ក្រុមហ៊ុនអាកាសចរណ៍ចិន ធំៗ៣ រងការខាតបង់ជាង១ពាន់លានដុល្លារ ដោយសារសង្គ្រាមអ៊ីរ៉ង់

ទីភ្នាក់ងារព័ត៌មាន Reuters បានរាយការណ៍នៅថ្ងៃទី៣១ ខែសីហា ថា ក្រុមហ៊ុនអាកាសចរណ៍រដ្ឋទាំង៣របស់ចិន រួមមាន Air China, China Eastern Airlines និង China Southern Airlines បានខាតបង់រហូតដល់ទៅជាង៨ពាន់លានយន់ ឬជាង១,២ពាន់លានដុល្លារអាម៉េរិកនៅឆមាសទី១ ឆ្នាំនេះ។ ការខាតបង់ដ៏ធ្ងន់ធ្ងរនេះ គឺជាការប្រែប្រួលភ្លាមៗ បើធៀបនឹងប្រាក់ចំណេញជាង៧១៧លានដុល្លារ កាលពីត្រីមាសទី១ ដែលកាលណោះទទួលបានការគាំទ្រពីកំណើនតម្រូវការធ្វើដំណើរយ៉ាងកំហុកក្នុងអំឡុងបុណ្យចូលឆ្នាំចិន។ ផលប៉ះពាល់នេះបានទាញទម្លាក់តម្លៃភាគហ៊ុនរបស់ក្រុមហ៊ុនយក្សទាំង៣ ឱ្យដាំក្បាលចុះភ្លាមៗ នៅក្នុងទីផ្សារជួញដូរភាគហ៊ុនចិនដីគោក និងហុងកុង នៅថ្ងៃទី៣១ ខែសីហា។
ក្នុងនោះ ក្រុមហ៊ុន Air China បានខាតបង់ច្រើនជាងគេរហូតដល់ជិត៦៤០លានដុល្លារកើនឡើងពីជាង២៦៩លានដុល្លារ ដែលបានខាតបង់ក្នុងរយៈពេលដូចគ្នាកាលពីឆ្នាំមុន ខណៈក្រុមហ៊ុន China Eastern Airlines: ខាតបង់ជាង៣២៧លានដុល្លារ និងក្រុមហ៊ុន China Southern Airlines ខាតបង់ជាង៥៥០លានដុល្លារ។
លទ្ធផលដ៏សោកសៅនេះ បានរំលេចឱ្យឃើញយ៉ាងច្បាស់ពីភាពផុយស្រួយ នៃវិស័យអាកាសចរណ៍ចិន ក្នុងដំណាក់កាលស្តារឡើងវិញក្រោយវិបត្តិជំងឺរាតត្បាត។ ក្រុមហ៊ុន China Eastern បានលើកឡើងថា បរិយាកាសប្រាក់ចំណេញត្រូវបានបំផ្លាញយ៉ាងធ្ងន់ធ្ងរ ដោយសារការរំខាននៃជើងហោះហើរអន្តរជាតិ និងតម្លៃប្រេងសាំងយន្តហោះដែលបន្តហក់ឡើងខ្ពស់ ក្រោមឥទ្ធិពលនៃជម្លោះនៅតំបន់មជ្ឈិមបូព៌ា។
ការចំណាយលើប្រេងឥន្ធនៈរបស់ក្រុមហ៊ុននីមួយៗបានកើនឡើងចន្លោះពី៣៥% ទៅ៣៨% ក្នុងឆមាសទី១ ឆ្នាំនេះ។ ក្រុមអ្នកវិភាគបានគូសបញ្ជាក់ថា បើទោះបីជាតម្លៃប្រេងសាំងយន្តហោះបានថមថយបន្តិច ពីកម្រិតកំពូលកាលពីត្រីមាសទី២ ក៏ដោយ ក៏ថ្លៃដើមបច្ចុប្បន្ននៅតែខ្ពស់ជាងកម្រិតមុនផ្ទុះសង្គ្រាមលើសពី៥០% ដដែល។
អ្នកវិភាគរបស់ធនាគារ HSBC បានកែសម្រួលការព្យាកររបស់ខ្លួនថា ក្រុមហ៊ុនអាកាសចរណ៍រដ្ឋទាំង៣របស់ចិន អាចនឹងរងការខាតបង់រួមគ្នាសរុបរហូតដល់២,៥ពាន់លានដុល្លារនៅពេញមួយឆ្នាំ២០២៦។ ការព្យាករណ៍នេះវាផ្ទុយពីអ្វី ដែលទីផ្សារធ្លាប់បានរំពឹងទុកកាលពីមុនថា ក្រុមហ៊ុនទាំង៣នឹងអាចប្រមូលប្រាក់ចំណេញរួមគ្នាបានប្រមាណ១៩៣លានដុល្លារ៕

អត្ថបទៈ សួន ឡង់ទី