អាជ្ញាធរកម្ពុជារកឃើញបណ្តាញក្រុមហ៊ុនពាក់ព័ន្ធសំណុំរឿង ព្រីនស៍គ្រុប ១៩៨ក្រុមហ៊ុន និងបានបង្កកទ្រព្យសម្បត្តិជិត១ពាន់លានដុល្លារ

បើតាមការគូសបញ្ជាក់របស់ឯកឧត្តមទេសរដ្ឋមន្ត្រី សមត្ថកិច្ចបានរកឃើញបណ្តាញក្រុមហ៊ុនពាក់ព័ន្ធរហូតដល់១៩៨ក្រុមហ៊ុន ក្នុងនោះ៩៨ក្រុមហ៊ុននៅក្នុងប្រទេស និង១០០ក្រុមហ៊ុនទៀតនៅក្រៅប្រទេស។

ឯកឧត្តម ឆៃ ស៊ីណារិទ្ធ បានប្រាប់អ្នកសារព័ត៌មានថា បច្ចុប្បន្នតុលាការកម្ពុជាកំពុងបង្កើនល្បឿននីតិវិធីស៊ើបសួរលើបទល្មើសឆបោកមានស្ថានទម្ងន់ទោសជាក្រុមមានការចាត់តាំង និងបទសម្អាតប្រាក់ ដោយមានបុគ្គលឈ្មោះ ចេន ហ្ស៊ី ជាមេខ្លោងបានលួចលាក់ប្រព្រឹត្តសកម្មភាពឆបោកតាមប្រព័ន្ធបច្ចេកវិទ្យាជ្រកក្រោមស្លាកអគារ និងកាស៊ីណូនានារបស់សម្ព័ន្ធក្រុមហ៊ុន ព្រីនស៍គ្រុប។

នៅក្នុងសំណុំរឿងដ៏ស្មុគស្មាញនេះ តុលាការបានចេញដីកាចាប់ខ្លួនជនត្រូវចោទសរុប៣២នាក់ និងដាក់ឱ្យស្ថិតក្រោមការត្រួតពិនិត្យតាមផ្លូវតុលាការ៤នាក់ ព្រមទាំងកំពុងស្រាវជ្រាវអត្តសញ្ញាណជនសង្ស័យ៥នាក់បន្ថែមទៀត។ ក្នុងនោះមេខ្លោងចំនួន៦នាក់រួមមានឈ្មោះ ចេន ហ្ស៊ី, ឈ្មោះ លី សុង, ឈ្មោះ លីវ យិន, ឈ្មោះ អ៊ឹង ដារ៉ា, ឈ្មោះ អៀង សុខលីម និងឈ្មោះ Huang Ron ត្រូវបានសមត្ថកិច្ចឃាត់ខ្លួន និងបញ្ជូនទៅតុលាការរួចរាល់ហើយ។ ដោយឡែកមេខ្លោង និងបក្ខពួក២៩នាក់ទៀត ដែលកំពុងគេចខ្លួន កម្ពុជាកំពុងដំណើរការនីតិវិធីស្នើសុំដាក់បញ្ចូលទៅក្នុងនិវេទន៍ក្រហមរបស់អង្គការនគរបាលព្រហ្មទណ្ឌអន្តរជាតិ (INTERPOL) និងស្នើសុំជំនួយទៅវិញទៅមកផ្នែកច្បាប់ក្នុងវិស័យព្រហ្មទណ្ឌ។

បើតាមការអះអាងរបស់ឯកឧត្តម ឆៃ ស៊ីណារិទ្ធ សមត្ថកិច្ចកម្ពុជាកំពុងសហការគ្នាយ៉ាងជិតស្និទ្ធជាមួយការិយាល័យស៊ើបអង្កេតសហព័ន្ធ (FBI) របស់អាមេរិក, ក្រសួងសន្តិសុខសាធារណៈចិន និងដៃគូអន្តរជាតិនានា ដើម្បីប្រមូលភស្តុតាងផ្តន្ទាទោសក្រុមឧក្រិដ្ឋជនទាំងនេះ។ ចំពោះទ្រព្យសម្បត្តិដែលពាក់ព័ន្ធរួមមានអគារ, កាស៊ីណូ និងអចលនទ្រព្យជាច្រើនទៀតរបស់ក្រុមហ៊ុន ព្រីនស៍គ្រុប ដែលមានតម្លៃប៉ាន់ស្មានជិត១ពាន់លានដុល្លារអាម៉េរិកត្រូវបានតុលាការសម្រេចបង្កកទុក ហើយអាជ្ញាធរមានសមត្ថកិច្ចកំពុងរៀបចំមូលដ្ឋានច្បាប់ ដើម្បីរឹបអូសទ្រព្យសកម្ម នៃបទល្មើសទាំងនេះបញ្ចូលជាសម្បត្តិរដ្ឋជាស្ថាពរស្របតាមច្បាប់ជាធរមាន៕