វិស័យថាមពល

វិបត្តិនៅមជ្ឈិមបូព៌ាក្លាយជាការគំរាមកំហែងសន្តិសុខថាមពលធំបំផុតក្នុងប្រវត្តិសាស្ត្រ ខណៈពិភពលោកអស់យន្តការទប់ទល់ហើយ


ទីភ្នាក់ងារថាមពលអន្តរជាតិ (IEA) បានចេញសារព្រមានដ៏គួរឱ្យព្រួយបារម្ភថា វិបត្តិនៅតំបន់មជ្ឈិមបូព៌ា ដែលផ្ទុះឡើងតាំងពីខែកុម្ភៈ ក្រោយការវាយប្រហារតាមអាកាសយ៉ាងសន្ធាប់របស់សហរដ្ឋអាម៉េរិក និងអ៊ីស្រាអែល ទៅលើប្រទេសអ៊ីរ៉ង់ បានរុញច្រានពិភពលោកឱ្យធ្លាក់ចូលទៅក្នុងការគំរាមកំហែងសន្តិសុខថាមពលដ៏ធំបំផុតមិនធ្លាប់មានក្នុងប្រវត្តិសាស្ត្រ។ របាយការណ៍ប្រចាំឆ្នាំរបស់ IEA បានបញ្ជាក់យ៉ាងច្បាស់ថា ពេលនេះយន្តការទប់ទល់របស់ពិភពលោកត្រូវបានប្រើប្រាស់អស់ហើយ ហើយបន្ទុកតម្លៃដ៏សែនខ្ពស់កំពុងធ្លាក់ទៅលើអ្នកប្រើប្រាស់ដោយផ្ទាល់។
វិបត្តិនៅមជ្ឈិមបូព៌ាក្លាយជាការគំរាមកំហែងសន្តិសុខថាមពលធំបំផុតក្នុងប្រវត្តិសាស្ត្រ
ដោយ

សារព័ត៌មាន CNA បានរាយការណ៍នៅថ្ងៃទី១៩ ខែវិច្ឆិកា ថា នៅក្នុងរបាយការណ៍ប្រចាំឆ្នាំដ៏សំខាន់ក្រោមចំណងជើងថា ទស្សនវិស័យថាមពលពិភពលោក ទីភ្នាក់ងារថាមពលអន្តរជាតិ បានគូសបញ្ជាក់ថា អ្នកប្រើប្រាស់ទូទាំងសកលលោកកំពុងរែកពុនបន្ទុកចំណាយកាន់តែធ្ងន់ធ្ងរ ខណៈពិភពលោកអស់លទ្ធភាពទប់ទល់នឹងផលប៉ះពាល់លើការផ្គត់ផ្គង់ថាមពល ដែលបង្កឡើងដោយជម្លោះនេះហើយ។ IEA ក៏បានព្រមានដែរថា វិបត្តិនេះនឹងបន្សល់ទុកនូវស្លាកស្នាម និងផលប៉ះពាល់ដ៏ធំធេង ព្រមទាំងអូសបន្លាយរយៈពេលយូរទៅមុខទៀត។


ចាប់តាំងពីការវាយប្រហាររបស់អាម៉េរិក និងអ៊ីស្រាអែល បានដុតបញ្ឆេះភ្លើងសង្គ្រាមកាលពីខែកុម្ភៈ មក បណ្តាប្រទេសនៅតំបន់ឈូងសមុទ្របានជួបភាពរាំងស្ទះយ៉ាងខ្លាំងក្នុងការនាំចេញប្រេង បន្ទាប់ពីអ៊ីរ៉ង់ បិទច្រកសមុទ្រហ័រមូស និងបង្កើនការវាយប្រហារលើនាវាដឹកប្រេង។ ទោះបីជាកងទ័ពអាម៉េរិក បានខិតខំការពារ និងអមដំណើរនាវាឆ្លងកាត់ច្រកសមុទ្រយុទ្ធសាស្ត្រ ដែលធ្លាប់ជាផ្លូវដឹកជញ្ជូនប្រេងប្រមាណ១ ភាគ៥ នៃបរិមាណសរុបរបស់ពិភពលោកក្តី ក៏ខ្សែច្រវាក់ផ្គត់ផ្គង់នៅតែរងការកាត់ផ្តាច់ និងរំខានឥតឈប់ឈរ។


លោក ហ្វ៉ាទី បៃរ៉ូល (Fatih Birol) នាយកប្រតិបត្តិនៃទីភ្នាក់ងារថាមពលអន្តរជាតិ បានសរសេរក្នុងសេចក្តីផ្តើមនៃរបាយការណ៍នេះថា វិបត្តិនៅច្រកសមុទ្រហ័រមូស បានបង្កើតការគំរាមកំហែងដ៏ធំបំផុតមិនធ្លាប់មានចំពោះសន្តិសុខថាមពល ដែលធ្វើឱ្យវិបត្តិប្រេងកាលពីទសវត្សរ៍ឆ្នាំ១៩៧០ ក្លាយជារឿងតូចតាចមិនអាចប្រៀបធៀបបានឡើយ។


លោកបានបន្តថា កន្លងមកបណ្តាប្រទេសនានាបានព្យាយាមគ្រប់មធ្យោបាយ ដើម្បីការពារពលរដ្ឋខ្លួន ដូចជាប្រទេសផលិតប្រេងបានបញ្ចេញស្តុកបន្ថែមចូលទីផ្សារ និងស្វែងរកផ្លូវដឹកជញ្ជូនជំនួស ខណៈប្រទេសចិនបានកាត់បន្ថយការទិញប្រេងពីទីផ្សារអន្តរជាតិ។ ទោះរដ្ឋាភិបាលនានាបានចូលអន្តរាគមន៍យ៉ាងណាក្តី ក៏ពិភពលោកនៅតែគេចមិនផុតពីវិបត្តិតម្លៃប្រេងហក់ឡើងខ្ពស់កប់ពពក និងកង្វះខាតការផ្គត់ផ្គង់នោះដែរ។


របាយការណ៍របស់ IEA បានសង្កត់ធ្ងន់ថា បច្ចុប្បន្នយន្តការសម្រាលការលំបាកផ្សេងៗត្រូវបានប្រើប្រាស់អស់រលីងទៅហើយ ដែលធ្វើឱ្យបន្ទុកទាំងស្រុងកំពុងធ្លាក់ទៅលើអ្នកប្រើប្រាស់។ លោក ហ្វ៉ាទី បៃរ៉ូល បានព្រមានថា ទោះបីជាវិស័យថាមពល និងសេដ្ឋកិច្ចសកលធ្លាប់បង្ហាញភាពធន់គួរឱ្យកត់សម្គាល់ក្តី ប៉ុន្តែជម្លោះនេះកាន់តែអូសបន្លាយ ផលប៉ះពាល់នឹងកាន់តែមហន្តរាយ ហើយលោកមើលមិនឃើញពីច្រកចេញណាមួយ ដែលអាចនាំឱ្យទីផ្សារថាមពលពិភពលោក វិលត្រឡប់ទៅរកសភាពដើមដូចមុនវិបត្តិវិញបានឡើយ៕


អត្ថបទៈ សួន ឡង់ទី




អត្ថបទបន្ទាប់


វៀតណាម ងាកទៅពឹងរុស្ស៊ី ដើម្បីពង្រឹងសន្តិសុខថាមពល ខណៈបាតុភូតអែលនីញ៉ូ ធ្វើឱ្យទិន្នផលវារីអគ្គិសនីធ្លាក់ចុះ និងធ្វើការនាំចូលឧស្ម័នកើនឡើងខ្លាំង

វៀតណាម កំពុងប្រឈមសម្ពាធកាន់តែខ្លាំងក្នុងការធានាការផ្គត់ផ្គង់អគ្គិសនី ខណៈបាតុភូតអែលនីញ៉ូ បង្កឱ្យអាកាសធាតុក្តៅហួតហែង និងធ្វើឱ្យទិន្នផលវារីអ…

អាមេរិកដាក់ទណ្ឌកម្មលើបុគ្គល និងក្រុមហ៊ុនចំនួន៥ ដែលពាក់ព័ន្ធនឹងការបើកមជ្ឈមណ្ឌល​ឆបោកតាមអ៊ីនធឺណិតនៅកម្ពុជា និងមីយ៉ាន់ម៉ា

សហរដ្ឋអាមេរិកបានប្រកាសដាក់ទណ្ឌកម្មលើបុគ្គល និងក្រុមហ៊ុនចំនួន៥ ដែលជាប់ពាក់ព័ន្ធ​នឹងការកាន់កាប់ ប្រតិបត្តិការ និងការផ្តល់ការគាំទ្រ​ដល់មជ្ឈ…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ