នាពិធីបិទកិច្ចប្រជុំកំពូលអាស៊ាន លើកទី៤៩ កាលពីថ្ងៃទី១៧ ខែវិច្ឆិកា នាយករដ្ឋមន្ត្រីសិង្ហបុរី លោក ឡរ៉េន វង្ស បានទទួលញញួរប្រធានអាស៊ានជាផ្លូវការពីប្រទេសហ្វីលីពីន ដើម្បីបន្តវេនដឹកនាំប្លុកតំបន់នេះនៅឆ្នាំ២០២៧។ ភ្លាមៗក្រោយទទួលបានតំណែង លោកបានអំពាវនាវឱ្យប្រទេសសមាជិកទាំងអស់ រួមគ្នាចាត់វិធានការជាក់ស្តែងបន្ថែមទៀតឆ្ពោះទៅរកការបង្កើតទីផ្សារតែមួយ និងពន្លឿនអន្តរកាលថាមពលស្អាតប្រកបដោយនិរន្តរភាព។
លោក ឡរ៉េន វង្ស បានគូសបញ្ជាក់ថា ការសម្រេចបាននូវទីផ្សារតែមួយរបស់អាស៊ាននឹងបើកផ្លូវឱ្យវិស័យឯកជន និងអាជីវកម្មនានាអាចពង្រីកប្រតិបត្តិការឆ្លងព្រំដែនបានយ៉ាងរលូន ដែលជាកត្តាចម្បងក្នុងការបង្កើតឱកាសការងារ ទាក់ទាញការវិនិយោគ និងនាំមកនូវវិបុលភាពរួមជូនប្រជាជនក្នុងតំបន់។ លើសពីនេះ លោក ក៏បានជំរុញឱ្យអាស៊ានចាប់យកសក្តានុពលពីបច្ចេកវិទ្យាបញ្ញាសិប្បនិម្មិត (AI) ព្រមទាំងពង្រឹងការតភ្ជាប់ប្រព័ន្ធហិរញ្ញវត្ថុ និងសេដ្ឋកិច្ចឌីជីថលឱ្យកាន់តែទំនើប និងរឹងមាំ។
សម្រាប់អាណត្តិដឹកនាំឆ្នាំ២០២៧ សិង្ហបុរីបានកំណត់យកមូលបទដ៏មានអត្ថន័យគឺ សមាហរណកម្មកាន់តែស៊ីជម្រៅ ភាពជាដៃគូកាន់តែទូលំទូលាយ»។ នាយករដ្ឋមន្ត្រីសិង្ហបុរីរូបនេះបានគូសបញ្ចាក់ថា ការជ្រើសរើសយកមូលបត្រនេះ គឺដើម្បីឆ្លើយតបទៅនឹងការប្រកួតប្រជែងដ៏ស្រួចស្រាល់រវាងមហាអំណាច និងការបែកបាក់ នៃសណ្តាប់ធ្នាប់សេដ្ឋកិច្ចសកល ហើយអាស៊ានត្រូវពង្រឹងភាពរឹងមាំផ្ទៃក្នុង។ លោកជឿជាក់ថា អាស៊ាននៅមានសក្តានុពលដ៏ធំធេង ដែលមិនទាន់បានទាញយកមកប្រើប្រាស់អស់លទ្ធភាព ជាពិសេសតាមរយៈការពង្រឹងកិច្ចសហប្រតិបត្តិការលើវិស័យហិរញ្ញវត្ថុ បច្ចេកវិទ្យាឌីជីថល និងថាមពលស្អាត។
ក្នុងនាមជារដ្ឋមន្ត្រីក្រសួងហិរញ្ញវត្ថុផងនោះលោក ឡរ៉េន វង្ស បានសង្កត់ធ្ងន់ថា អាស៊ានត្រូវតែរក្សាជំហរបើកចំហ និងតម្រង់ទិសទៅរកពិភពលោកខាងក្រៅជានិច្ច។ លោកបានបន្ថែមថា នៅក្នុងគ្រាដែលពិភពលោកកំពុងប្រឈមនឹងការបែងចែកបក្សពួក ជម្រើសដ៏ល្អបំផុតរបស់អាស៊ាន គឺការបន្តកសាងស្ពានតភ្ជាប់ពង្រឹងទំនាក់ទំនងជាមួយដៃគូអន្តរជាតិ និងធានាថា អាស៊ីអាគ្នេយ៍នៅតែជាតំបន់បើកទូលាយ ដែលគ្រប់ប្រទេសទាំងអស់អាចចូលរួមសហការ និងរីកចម្រើនជាមួយគ្នា៕
ដោយៈ សរ សុជាតិ