ស្របពេល ប្រធានាធិបតីអាមេរិក លោក ចូ បៃដិន នឹងធ្វើការចាក់វ៉ាក់សាំងកូវីដ១៩ នៅសប្តាហ៍ក្រោយ លោក Mike Pence អនុប្រធានាធិបតីអាមេរិក ក៏នឹងចាក់វ៉ាក់សាំង នៅចុងសប្តាហ៍នេះ ដើម្បីបង្ហាញដល់សាធារណជន អំពីទំនុកចិត្តទៅលើ វ៉ាក់សាំងកូវីដ១៩ ដែលនឹងផ្តល់ជូនពលរដ្ឋអាមេរិក នៅក្នុងឆ្នាំ ២០២១ខាងមុខនេះ។
បើតាមសេតវិមានអាមេរិក បានបង្ហាញដែរថា អតីតប្រធានាធិបតីអាមេរិក លោកដូណាល់ ត្រាំ នឹងធ្វើការចាក់វ៉ាក់សាំងកូវីដ សម្រាប់ខ្លួនឯង នៅពេលដែល ក្រុមការងារឱសថរបស់គាត់ បញ្ជាក់ថា វ៉ាក់សាំងនេះ គឺល្អបំផុតហើយនោះ។
អត្ថបទទាក់ទង!
យ៉ាងណាក៏ដោយ ចំពោះវ៉ាក់សាំងដែលអាចប្រើប្រាស់បាន នៅក្នុងសប្តាហ៍នេះ គឺត្រូវបានទុកដាក់ សម្រាប់ វេជ្ជបណ្ឌិត គិលានុបដ្ឋាយិកា និងបុគ្គលិកពេទ្យដែលធ្វើការនៅក្នុងជួរមុខ ព្រមទាំងមន្រ្តីនៅក្នុងជួររដ្ឋាភិបាលអាមេរិកផងដែរ។
លើសពីនេះ រដ្ឋាភិបាលអាមេរិក ក៏មានបំណងទទួលយក វ៉ាក់សាំងជិត ៣លានដូសពី ក្រុមហ៊ុន Pfizer និង BioNTech ឲ្យបាននៅត្រឹមដំណាច់សប្តាហ៍នេះ។
សូមរម្លឹកដែរថា ប្រធានាធិបតីអាមេរិក លោក ចូ បៃដិន បានបង្ហាញពីគម្រោង និងការប្តេជ្ញាចិត្តរបស់ខ្លួន ថានឹងប្រយុទ្ធប្រឆាំងនឹង វិបត្តិមេរោគកូវីដ១៩នេះ ឲ្យបានសម្រេច អំឡុងពេលចូលធ្វើការ ១០០ថ្ងៃដំបូងរបស់ខ្លួន ដោយនឹងផ្តល់វ៉ាក់សាំងដល់ ពលរដ្ឋអាមេរិក ១០០លាននាក់ ឲ្យបានមុនខែ មីនា ឆ្នាំ ២០២១ ប្រធានាធិបតីអាមេរិករូបនេះ ក៏បានបង្កើតក្រុមការងារសុខាភិបាលសាធារណៈ ដើម្បីធ្វើការបែងចែកវ៉ាក់សាំងទៅដល់ គ្រប់ប៉ែកទាំងអស់នៃប្រទេសអាមេរិក។
ម៉្យាងវិញទៀត ក្រុមហ៊ុន Pfizer ក៏បានយល់ព្រមទៅលើ ការផ្គត់ផ្គង់ វ៉ាក់សាំង ១០០លានដូស ដល់អាមេរិក មុនខែមីនា ឆ្នាំ ២០២១ផងដែរ ខណៈវ៉ាក់សាំង ២០០លានដូសផ្សេងទៀត ដែលផលិតដោយក្រុមហ៊ុន Moderna នឹងផ្តល់ជូនមុនខែមិថុនា ឆ្នាំ ២០២១៕
None
