ភាគខាងកើតអ៊ុយក្រែននៅតែជាសមរភូមិក្តៅ ខណៈមេណាតូស្បថមិនឱ្យរុស្ស៊ីឈ្នះសង្គ្រាមនេះឡើយ
កងទ័ពអ៊ុយក្រែនកាលពីថ្ងៃព្រហស្បតិ៍បានឱ្យដឹងថា ពួកគេត្រូវបង្ខំចិត្តបោះបង់ចោលទឹកដី និងគោលដៅមួយចំនួននៅភាគខាងកើតនៃប្រទេស ក្រោយពីប្រឈមមុខនឹងក…
ទោះជាបែបនេះក្ដី បើយោងតាមសេចក្តីព្រាងនៃរបាយការណ៍របស់អង្គការសហប្រជាជាតិបានបង្ហាញថា កូរ៉េខាងជើងពិតជាបានសាកល្បងឧបករណ៍បំផ្ទុះអាវុធនុយក្លេអ៊ែរ និងចាប់ផ្តើមជីករូងក្រោមដីថ្មីបន្ថែមទៀត នៅកន្លែងសាកល្បងនុយក្លេអ៊ែរពុងយីរី (Punggye-ri) របស់ខ្លួន ដែលវា គឺជាការ «ត្រួសត្រាយផ្លូវសម្រាប់ការសាកល្បងនុយក្លេអ៊ែរបន្ថែមនៅពេលខាងមុខណាមួយ។ នេះបើតាមការចុះផ្សាយដោយសាព័ត៌មាន Nikkei Asia។
នៅថ្ងៃទី ៤ ខែសីហា រដ្ឋផ្តាច់ការកូរ៉េខាងជើងបានចេញមុខព្រមានថា ខ្លួននឹងមិនអត់ឱនឲ្យជាដាច់ខាត ចំពោះការរិះគន់របស់សហរដ្ឋអាមេរិកម្តងហើយម្តងទៀត មកលើកម្មវិធីនុយក្លេអ៊ែររបស់ប្រទេសខ្លួន ដោយបានហៅទីក្រុងវ៉ាស៊ីនតោនថាជា «ស្តេចនៃការរីកសាយអាវុធនុយក្លេអ៊ែរ» តែម្តង ហើយទីក្រុងព្យុងយ៉ាងនឹងមិនអនុញ្ញាតឱ្យមានការរំលោភបំពានលើសិទ្ធិអធិបតេយ្យភាពរបស់ខ្លួនឡើយ។
កូរ៉េខាងជើងក៏បាននិយាយផងដែរថា ខ្លួនបានដកចេញពីសន្ធិសញ្ញាមិនរីកសាយភាយតាំងពីយូរយារណាស់មកហើយ ដូច្នេះគ្មាននរណាម្នាក់មានសិទ្ធិក្នុងការប៉ះពាល់ដល់សិទ្ធិការពារខ្លួនរបស់ប្រទេសកូរ៉េខាងជើងឡើយ។
កាលពីសប្តាហ៍មុន មេដឹកនាំផ្តាច់ការកូរ៉េខាងជើងលោក គីម ជុងអ៊ុន បាននិយាយថា ប្រទេសរបស់លោកបានត្រៀមខ្លួនរួចជាស្រេចក្នុងការដាក់អាវុធនុយក្លេអ៊ែរ ដើម្បីវាយប្រហារតបត ប្រសិនបើមានការប៉ះទង្គិចផ្នែកយោធាណាមួយជាមួយសហរដ្ឋអាមេរិកផងដែរ។
យ៉ាងណាមិញ បើតាមរបាយការណ៍ស៊ើបការណ៍រយៈពេលប្រាំពីរខែដំបូងនៃឆ្នាំនេះរបស់ UN បានរៀបរាប់លម្អិតអំពីយុទ្ធសាស្ត្រដែលក្រុងព្យុងយ៉ាងប្រើដើម្បីគេចពីទណ្ឌកម្មអន្តរជាតិ ហើយរបាយការណ៍នេះត្រូវបានគេដាក់កាលពីថ្ងៃពុធទៅកាន់គណៈកម្មាធិការដាក់ទណ្ឌកម្មរបស់ក្រុមប្រឹក្សាសន្តិសុខរបស់កូរ៉េខាងជើង។
តាមរបាយស៊ើបអង្កេតនេះ រដ្ឋផ្តាច់ការកូរ៉េខាងជើងបានពង្រីកសមត្ថភាពរបស់ខ្លួនក្នុងការផលិតសម្ភារៈបង្កើមថាមពលនុយក្លេអ៊ែរ ដែលជាសមាសធាតុសំខាន់នៃអាវុធនុយក្លេអ៊ែរ និងឧបករណ៍បំផ្ទុះនុយក្លេអ៊ែរផ្សេងទៀត នៅឯរោងចក្រនុយក្លេអ៊ែរយុងយ៉ូន (Yongbyon) របស់ខ្លួន ហើយក៏កំពុងជីករូងក្រោមដីពុងយីរី (Punggye-ri) សាជាថ្មី ដែលរូងនោះត្រូវបានបំផ្លាញម្តងរួចទៅហើយ ក្រោយកិច្ចពិភាក្សាស្តីពីការរំសាយអាវុធនុយក្លេអ៊ែរជាមួយសហរដ្ឋអាមេរិកក្នុងឆ្នាំ ២០១៨ កន្លងទៅ។
យោងតាមការវិភាគដោយសមាជិកក្រុមប្រឹក្សាសន្តិសុខពីររូបនៃអង្គការសហប្រជាជាតិបាននិយាយថា ឧបករណ៍បំផ្ទុះដែលអាចត្រូវបានប្រើក្នុងការសាកល្បងនុយក្លេអ៊ែរកំពុងត្រូវបានសាកល្បងនៅរូងពុងយីរី (Punggye-ri) ។ ហើយការរៀបចំណាមួយក្នុងការសាកល្បងនុយក្លេអ៊ែរបានឈានចូលដល់ដំណាក់កាលចុងក្រោយរបស់ពួកគេ គិតត្រឹមដើមខែមិថុនាកន្លងមក។
មួយវិញទៀត យោងតាមរបាយការណ៍ដដែលបានឲ្យទៀតថា ក្រុមឧក្រិដ្ឋកម្មតាមប្រព័ន្ធអ៊ីនធឺណិតឈ្មោះ លាហ្សារូស (Lazarus Group) និងអ្នកផ្សេងទៀតដែលគ្រប់គ្រងដោយកូរ៉េខាងជើង បាននឹងកំពុងបន្តធ្វើការវាយប្រហារតាមលំហរអ៊ីនធឺណិត ដោយបានលួចលុយរាប់រយលានដុល្លារអាមេរិកជារូបិយបណ្ណគ្រីបតូ ព្រមទាំងកាក់ដុល្លារអាមេរិកផងដែរ។
មិនតែប៉ុណ្ណោះ កូរ៉េខាងជើងក៏បានរក្សាការនាំចេញធ្យូងថ្មផងដែរ ដោយផ្គើនមិនគោរពតាមបម្រាមរបស់ក្រុមប្រឹក្សាសន្តិសុខនៃអង្គការសហប្រជាជាតិនោះឡើយ។ ការសិក្សាមួយដោយក្រុមអ្នកជំនាញ និងសមាជិកអង្គការសហប្រជាជាតិបានរកឃើញថា ទីក្រុងព្យុងយ៉ាងបានបន្តដឹកជញ្ជូនធ្យូងថ្មទៅក្នុងដែនទឹករបស់ប្រទេសចិន ដោយមិនត្រូវបានបញ្ជាក់អំពីបរិមាណជាក់លាក់នោះទេ៕
