គិតត្រឹមខែកក្កដា ឆ្នាំ២០២៦ សមត្ថភាពផលិតថាមពលអគ្គិសនីចេញពីពន្លឺព្រះអាទិត្យរបស់ចិន បានស្ទុះហក់ឡើងដល់ជិត១,៣០០ជីហ្គាវ៉ាត់ (GW) ដែលស្មើនឹងជាង៣១% នៃសមត្ថភាពផលិតថាមពលសរុបទាំងអស់របស់ប្រទេស។ តួលេខដ៏មហិមានេះបានបញ្ជាក់យ៉ាងច្បាស់ថា ចិន កំពុងតែបោះជំហានយ៉ាងលឿនក្នុងការបោះបង់ចោលថាមពលកខ្វក់ ហើយជំនួសមកវិញនូវថាមពលស្អាត ដែលគ្មានផ្សែងពុល។
ដើមឡើយការពឹងផ្អែកលើធ្យូងថ្ម ដើម្បីផ្គត់ផ្គង់ខ្សែច្រវាក់ផលិតកម្មធ្លាប់បានធ្វើឱ្យចិន ជាប់ឈ្មោះជា អ្នកបំពុលបរិស្ថានធំជាងគេ។ ប៉ុន្តែដើម្បីលុបលាងរូបភាពអវិជ្ជមាននេះ ព្រមទាំងឆ្លើយតបនឹងការប្រែប្រួលអាកាសធាតុ ក្នុងរយៈពេល៥ឆ្នាំខាងមុខ ចិន បានរៀបចំផែនការយុទ្ធសាស្ត្រចាក់ទុនបន្ថែមរហូតដល់ ២៩៨ពាន់លានដុល្លារទៅក្នុងហេដ្ឋារចនាសម្ព័ន្ធថាមពលពន្លឺព្រះអាទិត្យ។
លទ្ធផលនៃការវិនិយោគឥតឈប់ឈរនេះធ្វើឱ្យបរិមាណថាមពលអគ្គិសនី ដែលចិន ទាញចេញពីពន្លឺព្រះអាទិត្យកើនឡើងដល់ជាង៨០២ពាន់លានគីឡូវ៉ាត់ម៉ោង កើនឡើងជាង១៥% បើធៀបនឹងរយៈពេលដូចគ្នា។ សមិទ្ធផលនេះមិនត្រឹមតែធ្វើឱ្យចិន ឈរនៅលើកំពូលតារាងជាប្រទេសផលិត និងទាញយកថាមពលពន្លឺព្រះអាទិត្យបានច្រើនជាងគេបំផុតនៅលើភពផែនដីប៉ុណ្ណោះទេ ប៉ុន្តែវាកំពុងតែរុញច្រានឱ្យចិន ក្លាយជាអ្នកកំណត់វាសនាសេដ្ឋកិច្ចបៃតង និងជាអធិរាជថាមពលអគ្គិសនីដើរដោយពន្លឺព្រះអាទិត្យយ៉ាងពិតប្រាកដដែលគ្មានប្រទេសណាមួយអាចប្រកួតប្រជែងបានឡើយ៕
ដោយៈ សរ សុជាតិ
