រដ្ឋមន្ត្រីការបរទេសសិង្ហបុរី ព្រមានថា ពិភពលោកកំពុងស្ថិតក្នុងស្ថានភាពគ្រោះថ្នាក់ និងប្រើប្រាស់បច្ចេកវិទ្យាជាអាវុធ ដែលកំពុងគំរាមកំហែងដល់សន្តិសុខជាតិ

លោកបានសង្កត់ធ្ងន់ថា ក្នុងសម័យកាលនេះ សន្តិសុខជាតិ មិនមែនមានន័យត្រឹមតែការការពារព្រំដែនតាមបែបប្រពៃណីនោះទេ ប៉ុន្តែវាទាមទារនូវការរិះគិតឱ្យបានស៊ីជម្រៅ និងទូលំទូលាយជាងមុន ដើម្បីទប់ទល់នឹងហានិភ័យថ្មីៗដែលមិនអាចទាយទុកជាមុនបាន។

សារព័ត៌មានសិង្ហបុរី CNA បានរាយការណ៍នៅថ្ងៃទី២១ ខែមេសា ថានៅក្នុងសុន្ទរកថា ទៅកាន់មន្ត្រីជាន់ខ្ពស់ និងអ្នកជំនាញផ្នែកសន្តិសុខជាតិចំនួន៧០រូបមកពី២១ប្រទេសក្នុងតំបន់អាស៊ីប៉ាស៊ីហ្វិក លោក វីវៀន បាឡាគ្រីស្នាន រដ្ឋមន្ត្រីការបរទេសសិង្ហបុរី បានលើកឡើងថា ពិភពលោកបច្ចុប្បន្នកំពុងស្ថិតក្នុងស្ថានភាពដ៏គ្រោះថ្នាក់ ដោយសារតែការបែកបាក់សណ្តាប់ធ្នាប់អន្តរជាតិ និងការរីកចម្រើន នៃបច្ចេកវិទ្យា ដែលកំពុងដើរលឿនជាងច្បាប់ទម្លាប់។

លោកបានសង្កត់ធ្ងន់ថា ចរន្តសកលភាវូបនីយកម្ម ដែលធ្លាប់តែជាកម្លាំងចលករ នៃសេដ្ឋកិច្ចពិភពលោក កំពុងរងការរុញច្រានឱ្យដើរថយក្រោយ។អ្វីដែលគួរឱ្យព្រួយបារម្ភបំផុតនោះ គឺការពឹងពាក់គ្នាទៅវិញទៅមកក្នុងប្រព័ន្ធសេដ្ឋកិច្ច កំពុងត្រូវបានមហាអំណាចមួយចំនួនយកមកប្រើប្រាស់ជាឧបករណ៍នយោបាយ ឬជាសម្ពាធ ដើម្បីដាក់ទណ្ឌកម្ម និងបង្ខិតបង្ខំគ្នាដែលវាកំពុងក្លាយជាអាវុធដ៏គ្រោះថ្នាក់បំផុតសម្រាប់ស្ថិរភាពសន្តិសុខជាតិ។

រដ្ឋមន្ត្រីការបរទេសសឹង្ហបុរី រូបនេះ បានបន្ថែមថា និយមន័យនៃសន្តិសុខជាតិ បានពង្រីកវិសាលភាពលើសពីវិស័យយោធា សន្តិសុខបច្ចេកវិទ្យា សន្តិសុខខ្សែច្រវាក់ផ្គត់ផ្គង់ និងបញ្ហាភូមិសាស្ត្រនយោបាយនិងសេដ្ឋកិច្ច។ លោកបានសង្កត់ធ្ងន់ថា ប្រទេសនានាត្រូវតែបោះបង់ចោលនូវផ្នត់គំនិតការពារជាតិបែបចាស់គំរិល ហើយងាកមកអនុវត្តវិធីសាស្ត្រសន្តិសុខរួមបញ្ចូលគ្នា ដែលមានភាពបត់បែន និងរឹងមាំគ្រប់ជ្រុងជ្រោយដើម្បីធានាបាននូវអធិបតេយ្យភាព និងសុវត្ថិភាពប្រជាជននៅក្នុងយុគសម័យដ៏ច្របូកច្របល់នេះ៕

ដោយៈ សរ សុជាតិ