បន្ទាប់ពីក្រុមប្រដាប់អាវុធទាមទារបំបែកខ្លួននៅបណ្តាខេត្តភាគខាងត្បូងបានបើកប្រតិបត្តិការអុកឡុក និងទម្លាក់គ្រាប់បែកបង្កៃយ៉ាងគំហុក គណៈរដ្ឋមន្ត្រីថៃកាលពីថ្ងៃទី១ ខែកញ្ញា បានអនុម័តតែងតាំងលោកឧត្តមសេនីយ៍ ឆៃព្រូក ដួងប្រាផាត អតីតអគ្គសេនាធិការកងទ័ពភូមិន្ទថៃឱ្យឡើងកាន់តំណែងជាអគ្គលេខាធិការថ្មី នៃក្រុមប្រឹក្សាសន្តិសុខជាតិ។ ការតែងតាំងនេះ គឺដើម្បីជំនួសលោក ឆាត់ឆៃ បាងឆាត ដែលត្រូវផ្លាស់ទៅទទួលភារកិច្ចថ្មីជានាយកលេខាធិការដ្ឋានអចិន្ត្រៃយ៍នៃការិយាល័យនាយករដ្ឋមន្ត្រី។
ប្រភពដដែលបានគូសបញ្ជាក់ថា នេះគឺជាការសម្រេចចិត្តជាយុទ្ធសាស្ត្ររបស់នាយករដ្ឋមន្ត្រី អានុទីន ឆានវីរៈគុល ក្នុងគោលបំណងដាក់មនុស្សឱ្យត្រូវចំជំនាញ និងត្រូវចំស្ថានភាព ដើម្បីឆ្លើយតបទៅនឹងវិបត្តិសន្តិសុខនៅភាគខាងត្បូង ដែលកំពុងឡើងកម្តៅយ៉ាងក្តៅគគុក។
ភ្លាមៗក្រោយទទួលបានការតែងតាំងលោកឧត្តមសេនីយ៍ ឆៃព្រូក ក្នុងឋានៈជាអគ្គសេនាធិការកងទ័ព និងជាអគ្គលេខាធិការ នៃបញ្ជាការប្រតិបត្តិការសន្តិសុខផ្ទៃក្នុងបានចុះទៅដល់តំបន់កើតហេតុដោយផ្ទាល់ និងបានកោះប្រជុំបន្ទាន់ជាមួយកងកម្លាំងសន្តិសុខគ្រប់អង្គភាព ដើម្បីវាយតម្លៃសភាពការណ៍ និងរៀបចំផែនការឆ្លើយតបវិញ។
ប្រមុខសន្តិសុខជាតិថ្មីរូបនេះបានបញ្ជាឱ្យកងកម្លាំងសន្តិសុខថៃទាំងអស់ រឹតបន្តឹងកិច្ចប្រតិបត្តិការ និងបង្កើនការសម្របសម្រួលជើងការជាមុន ដើម្បីតាមដាន ក្រសោប និងវាយខ្នោះក្រុមដៃដល់ ដែលបង្កចលាចលយកមកផ្តន្ទាទោសតាមច្បាប់ឱ្យខាងតែបាន៕
