ការសម្រេចនេះកំពុងទាក់ទាញការចាប់អារម្មណ៍យ៉ាងខ្លាំង ខណៈស៊ុយអែត ដែលជាសមាជិកមួយរបស់សហភាពអឺរ៉ុប ក៏ជាប្រទេសមួយដែលធ្លាប់ផ្តល់សិទ្ធិជ្រកកោននយោបាយដល់ពលរដ្ឋខ្មែរ និងសកម្មជនខ្មែរមួយចំនួនក្នុងរយៈពេលកន្លងមក។
យោងតាមទីភ្នាក់ងារព័ត៌មាន Reuters រដ្ឋសភាស៊ុយអែត បានអនុម័តច្បាប់ថ្មីកាលពីថ្ងៃទី១៥ ខែមិថុនា ឆ្នាំ២០២៦ ដែលអនុញ្ញាតឱ្យអាជ្ញាធរអន្តោប្រវេសន៍ពិនិត្យឡើងវិញ និងអាចដកហូតបណ្ណស្នាក់នៅរបស់ជនបរទេស ប្រសិនបើពួកគេមិនគោរពច្បាប់ ឬមានទង្វើដែលប៉ះពាល់ដល់សណ្តាប់ធ្នាប់សង្គម។ ច្បាប់នេះមិនត្រឹមតែអនុវត្តចំពោះអ្នក ដែលកំពុងដាក់ពាក្យសុំស្នាក់នៅប៉ុណ្ណោះទេ ប៉ុន្តែថែមទាំងអាចអនុវត្តចំពោះអ្នក ដែលទទួលបានសិទ្ធិស្នាក់នៅរួចហើយផងដែរ។ រដ្ឋាភិបាលស៊ុយអែត អះអាងថា អ្នកដែលមិនគោរពច្បាប់មិនគួរត្រូវបានអនុញ្ញាតឱ្យបន្តរស់នៅក្នុងប្រទេសនោះឡើយ។
ទន្ទឹមនឹងនេះ ស៊ុយអែត ក៏ជាប្រទេសដែលធ្លាប់ទទួលជនភៀសខ្លួន និងអ្នកស្វែងរកសិទ្ធិជ្រកកោនពីកម្ពុជា និងតំបន់អាស៊ីអាគ្នេយ៍ផងដែរ។ ជាក់ស្តែងកាលពីឆ្នាំ២០០៩ អតីតព្រះសង្ឃខ្មែរកម្ពុជាក្រោម ឈ្មោះ ទឹម សាខន ត្រូវបានស៊ុយអែត ផ្តល់សិទ្ធិជ្រកកោននយោបាយ បន្ទាប់ពីបានស្នាក់នៅប្រទេសថៃ និងដាក់ពាក្យសុំការការពារពីសហគមន៍អន្តរជាតិ។ នេះបើយោងតាមការចុះផ្សាយរបស់គេហទំព័រ Scand Asia។
ទោះជាយ៉ាងណាច្បាប់ថ្មីនេះបានរងការរិះគន់ពីគណបក្សប្រឆាំង និងអង្គការការពារសិទ្ធិមនុស្សមួយចំនួន ដែលព្រួយបារម្ភថា វាអាចបង្កឱ្យមានការសម្រេចចិត្តដោយអយុត្តិធម៌ ព្រោះសកម្មភាពមួយចំនួន ដែលមិនទាន់ត្រូវបានចាត់ទុកជាបទល្មើសព្រហ្មទណ្ឌ ក៏អាចក្លាយជាមូលហេតុនាំឱ្យបាត់បង់សិទ្ធិស្នាក់នៅបានដែរ។
ក្រោមច្បាប់ថ្មីនេះ អាជ្ញាធរអន្តោប្រវេសន៍ស៊ុយអែត នឹងទទួលបន្ទុកពិនិត្យ និងសម្រេចលើករណីនីមួយៗ ខណៈអ្នកដែលត្រូវដកហូតសិទ្ធិស្នាក់នៅ នៅតែមានសិទ្ធិប្តឹងឧទ្ធរណ៍ទៅកាន់តុលាការអន្តោប្រវេសន៍បានតាមផ្លូវច្បាប់៕
ដោយ: តែម សុខុម
