ឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា បានគូសបញ្ជាក់ថា អង្ករកម្ពុជា នៅតែរក្សាបាននូវស្តង់ដាគុណភាពខ្ពស់ និងមានតម្លៃប្រកួតប្រជែង ដែលអាចឆ្លើយតបនឹងតម្រូវការនៃទីផ្សារប្រទេសចិន និងបណ្តាប្រទេសនានាលើពិភពលោក។ ការណ៍នេះបានធ្វើឱ្យលោកឧកញ៉ា រំពឹងយ៉ាងមុតមាំថា ការនាំចេញអង្ករកម្ពុជា ទៅកាន់ប្រទេសចិន នឹងបន្តហក់ឡើងកាន់តែខ្ពស់នាពេលខាងមុខ ស្របពេលសហព័ន្ធកំពុងខិតខំពង្រីកវិសាលភាពទីផ្សារឱ្យកាន់តែទូលំទូលាយ។ ជាមួយគ្នានេះ សហព័ន្ធស្រូវអង្ករកម្ពុជា កំពុងបង្កើនល្បឿនលើការពង្រីកសមត្ថភាពឃ្លាំងស្តុក ព្រមទាំងបើកច្រកទីផ្សារយុទ្ធសាស្ត្រថ្មីៗបន្ថែមទៀតដូចជាប្រទេសហ្វីលីពីន តំបន់អឺរ៉ុប និងសហរដ្ឋអាម៉េរិកជាដើម។ បើតាមការអះអាងរបស់ប្រធានសហព័ន្ធរូបនេះ គ្រាន់តែនៅក្នុងឆ្នាំ២០២៦ ប្រទេសហ្វីលីពីនមួយបានស្រូបទាញអង្ករពីកម្ពុជា រហូតដល់ទៅជាង២០ម៉ឺនតោនរួចស្រេចទៅហើយ។
ជាមួយគ្នានេះ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ការបញ្ជាទិញអង្កររបស់ប្រទេសហ្វីលីពីន បានធ្វើឱ្យទីផ្សារនាំចេញរបស់កម្ពុជា មានភាពទូលំទូលាយច្រើនជាងមុន ខណៈការនាំចេញទៅប្រទេសវៀតណាម ចិន និងតំបន់អឺរ៉ុប ក៏មានភាពល្អប្រសើរជាងមុនផងដែរ។ អ្នកនាំពាក្យរូបនេះ បានអះអាងថា ក្រសួងកំពុងផ្ដល់ការគាំទ្រដល់វិស័យឯកជន ដើម្បីជំរុញការនាំចេញអង្ករទៅទីផ្សារអន្តរជាតិ ឱ្យមានការកើនឡើងថែមទៀត។
សូមបញ្ជាក់ថា កម្ពុជា បានបង្កើតកំណត់ត្រាប្រវត្តិសាស្ត្រថ្មីមួយដោយនាំចេញអង្ករទៅកាន់ទីផ្សារអន្តរជាតិ បានរហូតដល់ទៅជាង១លាន១ម៉ឺនតោនក្នុងរយៈពេលត្រឹមតែជាង៩ខែដើមឆ្នាំ២០២៦ ខណៈកាលពីឆ្នាំ២០២៥ កម្ពុជា នាំចេញអង្ករសរុបបានត្រឹមជាង៩៤ម៉ឺនតោនជាមួយចំណូលជាង៦០០លានដុល្លារអាម៉េរិកប៉ុណ្ណោះ។ អង្ករកម្ពុជា ត្រូវបាននាំចេញទៅកាន់ទីផ្សារជាង៦៦គោលដៅ ដោយតំបន់អាស៊ាន ទីផ្សារអឺរ៉ុប និងប្រទេសចិន ជាអ្នកស្រូបទាញធំជាងគេ៕
អត្ថបទ៖ បូ ដូឡា
