យោងតាមរបាយការណ៍ប្រចាំត្រីមាសទី១ឆ្នាំ២០២៤ របស់ក្រុមហ៊ុន RMA Cambodia បានបង្ហាញថា ទីផ្សាររថយន្តនៅកម្ពុជា ក្នុងត្រីមាសទី១ ឆ្នាំ២០២៤នេះ បានកើនឡើងគួរឱ្យចាប់អារម្មណ៍ ដោយមានកំណើនប្រមាណ៤២% បើធៀបនឹងត្រីមាសទី៤នៃឆ្នាំ២០២៣។ ទោះជាយ៉ាងណាក៏ដោយ ទីផ្សារលក់រថយន្តរបស់ RMA Cambodia នៅត្រីមាសទី១ឆ្នាំនេះ បានធ្លាក់ចុះប្រមាណ៣២% បើធៀបនឹងត្រីមាសដូចគ្នាកាលពីឆ្នាំមុន ដ្បិតថា ការលក់នៅត្រីមាសទី១ក្នុងឆ្នាំ២០២៣ គឺជាការលក់ប្រចាំត្រីមាសដែលមានចំនួនខ្ពស់បំផុតនៅកម្ពុជា។ យ៉ាងណាមិញ ក្នុងកំឡុងត្រីមាសទី១ឆ្នាំនេះ ទីផ្សារទាំងមូលរបស់ RMA Cambodia មានការកើនឡើងប្រមាណ៣៨% បើធៀបនឹងត្រីមាសទី៤នៃឆ្នាំ២០២៣។
លោក ងន សាំង អគ្គនាយកក្រុមហ៊ុន RMA Cambodia បានគូសបញ្ជាក់ថា ការលក់រថយន្តនៅត្រីមាសទី១ឆ្នាំនេះ មានការថយចុះ គឺដោយសារកត្តាសេដ្ឋកិច្ច។ តែយ៉ាងណាលោកជឿជាក់ថា ទីផ្សារប្រើប្រាស់រថយន្តថ្មីនៅកម្ពុជានឹងមានការកើនឡើងកាន់តែច្រើននាពេលខាងមុខ ដោយសារបច្ចុប្បន្នតម្លៃរថយន្តថ្មី គឺប្រហាក់ប្រហែលនឹងរថយន្តជជុះ ស្របពេលអ្នកប្រើប្រាស់ភាគច្រើនមានការយល់ដឹងកាន់តែច្រើនពីអត្ថប្រយោជន៍ និងសុវត្ថិភាពនៃការប្រើប្រាស់រថយន្តថ្មី។
គួរបញ្ជាក់ថា នៅក្នុងឆ្នាំ២០២៣ ការនាំចូល និងការលក់រថយន្តរបស់ក្រុមហ៊ុន RMA Cambodia នៅកម្ពុជា មានការធ្លាក់ចុះបន្តិចបន្តួចបើធៀបនឹងឆ្នាំ២០២២។ ទោះបីការលក់មានការធ្លាក់ចុះក៏ពិតមែន តែលោក ងន សាំង អះអាងថា ទីផ្សាររថយន្តថ្មីរបស់ក្រុមហ៊ុន RMA Cambodia នៅតែឈរកំពូលតារាងដោយបានក្តោបចំណែកទីផ្សារជាង៥០% នៃការលក់រថយន្តថ្មីសរុបនៅកម្ពុជា៕
