។ អាជ្ញាធរនៅប្រទេសហ្វីលីពីន ឥណ្ឌូនេស៊ី ម៉ាឡេស៊ី និងជប៉ុន បានដាក់ចេញនូវការព្រមានអំពីរលកយក្សស៊ូណាមិ ដោយជំរុញឱ្យប្រជាជននៅតំបន់ឆ្នេរសមុទ្រដែលរងផលប៉ះពាល់ត្រូវផ្លាស់ទៅទីខ្ពស់ជាបន្ទាន់ដើម្បីសុវត្ថិភាព។ ក្រោយមក ប្រទេសឥណ្ឌូនេស៊ី និងម៉ាឡេស៊ី បានដកការព្រមានអំពីរលកយក្សស៊ូណាមិរបស់ពួកគេវិញ។
មជ្ឈមណ្ឌលព្រមានស៊ូណាមិប៉ាស៊ីហ្វិកបាននិយាយនៅក្នុងសេចក្តីជូនដំណឹងមួយថា រលកស៊ូណាមិ អាចកើតឡើង នៅតាមបណ្តោយឆ្នេរសមុទ្រនៃប្រទេសហ្វីលីពីន ឥណ្ឌូនេស៊ី ប៉ាឡាវ តៃវ៉ាន់ និងប៉ាពួញូហ្គីណេ។
ប្រធានាធិបតីហ្វីលីពីន លោក Ferdinand Marcos បានប្រកាសឱ្យផ្អាកថ្នាក់រៀននៅតំបន់ដែលរងផលប៉ះពាល់នៃកោះ Mindanao នៅថ្ងៃបើកសាលារៀនដំបូង ខណៈពេលដែលអំពាវនាវឱ្យប្រជាជននៅតំបន់ឆ្នេរសមុទ្រត្រូវជម្លៀសចេញជាបន្ទាន់៕
