ហ្វីលីពីនព្រមានចិនថា ការអូសនាវាចម្បាំងខ្លួនចេញពីតំបន់ជម្លោះ គឺជាទង្វើប្រកាសសង្គ្រាម

រដ្ឋមន្ត្រីការពារជាតិហ្វីលីពីនលោក ហ្គីប៊ឺតូ តែដូរ៉ូ (Gilberto Teodoro) នៅថ្ងៃទី២៣ ខែតុលា នេះបានព្រមានថា ការប៉ុនប៉ងណាមួយរបស់ចិនក្នុងការប្រើកម្លាំងអូសនាវាចម្បាំង BRP Sierra Madre របស់ហ្វីលីពីនចេញពីតំបន់ថ្មប៉ប្រះទឹក Ayungin Shoal នឹងត្រូវចាត់ទុកជាទង្វើប្រកាសសង្គ្រាម។ ការព្រមាននេះធ្វើឡើងបន្ទាប់ពីមានរបាយការណ៍ថា ចិនអាចនឹងពិចារណាលើវិធានការតបតចំនួន១០ ប្រឆាំងហ្វីលីពីន ក្នុងនោះរួមមានការអូសនាវាចម្បាំងហ្វីលីពីន BRP Sierra Madre ចេញពីតំបន់ជម្លោះ ការរារាំងបេសកកម្មផ្គត់ផ្គង់ស្បៀង និងសម្ភារៈដល់កងទ័ពហ្វីលីពីន និងការដាក់ទណ្ឌកម្មសេដ្ឋកិច្ច។
វិធានការទាំងនេះត្រូវបានរាយការណ៍ដោយកាសែតភាសាចិន Chinese Commercial News ដែលមានមូលដ្ឋាននៅទីក្រុងម៉ានីល។ ទោះជាយ៉ាងណា រដ្ឋាភិបាលទីក្រុងប៉េកាំង មិនទាន់បានបញ្ជាក់ជាផ្លូវការថា ខ្លួនកំពុងពិចារណា ឬបានអនុម័តវិធានការទាំងនេះនៅឡើយទេ ហើយក៏មិនទាន់មានការបញ្ជាក់ពីប្រតិកម្មផ្លូវការរបស់ចិនចំពោះការព្រមានចុងក្រោយរបស់ហ្វីលីពីន នេះដែរ។
លោក Teodoro បានបញ្ជាក់ថា ការចាត់ទុកការប្រើកម្លាំងប្រឆាំងនាវាចម្បាំងហ្វីលីពីន ថាជាទង្វើប្រកាសសង្គ្រាម មិនមានន័យថា ប្រទេសទាំងពីរបានស្ថិតក្នុងស្ថានភាពសង្គ្រាមជាផ្លូវការនោះទេ។ ការប្រកាសស្ថានភាពសង្គ្រាមជាផ្លូវការត្រូវស្ថិតក្រោមសិទ្ធិអំណាចរបស់ប្រធានាធិបតី និងសភាហ្វីលីពីន។ លោក បានលើកឡើងថា លទ្ធភាពនៃការអនុវត្តសន្ធិសញ្ញាការពារជាតិទៅវិញទៅមករវាងហ្វីលីពីន និងអាម៉េរិក នៅតែបើកចំហ បើមានការវាយប្រហារកើតឡើង ប៉ុន្តែការសម្រេចចិត្តចុងក្រោយនឹងអាស្រ័យលើប្រធានាធិបតីហ្វីលីពីន លោក ហ្វឺឌីណង់ ម៉ាកូស។
សូមបញ្ជាក់ថា នាវាចម្បាំង BRP Sierra Madre ត្រូវបានហ្វីលីពីនបោះបង់ចោលឱ្យនៅជាប់តំបន់ថ្មប៉ប្រះទឹក Ayungin Shoal ដែលគេស្គាល់ផងដែរថា Second Thomas Shoal ចាប់តាំងពីឆ្នាំ១៩៩៩ មក ដើម្បីប្រើប្រាស់ជាប៉ុស្តិ៍យោធារបស់ខ្លួន។ ចិនក៏ទាមទារអធិបតេយ្យភាពលើតំបន់នេះ និងបានទាមទារម្តងហើយម្តងទៀតឱ្យហ្វីលីពីនដកនាវាចម្បាំងនេះចេញ៕

ដោយ: តែម សុខុម