ជុំវិញទង្វើគ្មានការភ្ញាក់រលឹកនេះ ក្រុមអ្នកជំនាញបានចេញមុខរិះគន់ធ្ងន់ៗថា ជាអំពើអាត្មានិយមក្បត់មនសិការជាតិយ៉ាងធ្ងន់ធ្ងរ ដោយសារតែស្រេកឃ្លានផលប្រយោជន៍ផ្ទាល់ខ្លួន។
លោកបណ្ឌិត យង់ ពៅ អ្នកជំនាញភូមិសាស្រ្តនយោបាយបានរិះគន់យ៉ាងខ្លាំងចំពោះសកម្មភាពរបស់ឈ្មួញខិតខូចមួយចំនួន ដែលបន្តលួចនាំចូលទំនិញថៃដោយខុសច្បាប់ចូលមកកម្ពុជា ទាំងដែលព្រំដែនគោកកំពុងបិទទាំងស្រុង ខណៈដែលមកទល់ពេលនេះទាហានថៃនៅតែបន្តឈ្លានពាន និងកាន់កាប់ទឹកដីកម្ពុជាដោយខុសច្បាប់។ អ្នកជំនាញរូបនេះបានចាត់ទុកការបន្តលួចនាំចូលទំនិញថៃរបស់ឈ្មួញទុច្ចរិតមួយចំនួននេះ គឺជាអំពើក្បត់មនសិការជាតិយ៉ាងធ្ងន់ធ្ងរ ដែលមិនត្រឹមបំផ្លាញស្មារតីស្នេហាជាតិរបស់ប្រជាពលរដ្ឋ និងវីរៈកងទ័ពនោះទេ ប៉ុន្តែថែមទាំងបំផ្លាញដល់សេដ្ឋកិច្ចរបស់សហគ្រាសក្នុងស្រុកដែលកំពុងខិតខំលើកកម្ពស់ផលិតផលជាតិផងដែរ។ ទន្ទឹមនឹងនេះអ្នកជំនាញរូបនេះបានអំពាវនាវយ៉ាងទទូចដល់រាជរដ្ឋាភិបាល និងអាជ្ញាធរមានសមត្ថកិច្ចត្រូវចាត់វិធានការឱ្យធ្ងន់ធ្ងរបំផុតចំពោះអ្នកពាក់ព័ន្ធលួចនាំចូលទំនិញថៃខុសច្បាប់ដោយគ្មានការលើកលែង។
ជាមួយគ្នានេះលោកបណ្ឌិត ញិល រដ្ឋា អ្នកជំនាញភូមិសាស្រ្តនយោបាយ និងសេដ្ឋកិច្ចអន្តរជាតិបានចាត់ទុកសកម្មភាពលួចនាំចូលទំនិញពីថៃរបស់ឈ្មួញខិលខូចមួយចំនួន ដែលតម្កល់ផលប្រយោជន៍ផ្ទាល់ខ្លួនធំជាងកិត្តិយស និងផលប្រយោជន៍ជាតិថា ជាអំពើអាត្មានិយមក្បត់ផលប្រយោជន៍ជាតិ និងកំពុងជួយទ្រទ្រង់ដង្ហើមសេដ្ឋកិច្ចរបស់ប្រទេសដែលកំពុងឈ្លានពានកម្ពុជា។ បើតាមអ្នកជំនាញរូបនេះ មានតែការបន្តអនុវត្តច្បាប់ឱ្យបានម៉ឺងម៉ាត់ និងបង្កើនការត្រួតពិនិត្យតាមដានដូចភ្លៀងរលឹមនៅតាមច្រកព្រំដែន និងដាក់ទោសធ្ងន់ធ្ងរដោយគ្មានការលើកលែងចំពោះអ្នកពាក់ព័ន្ធប៉ុណ្ណោះ ទើបអាចទប់ស្កាត់ការលួចរត់ពន្ធទំនិញថៃចូលមកទីផ្សារកម្ពុជានេះបាន។
គួររំឭកថា ទោះបីជារាជរដ្ឋាភិបាលកម្ពុជាបានដាក់ចេញនូវវិធានការក្តៅ និងម៉ឺងម៉ាត់បំផុតក្នុងការបង្រ្កាបការលួចនាំចូលទំនិញថៃតាមច្រកព្រំដែនគោក ដែលត្រូវបានបិទខ្ទប់យ៉ាងណាក៏ដោយ ក៏ឈ្មួញទុច្ចរិតមួយចំនួនតូចនៅតែបន្តលួចនាំចូលទំនិញថៃយកមកចែកចាយក្នុងស្រុកយ៉ាងអនាធិបតេយ្យ។ តួយ៉ាងកាលពីថ្ងៃទី៧ ខែកញ្ញានេះ កងកម្លាំងការពារព្រំដែនបានចុះបង្ក្រាបករណីលួចនាំចូលសាច់បង្កកខុសច្បាប់យ៉ាងច្រើនសន្ធឹកសន្ធាប់នៅភាគខាងជើងតំបន់បឹងត្រកួន ក្នុងភូមិសាស្ត្រខេត្តបន្ទាយមានជ័យ ដោយដកហូតបានជ្រូកកណ្តុរចំនួន១៩៨ក្បាល ប្រហិត១៥២កញ្ចប់ គ្រឿងក្នុងជ្រូក១៦កញ្ចប់ និងកោះមាន់៦កញ្ចប់ផងដែរ៕
