វិស័យថាមពល

វៀតណាម ងាកទៅពឹងរុស្ស៊ី ដើម្បីពង្រឹងសន្តិសុខថាមពល ខណៈបាតុភូតអែលនីញ៉ូ ធ្វើឱ្យទិន្នផលវារីអគ្គិសនីធ្លាក់ចុះ និងធ្វើការនាំចូលឧស្ម័នកើនឡើងខ្លាំង


វៀតណាម កំពុងប្រឈមសម្ពាធកាន់តែខ្លាំងក្នុងការធានាការផ្គត់ផ្គង់អគ្គិសនី ខណៈបាតុភូតអែលនីញ៉ូ បង្កឱ្យអាកាសធាតុក្តៅហួតហែង និងធ្វើឱ្យទិន្នផលវារីអគ្គិសនីធ្លាក់ចុះខ្លាំង។ ស្ថានភាពនេះបានជំរុញឱ្យវៀតណាម បង្កើនការនាំចូលឧស្ម័នធម្មជាតិរាវ (LNG) យ៉ាងគំហុក ព្រមទាំងងាកទៅពង្រឹងកិច្ចសហប្រតិបត្តិការថាមពលជាមួយរុស្ស៊ី រួមទាំងវិស័យប្រេង ឧស្ម័ន ថាមពលកកើតឡើងវិញ និងនុយក្លេអ៊ែ។
វៀតណាម ងាកទៅពឹងរុស្ស៊ី ដើម្បីពង្រឹងសន្តិសុខថាមពល
ដោយ

ក្រោយតម្រូវការអគ្គិសនីបន្តកើនឡើង វៀតណាម កំពុងស្វែងរកប្រភពថាមពលបន្ថែម ដើម្បីធានាស្ថិរភាពការផ្គត់ផ្គង់។ នេះបើយោងតាមការចុះផ្សាយរបស់សារព័ត៌មាន Bloomberg និង Reuters នៅថ្ងៃទី១៩ ខែវិច្ឆិកា។


ការនាំចូលឧស្ម័នធម្មជាតិរាវ (LNG) របស់វៀតណាម បានកើនឡើងយ៉ាងខ្លាំងដល់ទៅប្រមាណ ២២៤% ចាប់តាំងពីថ្ងៃទី១ ខែតុលា មក បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យតាមដានចរាចរណ៍កប៉ាល់ដែលសារព័ត៌មាន Bloomberg ប្រមូលបាន។ ការកើនឡើងយ៉ាងខ្លាំងនេះកើតឡើងចំពេលដែលភ្លៀងធ្លាក់តិចបណ្តាលឱ្យរំហូរទឹកចូលអាងស្តុកទឹកវារីអគ្គិសនីថយចុះ ខណៈកំណើនសេដ្ឋកិច្ច និងសកម្មភាពឧស្សាហកម្ម ក៏ជំរុញឱ្យតម្រូវការប្រើប្រាស់អគ្គិសនីកើនឡើងខ្លាំង។


បច្ចុប្បន្នរំហូរទឹកចូលអាងស្តុកទឹកវារីអគ្គិសនីរបស់វៀតណាម មានត្រឹមប្រមាណ៨០%ប៉ុណ្ណោះ បើធៀបនឹងកម្រិតមធ្យមរយៈពេលវែង។ ចំណែកឯការប្រើប្រាស់អគ្គិសនីត្រូវបានព្យាករថា នឹងកើនឡើងជាង១០%ក្នុងឆ្នាំ២០២៦ នេះ ដែលកាន់តែបង្កើនសម្ពាធលើប្រព័ន្ធផ្គត់ផ្គង់ថាមពល។


ទន្ទឹមនេះនៅក្រៅកិច្ចប្រជុំកំពូល APEC ក្នុងទីក្រុងស៊ិនជិន ប្រទេសចិន កាលពីថ្ងៃទី១៨ ខែវិច្ឆិកា ប្រធានាធិបតីវៀតណាម លោក តូ ឡឹម និងប្រធានាធិបតីរុស្ស៊ីលោក វ្ល៉ាឌីមៀ ពូទីន បានព្រមព្រៀងពង្រឹងកិច្ចសហប្រតិបត្តិការថាមពលរវាងប្រទេសទាំងពីរ។ ក្នុងនោះលោក ពូទីន បានបង្ហាញឆន្ទៈចែករំលែកបទពិសោធន៍ បច្ចេកវិទ្យា និងការបណ្តុះបណ្តាលជំនាញក្នុងវិស័យថាមពលជាមួយវៀតណាម។ ភាគីទាំងពីរ ក៏បានពិភាក្សាអំពីកិច្ចសហប្រតិបត្តិការក្នុងវិស័យប្រេង និងឧស្ម័ន ថាមពលកកើតឡើងវិញ និងថាមពលនុយក្លេអ៊ែ ខណៈវៀតណាមកំពុងពិចារណាស្តារកម្មវិធីថាមពលនុយក្លេអ៊ែស៊ីវិលឡើងវិញ។


ទោះជាយ៉ាងណាការពឹងផ្អែកលើឧស្ម័នធម្មជាតិរាវ (LNG) អាចនឹងថយចុះនៅចុងឆ្នាំនេះនៅពេលរោងចក្រអគ្គិសនីដើរដោយធ្យូងថ្ម “ក្វាង ត្រាច់ ទី១” ដែលមានសមត្ថភាពផលិតអគ្គិសនី១,៤ជីហ្គាវ៉ាត់ ចាប់ផ្តើមដំណើរការជាផ្លូវការសម្រាប់ការផ្គត់ផ្គង់ពាណិជ្ជកម្ម។ សរុបមកការបង្កើនការនាំចូលឧស្ម័នធម្មជាតិរាវ (LNG) និងការពង្រឹងទំនាក់ទំនងថាមពលជាមួយរុស្ស៊ីបានបង្ហាញថា វៀតណាមកំពុងប្រញាប់ពង្រីកប្រភពផ្គត់ផ្គង់ថាមពល ដើម្បីទប់ទល់នឹងបញ្ហាអាកាសធាតុ និងតម្រូវការអគ្គិសនី ដែលកំពុងកើនឡើង៕


ដោយ: តែម សុខុម




អត្ថបទបន្ទាប់


អឺរ៉ុប សម្រេចចុះកិច្ចព្រមព្រៀងពាណិជ្ជកម្មជាមួយឥណ្ឌូនេស៊ី ដើម្បីទប់ទល់នឹងពន្ធគយរបស់លោក ត្រាំ

ស្របពេលពិភពលោកកំពុងព្រួយបារម្ភពីពន្ធគយរបស់រដ្ឋបាលលោក ដូណាល់ ត្រាំ ពេលនេះរដ្ឋាភិបាលរបស់បណ្តាប្រទេសនៅសហភាពអឺរ៉ុប (EU) បានអនុម័តឱ្យក្រុមប្រ…

វិបត្តិនៅមជ្ឈិមបូព៌ាក្លាយជាការគំរាមកំហែងសន្តិសុខថាមពលធំបំផុតក្នុងប្រវត្តិសាស្ត្រ ខណៈពិភពលោកអស់យន្តការទប់ទល់ហើយ

ទីភ្នាក់ងារថាមពលអន្តរជាតិ (IEA) បានចេញសារព្រមានដ៏គួរឱ្យព្រួយបារម្ភថា វិបត្តិនៅតំបន់មជ្ឈិមបូព៌ា ដែលផ្ទុះឡើងតាំងពីខែកុម្ភៈ ក្រោយការវាយប្រហ…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ