ចិន និងវៀតណាមបើកផ្លូវដែកថ្មីកាត់បន្ថយរយៈពេលដឹកទំនិញពី១៥ថ្ងៃមកនៅត្រឹម៧ថ្ងៃ

ផ្លូវដែកថ្មីមួយខ្សែកំពុងជួយជំរុញពាណិជ្ជកម្មវៀតណាម-ចិនឱ្យកាន់តែមានភាពល្អប្រសើរ ដោយវាបានជួយកាត់បន្ថយពេលវេលាដឹកជញ្ជូនទំនិញរវាងប្រទេសចិន និងវៀតណាមបានរហូតដល់ទៅពាក់កណ្តាល់ពី១៥ថ្ងៃមកនៅត្រឹមប្រមាណ៧ថ្ងៃប៉ុណ្ណោះ។ ការតភ្ជាប់ផ្លូវដែកថ្មីនេះមិនត្រឹមតែជួយឱ្យអាជីវកម្មដឹកទំនិញបានលឿន និងមានប្រសិទ្ធភាពជាងមុនប៉ុណ្ណោះទេ ប៉ុន្តែថែមទាំងអាចពង្រឹងខ្សែច្រវាក់ពាណិជ្ជកម្មរវាងចិន វៀតណាម និងអាស៊ានផងដែរ។

ចិន និងវៀតណាម

សារព័ត៌មាន VN Express បានរាយការណ៍នៅថ្ងៃទី១៤ ខែកញ្ញា ថា ប្រទេសវៀតណាមបានបើកដំណើរការសេវារថភ្លើងដឹកទំនិញអន្តរជាតិថ្មីមួយតភ្ជាប់ខេត្តឈីងហៃ (Qinghai) ក្នុងប្រទេសចិន ជាមួយក្រុងដុង ណៃ (Dong Nai) នៅភាគខាងត្បូងវៀតណាម។ ផ្លូវនេះមានប្រវែងជិត៤,០០០ គីឡូម៉ែត្រ ហើយអាចដឹកទំនិញចូលទៅក្នុងប្រទេសវៀតណាម ដោយផ្ទាល់។ ការធ្វើដំណើរទៅកាន់ស្ថានីយ ត្រាង បូម ពេលនេះចំណាយពេលខ្លីត្រឹមប្រមាណ៧ថ្ងៃប៉ុណ្ណោះ រួមទាំងការបំពេញបែបបទគយផងដែរ បើធៀបកាលពីមុនដែលត្រូវចំណាយពេលចន្លោះពី១២ទៅ១៥ថ្ងៃ។
ការដឹកជញ្ជូនទំនិញតាមផ្លូវដែកឆ្លងកាត់ព្រំដែន ក៏កំពុងកើនឡើងយ៉ាងខ្លាំងផងដែរ។ បរិមាណទំនិញបានកើនដល់ជាង១លានតោនក្នុងឆ្នាំ២០២៤ និងលើស១,៤លានតោនក្នុងឆ្នាំ២០២៥។ ទន្ទឹមនេះ វៀតណាម ក៏កំពុងពង្រីកសេវាដឹកជញ្ជូនទៅមកទាំងពីរទិស ដើម្បីអាចនាំទំនិញរបស់ខ្លួនទៅកាន់ប្រទេសចិន និងកាត់បន្ថយឱកាសដែលរថភ្លើងត្រឡប់មកវិញដោយគ្មានទំនិញ។
សូមបញ្ជាក់ថា វៀតណាមកំពុងអភិវឌ្ឍគម្រោងផ្លូវដែកសំខាន់ៗ ដើម្បីភ្ជាប់ប្រទេសចិនជាមួយកំពង់ផែ និងមជ្ឈមណ្ឌលសេដ្ឋកិច្ចរបស់ខ្លួន ក្នុងនោះមានគម្រោង ឡាវកៃ-ហាណូយ-ហៃហ្វុង ដែលរំពឹងថា នឹងពង្រឹងការតភ្ជាប់ជាមួយប្រទេសចិន។ វៀតណាមមើលឃើញថា បណ្តាញទាំងនេះអាចក្លាយជាមូលដ្ឋានសម្រាប់ច្រករបៀងផ្លូវដែកឆ្លងកាត់អាស៊ាន ដែលភ្ជាប់ចិនជាមួយអាស៊ីអាគ្នេយ៍ អាស៊ីកណ្តាល និងអឺរ៉ុប៕

ដោយ: តែម សុខុម