ការវិនិយោគនៅក្រៅប្រទេសវៀតណាម មានភាគច្រើនវិនិយោគលើវិស័យធនាគារ និងហិរញ្ញវត្ថុ ដែលមានដើមទុនវិនិយោគសរុបក្នុងវិស័យនេះ ១០៥ លានដុល្លារអាមេរិក ដែលស្មើជាង ៦៨% នៃការវិនិយោគក្រៅប្រទេសសរុប។ បន្ទាប់ពីនេះ គឺជាការវិនិយោគលើវិស័យឧស្សហកម្មកែច្នៃ និងផលិត ដែលមានជាង ១៣% នៃការនាំចេញសរុប និងក្រៅពីនេះទៀត គឺជាការវិនិយោគលើវិស័យលក់រាយ និងលក់ដុំ។
អ្នកជំនាញនៅក្នុងវិស័យពាណិជ្ជកម្មរបស់វៀតណាម បានលើកឡើងថា ដើម្បីលើកទឹកចិត្តឲ្យក្រុមហ៊ុនវៀតណាម កាន់តែច្រើនចេញធ្វើវិនិយោគទុនទៅក្រៅប្រទេស រដ្ឋាភិបាល និងវិស័យពាក់ព័ន្ធនានា គួរតែលើកកម្ពស់កិច្ចសហប្រតិបត្តិការ ជាមួយរដ្ឋាភិបាលនៃបណ្ដាប្រទេសផ្សេងទៀត ដែលមានការវិនិយោគដោយផ្តោតលើតម្លាភាព និងស្ថិរភាព ព្រមជាមួយនឹងបរិយាកាសធុរកិច្ចល្អប្រសើរ។
នាប៉ុន្មានឆ្នាំចុងក្រោយនេះ ប្រទេសវៀតណាមបានពង្រីកសក្តានុពលក៏ដូចជា ឥទ្ធិពលរបស់ខ្លួនទៅលើវិនិយោគយ៉ាងសម្បើម នៅប្រទេសក្នុងតំបន់ឥណ្ឌូចិន គឺកម្ពុជា និងឡាវ ខណៈដែលប្រទេសទាំងពីរនេះ គឺជាគោលដៅទីផ្សារវិនិយោគដ៍ធំជាងគេរបស់ប្រទេសវៀតណាម។
អត្ថបទទាក់ទង!
ជាមួយគ្នានេះដែរ បើតាមរបាយការណ៍ពេញ១ឆ្នាំ២០១៧ របស់ក្រុមប្រឹក្សាអភិវឌ្ឍន៍កម្ពុជា (CDC) បានបង្ហាញដែរថា ក្នុងចំណោមប្រទេសទាំង១០ ដែលបានមកវិនិយោគនៅកម្ពុជា វៀតណាមគឺឈរក្នុងលំដាប់លេខរៀងទី៥ ដែលបានបោះទុនវិនិយោគនៅកម្ពុជាជាង ៥១លានដុល្លារអាមេរិក។
សូមជម្រាបដែរថា នៅក្នុងជំនួបជាមួយរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកម្ពុជា កាលពីពេលថ្មីៗនេះ ក្រុមហ៊ុនធំមួយរបស់វៀតណាម FLC Group ក៏បានបង្ហាញពីឆន្ទៈរបស់ខ្លួន ក្នុងការចូលមកបោះទុនរហូតដល់ ១ពាន់លានដុល្លារអាមេរិក វិនិយោគនៅកម្ពុជាផងដែរ។ ហើយបើតាមការអះអាងពីតំណាងក្រុមហ៊ុនវៀតណាមមួយនេះ ការវិនិយោគ នឹងចាប់ផ្ដើមឡើងនៅ ឆ្នាំ២០១៩ខាងមុខ ដោយផ្តោតលើការវិនិយោគដាំដុះបន្លែ ម្ទេស និងផ្លែឈើមួយចំនួន សម្រាប់ការនាំចេញ និងផ្គត់ផ្គង់ក្នុងស្រុក ព្រមជាមួយនឹងការវិនិយោគកែច្នៃ និងវិចខ្ចប់ផលិតផលកសិកម្មសម្រាប់នាំចេញជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
