​​​​​​​​ វិស័យ​ការបរទេស

តើលោក ដូណាល់ ត្រាំ មានចក្ខុវិស័យយុទ្ធសាស្ត្រយ៉ាងណាចំពោះប្រជាជាតិ អាស៊ីអាគ្នេយ៍?


ចក្ខុវិស័យគោលនយោបាយរបស់ប្រធានាធិបតីអាម៉េរិក លោក ដូណាល់ ត្រាំ មកកាន់តំបន់អាស៊ីអាគ្នេយ៍នៅក្នុងអាណត្តិដឹកនាំនេះ គឺការពង្រឹងឥទ្ធិពល និងវត្តមានដ៏រឹងមាំរបស់សហរដ្ឋអាម៉េរិក នៅក្នុងតំបន់​។ យោងតាមការចុះផ្សាយរបស់សារព័ត៌មាន The Business Times នៅក្នុងជំនួបជាមួយបណ្តាមេដឹកនាំអាស៊ាន កាលពីថ្ងៃទី១៧ ខែវិច្ឆិកា ឆ្នាំ២០២៦ លោក ត្រាំ បានបង្ហាញជំហរយ៉ាងច្បាស់ក្នុងការពង្រីកកិច្ចសហប្រតិបត្តិការគ្រប់ជ្រុងជ្រោយជាមួយអាស៊ាន ចាប់តាំងពីវិស័យសេដ្ឋកិច្ច ពាណិជ្ជកម្ម ថាមពល បច្ចេកវិទ្យា ការពារជាតិ រហូតដល់ការទាញយកធនធានរ៉ែកម្រ។
​​​​​​​​ វិស័យ​ការបរទេស
ដោយ

សារព័ត៌មាន The Business Times បានរាយការណ៍ថា លោកប្រធានាធិបតី ដូណាល់ ត្រាំ បានអះអាងនៅចំពោះមុខមេដឹកនាំអាស៊ីអាគ្នេយ៍ថា សហរដ្ឋអាម៉េរិក នៅតែជាដៃគូយុទ្ធសាស្ត្រដ៏រឹងមាំ។ លោកថែមទាំងបានថ្លែងបែបកំប្លែងលាយឡំនឹងភាពម៉ឺងម៉ាត់ថា លោកនឹងបណ្តេញសមាជិកក្រុមការងាររបស់លោកចេញភ្លាម ប្រសិនបើពួកគេមិនបានសម្របសម្រួលទំនាក់ទំនងជូនមេដឹកនាំអាស៊ានឱ្យបានទាន់ពេលវេលា។ លោកបានសង្កត់ធ្ងន់ថា អាម៉េរិក គាំទ្រសម្ពន្ធមិត្ត និងដៃគូរបស់ខ្លួន១០០ភាគរយ ហើយមេដឹកនាំអាស៊ានអាចហៅទូរសព្ទទៅកាន់លោកផ្ទាល់បានគ្រប់ពេលវេលានៅពេលមានបញ្ហាកើតឡើង។
លោក ត្រាំ បានប្តេជ្ញាបើកចំហឱកាសឱ្យអាស៊ានចូលទៅកាន់ទីផ្សារពាណិជ្ជកម្ម ថាមពល បច្ចេកវិទ្យា និងសម្ភារៈការពារជាតិរបស់អាម៉េរិក។ ឆ្លៀតក្នុងឱកាសនោះ លោក ក៏បានរំលេចឡើងពីកិច្ចព្រមព្រៀងសន្តិភាពទីក្រុងគូឡាឡាំពួរវាងកម្ពុជា និងថៃ ដែលលោក និងនាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម បានរួមគ្នាសម្របសម្រួលឱ្យកើតមានឡើងកាលពីកិច្ចប្រជុំអាស៊ានឆ្នាំ២០២៥។ ជាមួយគ្នានេះ លោក ត្រាំ បានសម្លឹងឃើញសក្តានុពលដ៏មហាសាល នៃធនធានរ៉ែកម្រនៅអាស៊ីអាគ្នេយ៍ និងបានជំរុញឱ្យសមាជិកអាស៊ានពន្លឿនការអភិវឌ្ឍធនធានយុទ្ធសាស្ត្រទាំងនេះ ដែលជាវត្ថុធាតុដើមមិនអាចខ្វះបានសម្រាប់ឧស្សាហកម្មយានយន្តអគ្គិសនី បន្ទះឈីបអេឡិចត្រូនិក ទួរប៊ីនខ្យល់ និងឧស្សាហកម្មយោធាទំនើប។
លោក ត្រាំ បានចាត់ទុកបញ្ញាសិប្បនិម្មិត ជាវិស័យស្នូលសម្រាប់អនាគតនៃទំនាក់ទំនងអាម៉េរិក-អាស៊ាន ដោយលោកបានអះអាងថា គម្រោងបញ្ញាសិប្បនិម្មិតកម្រិតខ្ពស់ នឹងបង្កើតឥទ្ធិពលផ្លាស់ប្តូរពិភពលោកដ៏ធំធេង លើសពីសម័យកាលបដិវត្តន៍ឧស្សាហកម្មទៅទៀត៕

ដោយៈ សរ សុជាតិ




More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ