បើយោងតាមការចុះផ្សាយរបស់ទីភ្នាក់ងារព័ត៌មាន Anadolu Agency រដ្ឋមន្ត្រីការបរទេសចិន-អាស៊ាននៅបានបញ្ជាក់នៅក្នុងសេចក្តីថ្លែងការណ៍រួមថា ក្រុមមេដឹកនាំការទូតចិន និងអាស៊ានបានអំពាវនាវឱ្យមានការសន្ទនា និងរកដំណោះស្រាយដោយសន្តិវិធី ដោយជំរុញឱ្យបញ្ចប់អរិភាពទាំងស្រុងជាបន្ទាន់ នៅតំបន់មជ្ឈិមបូព៌ាចំពេលដែលសង្គ្រាមរវាងអាម៉េរិក និងអ៊ីរ៉ង់កំពុងបន្តវាយប្រហារគ្នាយ៉ាងស្រួចស្រាល់។
ប្រមុខការទូតចិន និងអាស៊ានបានគូសបញ្ជាក់ថា ស្ថានភាពដែលកំពុងវិវត្តយ៉ាងឆាប់រហ័សនៅមជ្ឈិមបូព៌ាកំពុងបង្កការគំរាមកំហែងយ៉ាងធ្ងន់ធ្ងរដល់អាយុជីវិត និងសុវត្ថិភាពរបស់ជនស៊ីវិល។ បន្ថែមលើនេះ វាក៏បានរាំងស្ទះដល់សន្តិភាព ស្ថិរភាព និងសកម្មភាពសេដ្ឋកិច្ចទាំងនៅក្នុងតំបន់ និងសកលលោក រួមទាំងប៉ះពាល់ដល់ពាណិជ្ជកម្ម ការវិនិយោគ ថាមពល និងសន្តិសុខស្បៀងទៀតផង។
សេចក្តីថ្លែងការណ៍រួមនេះត្រូវបានធ្វើឡើងបន្ទាប់ពីរដ្ឋមន្ត្រីការបរទេសចិន និងអាស៊ានបានជួបពិភាក្សាគ្នាក្នុងកិច្ចប្រជុំពិសេសមួយកាលពីថ្ងៃពុធ នៅទីក្រុងម៉ានីល ប្រទេសហ្វីលីពីន ដែលជាប្រធានប្តូរវេនអាស៊ាននាពេលបច្ចុប្បន្ន។ នៅក្នុងជំនួបនោះប្រមុខការទូតទាំងអស់បានសង្កត់ធ្ងន់លើសារសំខាន់ នៃការសន្ទនា ការទូត និងការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ។
គួររំឭកថា បើទោះបីជាមានការចុះហត្ថលេខាលើអនុស្សរណៈនៃការយោគយល់គ្នានៅទីក្រុងអ៊ីស្លាម៉ាបាដ កាលពីខែមុន ដើម្បីគាំទ្របទឈប់បាញ់ និងឈានទៅរកការចរចាបញ្ចប់សង្គ្រាមជាអចិន្ត្រៃយ៍យ៉ាងណាក៏ដោយ ក៏ភាគីអាម៉េរិក និងអ៊ីរ៉ង់នៅតែបន្តវាយប្រហារគ្នាទៅវិញទៅមកអស់រយៈពេល១៣ថ្ងៃមកហើយ។
ជុំវិញបញ្ហានេះរដ្ឋមន្ត្រីការបរទេសអាស៊ាន និងចិនបានអំពាវនាវយ៉ាងទទូចដល់ភាគីជម្លោះទាំងអស់ឱ្យបន្តការប្តេជ្ញាចិត្តលើប្រព័ន្ធពហុភាគីនិយម ព្រមទាំងប្រកាន់ខ្ជាប់នូវការសន្ទនាតាមផ្លូវការទូតពិតប្រាកដ ដើម្បីឈានទៅរកដំណោះស្រាយដោយសន្តិវិធី និងយូរអង្វែង ដោយផ្អែកលើគោលការណ៍គ្រឹះនៃធម្មនុញ្ញអង្គការសហប្រជាជាតិ និងច្បាប់អន្តរជាតិ៕
ដោយៈ សរ សុជាតិ
