ចិន ព្រមានចាត់វិធានការសងសឹក បើអាម៉េរិក ហ៊ានហាមឃាត់ការនាំចូលមនុស្សយន្ត និងបច្ចេកវិទ្យាសូឡារបស់ខ្លួន

យោងតាមការចុះផ្សាយរបស់កាសែតបាងកកប៉ុស្តិ៍ កម្លាំងនគរបាលនៃនាយកដ្ឋានបង្ក្រាបបទល្មើសសេដ្ឋកិច្ចថៃ បានចុះទៅប្រម៉ាញ់ និងឆែកឆេរឃ្លាំងសម្ងាត់គ្មានលេខអាសយដ្ឋានមួយកន្លែង ដែលលាក់ខ្លួនយ៉ាងជ្រៅក្នុងផ្លូវលំតូចមួយនៅទីក្រុងបាងកក។ ទោះបីជាទ្វារខាងមុខឃ្លាំងត្រូវបានបិទជិត ដើម្បីបិទបាំងភ្នែកសមត្ថកិច្ចក៏ដោយ ប៉ុន្តែនៅខាងក្នុងគេឃើញកម្មករថៃជាច្រើននាក់កំពុងមមាញឹកយ៉ាងខ្លាំងក្នុងការច្រកប្រអប់ និងវេចខ្ចប់ទំនិញក្លែងក្លាយទាំងនោះយ៉ាងល្អប្រណិតមើលទៅប្រហាក់ប្រហែលនឹងទំនិញសុទ្ធបេះបិទ ដើម្បីត្រៀមដឹកជញ្ជូនឱ្យអតិថិជន។
នៅក្នុងប្រតិបត្តិការឆែកឆេរនោះ សមត្ថកិច្ចបានដកហូតទំនិញក្លែងក្លាយសរុប៣២,៨៧៧មុខ ក្នុងនោះរួមមាន ទំនិញគ្រោះថ្នាក់ និងប៉ះពាល់សុខភាពជាច្រើនដូចជាទឹកអប់ប្រើក្នុងរថយន្តក្លែងក្លាយ២២,០០០ដប, ផលិតផលថែរក្សាស្បែក និងគ្រឿងសម្អាងក្លែងក្លាយ៧,០០០កញ្ចប់, ប្រេងម៉ាស៊ីនរថយន្តក្លែងក្លាយជាង១,៦០០ដបធំព្រមទាំងម្សៅប្រូតេអ៊ីន និងម្សៅតែបៃតងក្លែងក្លាយរាប់ពាន់កញ្ចប់ទៀត។
ការបង្ក្រាបនេះធ្វើឡើងក្រោយតំណាងក្រុមហ៊ុនផលិតប្រេងរំអិលដ៏ល្បីឈ្មោះរបស់អាល្លឺម៉ង់ លីឃ្វីដ ម៉ូលី (Liqui Moly) បានដាក់ពាក្យបណ្តឹងបន្ទាប់ពីពួកគេសង្កេតឃើញមានការហូរចូល និងលក់ប្រេងម៉ាស៊ីនក្លែងក្លាយលើទីផ្សារអនឡាញក្នុងតម្លៃថោកខុសពីធម្មតា។ តាមការឆ្លើយសារភាពរបស់កម្មករថៃ ឃ្លាំងនេះត្រូវបានជួលដោយជនជាតិចិនម្នាក់រយៈពេល៣ខែមកហើយ។ ផលិតផលអន់គុណភាពទាំងអស់នេះ ត្រូវនាំចូលដោយផ្ទាល់ពីប្រទេសចិន ដោយផ្តោតលើផលិតផលកំពុងត្រូវប៉ាន់ ឬត្រូវត្រេន លើបណ្តាញសង្គម ហើយដាក់លក់ក្នុងតម្លៃថោកទាបជាងទីផ្សារ ដើម្បីវាយលុកទីផ្សារ និងប្រមូលប្រាក់ចំណេញរហ័ស ដោយមិនខ្វល់ពីសុវត្ថិភាព និងផលប៉ះពាល់របស់អ្នកប្រើប្រាស់ឡើយ៕

អត្ថបទៈ សួន ឡង់ទី