ទីបំផុត! សហភាពអឺរ៉ុបអនុម័តច្បាប់ AI ដំបូងបង្អស់របស់ពិភពលោក ដើម្បីគ្រប់គ្រងបច្ចេកវិទ្យាបញ្ញាសិប្បនិម្មិត

ក្រុមប្រឹក្សាសហភាពអឺរ៉ុបបានបញ្ជាក់ថា ខ្លួនបានអនុម័តហើយនូវច្បាប់ស្ដីពីការគ្រប់គ្រង​បច្ចេកវិទ្យា​បញ្ញា​​សិប្បនិម្មិត AI ដែលជាច្បាប់ដ៏មានសារសំខាន់មួយដែលកំណត់វិធានយ៉ាង​ទូលំទូលាយជុំវិញ​បច្ចេក​វិទ្យា​បញ្ញាសិប្បនិម្មិត AI។

លោក ម៉ាត់ស៊ីវ មីឆែល (Mathieu Michel) រដ្ឋមន្ត្រីក្រសួងឌីជីថលនីយកម្មនៃប្រទេសបែលហ្ស៊ិក បាន​ចេញសេចក្តីថ្លែងការណ៍មួយកាលពីថ្ងៃអង្គារ ទី២១ ខែឧសភា ថា ការអនុម័តច្បាប់ AI នេះ គឺជា​​ព្រឹត្តិការណ៍​​ដ៏សំខាន់មួយសម្រាប់សហភាពអឺរ៉ុប។ ជាមួយនឹងច្បាប់ AI នេះ អឺរ៉ុបផ្ដោតការយកចិត្តទុក​ដាក់​លើ​សារសំខាន់នៃការជឿទុកចិត្ត តម្លាភាព និងគណនេយ្យភាពទាក់ទិននឹងបច្ចេកវិទ្យាថ្មីៗ ដើម្បី​ធានាថា បច្ចេកវិទ្យាដែលមានការប្រែប្រួលយ៉ាងឆាប់រហ័សនេះអាចរីក​ចម្រើនទៅមុខ​ដោយមិន​បង្ក​ហានិភ័យធ្ងន់ធ្ងរ និងជួយជំរុញនវានុវត្តន៍ថ្មីរបស់អឺរ៉ុប។

កម្មវិធី ឬ AI App ត្រូវបានគ្រប់គ្រងផ្សេងៗពីគ្នាក្រោមច្បាប់ AI នេះដោយផ្អែកលើភាពគ្រោះថ្នាក់ ឬ ហានិភ័យដែល App ទាំងនោះបង្កឡើងដល់សង្គមមនុស្ស។ សូមបញ្ជាក់ថា ច្បាប់ AI នេះហាមឃាត់ AI App ណាដែលត្រូវបានចាត់ទុកថា មិនអាចទទួលយកបាន ទាក់ទិននឹងកម្រិតហានិភ័យ​ដែលវាបង្ក​ឡើង​​មកលើសង្គមមនុស្ស៕

ដោយ: តែម សុខុម