អង្គការពាណិជ្ជកម្មក្រៅប្រទេសជប៉ុន ហៅកាត់ថា JETRO បានបង្ហាញឲ្យដឹងថា ប្រទេសថៃ ជាប្រទេសដែលមានភោជនីយដ្ឋានច្រើនជាងគេបង្អស់នៅក្នុងតំបន់អាស៊ាន ដែលបច្ចុប្បន្ននេះ មានជាង ៤ពាន់កន្លែង ក្នុងនោះ នៅទីក្រុងបាងកក មានជាង ២ពាន់កន្លែង និង ២ពាន់កន្លែងផ្សេងទៀត ស្ថិតនៅតាមបណ្តាខេត្តនានា។
លោក តាកិ តានី ប្រធានអង្គការ JETRO ប្រចាំនៅទីក្រុងបាងកក បានគូសបញ្ជាក់ថា កំណើននៃការចាប់ផ្តើមបើកភោជនីយដ្ឋានជប៉ុន នៅតាមបណ្តាខេត្តនានា មានកំណើនខ្ពស់ដល់ទៅ ២១% ក្នុងឆ្នាំ២០២០នេះ ខ្ពស់ជាងកំណើនក្នុងទីក្រុងបាងកក ដែលមានត្រឹមតែ ៥%។
អត្ថបទទាក់ទង!
ការបើកភោជនីយដ្ឋាន នៅតាមបណ្តាខេត្ត គឺត្រូវបានជំរុញដោយ កំណើននៃការបើកអាជីវកម្មលក់រាយបន្ត នៅតាមបណ្តាខេត្ត គួបផ្សំនឹងការពង្រីក Franchise របស់ប្រតិបត្តិករជប៉ុនផងដែរ។
លោក តាកិ តានី បន្តថា ភោជនីយដ្ឋានជប៉ុន នៅក្នុងប្រទេសថៃ ចាប់ផ្តើមរីកលូតលាស់តាំងពីឆ្នាំ ២០០០មកម្ល៉េះ ដែលមានកំណើនជារៀងរាល់ឆ្នាំ ហើយបច្ចុប្បន្នក៏នៅមានសក្តានុពលលូតលាស់បន្ថែមទៀត ទៅតាមបណ្តាខេត្តនានា ដោយសារតែការផ្គត់ផ្គង់វត្ថុធាតុដើម កាន់តែប្រសើរឡើងហើយ។
អង្គការ JETRO បានបញ្ជាក់ថា នៅតាមបណ្តាខេត្តទាំងអស់នៅក្នុងប្រទេសថៃ គឺមានភោជនីយដ្ឋានជប៉ុន ទាំងអស់ ហើយ JETRO រំពឹងថា នឹងមានការបើកបន្ថែមទៀត នៅក្នុងឆ្នាំ ២០២១ខាងមុខ។
គួរជម្រាបដែរថា យោងតាមការស្ទង់មតិរបស់អង្គការ JETRO ប្រចាំនៅប្រទេសថៃ បានបង្ហាញឲ្យដឹងដែរថា បើទោះបីជា ចំនួនភោជនីយដ្ឋានជប៉ុន កំពុងពង្រីកសក្តានុពលនៅក្នុងប្រទេសថៃក៏ពិតមែន ក៏ប៉ុន្តែ មានភោជនីយដ្ឋានជាច្រើន បានផ្អាកដំណើរការអាជីវកម្ម និងខ្លះទៀត បិទទ្វារជាអចិន្ត្រៃយ៍ ដោយសារតែវិបត្តិមេរោគកូវីដ១៩ ហើយខ្លះទៀត ត្រូវប្តូរការរៀបចំហាង និងបញ្ជីមុខម្ហូប ដើម្បីបន្តដំណើរការអាជីវកម្ម៕
_
