យោងតាមការចុះផ្សាយរបស់សារព័ត៌មាន Laotian Times កាលពីថ្ងៃទី២ខែឧសភា អាជ្ញាធរចិន បានដាក់ចេញនូវបទប្បញ្ញត្តិថ្មីៗ ដើម្បីគ្រប់គ្រងខ្លឹមសាររឿងភាគចិន ខ្នាតតូច ដែលកំពុងវាយលុកខ្លាំងលើបណ្តា្កញសង្គមនៅតំបន់អាស៊ាន រួមទាំងកម្ពុជា។ វិធានការនេះផ្តោតសំខាន់លើការលុបបំបាត់សាច់រឿងដែលផ្តល់រូបភាពមិនពិតដល់សង្គម ជាពិសេសសាច់រឿង ដែលជួបប្រទះញឹកញាប់ដូចជាស្នេហារវាងអ្នកមាន និងអ្នកក្រខ្លាំងពេក ឬចលនាសង្គមដែលខុសពីការពិតដែលអាជ្ញាធរចាត់ទុកថា ជាខ្លឹមសារមិនសមរម្យ។
អ្វីដែលគួរឱ្យកត់សម្គាល់ ឧស្សាហកម្មវីដេអូខ្លីនេះទទួលបានការពេញនិយម និងរីកចម្រើនយ៉ាងឆាប់រហ័ស។ បើយោងតាមការចុះផ្សាយរបស់សារព័ត៌មាន People’s Daily កាលពីឆ្នាំ២០២៥ កន្លងទៅ ក្នុងប្រទេសចិនមានអ្នកទស្សនារឿងភាគប្រភេទនេះរហូតដល់៦៦២លាននាក់និងបង្កើតប្រាក់ចំណូលបានរហូតដល់ជាង៧ពាន់លានដុល្លារ។ ដោយសារចំណាយដើមទុនតិច ផលិតលឿន ប៉ុន្តែអាចរកប្រាក់បានច្រើន ធ្វើឱ្យផលិតករជាច្រើនសម្រុកផលិតដោយខ្វះការត្រួតពិនិត្យ និងខ្វះក្រមសីលធម៌វិជ្ជាជីវៈ។
អាជ្ញាធរទីក្រុងប៉េកាំង បានកត់សម្គាល់ថា រឿងភាគទាំងនេះច្រើនតែសង្កត់ធ្ងន់ខ្លាំងលើរបៀបរស់នៅបែបប្រណីតហួសហេតុ ជម្លោះគ្រួសារដ៏ស្មុគស្មាញ និងការលើកកម្ពស់គំនិតមិនប្រាកដនិយមអំពីទ្រព្យសម្បត្តិ។និន្នាការនេះកំពុងជះឥទ្ធិពលដល់ផ្នត់គំនិតយុវជនមិនត្រឹមតែក្នុងប្រទេសចិន ប៉ុណ្ណោះទេ ប៉ុន្តែក៏កំពុងរីករាលដាលដល់បណ្តាប្រទេសក្នុងតំបន់អាស៊ាន ដូចជាឡាវ និងកម្ពុជា ផងដែរ ដែលតម្រូវឱ្យមានការត្រួតពិនិត្យឱ្យបានហ្មត់ចត់ជាងមុន៕ដោយៈ សរ សុជាតិ
ដោយៈ សរ សុជាតិ
