សម្តេចតេជោ រំពឹងអ្នករាយការណ៍សិទ្ធិមនុស្សនៅកម្ពុជារបស់ UN ថ្មី ជួយធ្វើឱ្យពិភពលោកយល់ពីបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជាកាន់តែច្បាស់

ការបញ្ជាក់បែបនេះរបស់សម្ដេចតេជោ ធ្វើឡើងនៅក្នុងជំនួបពិភាក្សាការងារជាមួយលោក ថូម៉ាស អាន់ឌ្រូ (Thomas Andrews) អ្នករាយការណ៍ពិសេសថ្មី របស់អង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា ដែលទើបចូលកាន់តំណែងជំនួសលោក វិទិត មុនតាប៊ន ដែលបានលាលែងពីតំណែងកាលពីថ្ងៃទី២២ ខែកក្កដា។ សម្ដេចតេជោបសង្ឃឹមថា អ្នករាយការណ៍ពិសេសរូបនេះនឹងបន្តកិច្ចសហការយ៉ាងជិតស្និទ្ធជាមួយរាជរដ្ឋាភិបាលកម្ពុជា ដើម្បីរួមចំណែកលើកកម្ពស់វឌ្ឍនភាពសិទ្ធិមនុស្ស និងប្រជាធិបតេយ្យនៅកម្ពុជាឱ្យកាន់តែប្រសើរ។
ជាការឆ្លើយតបលោក ថូម៉ាស អាន់ឌ្រូ បានចាត់ទុកការជួបពិភាក្សាការងារជាមួយសម្តេចតេជោនេះ គឺជាសញ្ញាវិជ្ជមាន ដែលឆ្លុះបញ្ចាំងពីការបើកចំហ និងការផ្តល់តម្លៃដល់កិច្ចសន្ទនាពាក់ព័ន្ធនឹងសិទ្ធិមនុស្ស។ អ្នករាយការណ៍ពិសេសរូបនេះបានកោតសរសើរកម្ពុជាថា ជាប្រទេសមួយក្នុងតំបន់ ដែលបានផ្តល់សច្ចាប័នលើសន្ធិសញ្ញាសិទ្ធិមនុស្សអន្តរជាតិជាច្រើន និងបានតាមដានយកចិត្តទុកដាក់ចំពោះស្ថានការណ៍នៅតាមព្រំដែនកម្ពុជា-ថៃ។ ទន្ទឹមនេះ លោក ថូម៉ាស អាន់ឌ្រូ ក៏នឹងចុះទៅពិនិត្យដោយផ្ទាល់ នៅតំបន់ព្រំដែន ដើម្បីជួបប្រជាពលរដ្ឋដែលរងផលប៉ះពាល់ និងស្វែងយល់ពីស្ថានភាពជាក់ស្តែងផងដែរ៕

អត្ថបទ ខេមបូណូមីស និងរូបភាពឯកសារ